Pago Pago - AMERIKA SAMOA

MOLIA I LE SAUAINA O SE TEINEITITI 3 TAUSAGA

O le afiafi o le aso 6 o Iulai 2023 na valaau atu ai se tina i le ofisa a leoleo i Tafuna ma ona tuuaia se tagata o lona aiga, i lona sauaina o si ana tama teine e 3 tausaga, lea na fa’ato’a te’a mai i le falemai i le aso lava lea e tasi.

Ina ua taunuu lenei tina ma lona alo i le ofisa a leoleo, sa molimauina e sui malu o le malo ni maka lanu mumu i le lima tauagavale, patua ma luma o le teineititi.  Sa tapueina e leoleo ia ata o maka sa i luga o le tino o le teineititi ma tusia loa faamatalaga mai i le tina ma lona alo.

Sa ta’ua e le tina i lana molimau tusia, e le i iai o ia i le taimi na tupu ai le faalavelave, ae o lona tina sa faamatalaina atu ia te ia le mea sa tupu.  E tusa ai ma le faamatalaga a le tina matua, sa ta’a’alo le na a’afia i lenei faalavelave ma sona tausoga, ae togi ai e le ua a’afia ia le polo ma tau i foliga o lona tausoga, ma na tamo’e atu ai le tausoga ma tagi i lona tama ma fai iai, ua maluelue lona nifo.

O lea na fa’aaoga ai e lenei tama (e le o fa’alauiloa lona suafa ona o le puipuiga o fanau iti o lo o a’afia i lenei mataupu) ma fa’aaoga se la’au u’amea lea e faaaoga e sasa ai lago, ma sasa ai le teineititi 3 tausaga.  Ina ua mae’a ona faamaumauina le molimau a le tina o lenei alualutoto, sa faapea loa ona faafesootai e le ofisa a leoleo ia le aufaigaluega a le DHSS mo se suesuega e faasaga i le teineititi 3 tausaga.

I le afiafi lava lea, na agai atu ai leoleo e saili mai le ua molia i lenei mataupu, i lona aiga i Malaeimi, ae peitai, ina ua taunuu atu, sa faailoa mai iai e lona toalua, o lea ua malaga lea alii e faigaluega i Fagatogo ma e fa’ato’a toe manava i le taeao e soso’o ai.  Na mafai ona tuuina mai e le toalua o lea alii ia lana numera telefoni, i leoleo, ma o lea na faafesootai ai lea alii e leoleo ma faatonuina o ia ina ia o’o mai i le ofisa a leoleo e tali i tuuaiga ua faia faasaga ia te ia.

Na soso’o ona agai atu leoleo i le fale o le tina matua o le teineititi 3 tausaga ma talosagaina o ia e agai mai i le ofisa a leoleo mo le faia o sana faamatalaga e tusa ai ma lenei faalavelave.  A o le’i agai atu leoleo ma le tina matua i le ofisa a leoleo, na o latou muamua agai atu i le fale o le alii ua molia, e saili mai le la’au u’amea lea e fa’aaoga e sasa ai lago, lea na sasa ai le teineititi ua aafia i lenei mataupu.

Sa leai se vaega o le molimau a le tina matua na ese mai i le molimau a lana tama teine, po o le tina o le teineititi 3 tausaga.  O le po lava lea e tasi, na taunuu ai loa le ua molia i lenei mataupu, i le ofisa a leoleo, mo sana molimau ma sa lokaina ai lava o ia i lena po.

O le aso Lua o le vaiaso ua tuanai na tulai ai lenei alii i luma o le faamasinoga e tali i ona moliaga, o faitauga e lua o le faaoolima i lona tikeri e tolu faapea ma le faitauga e tasi o le faia o se tulaga e ono lamatia ai le soifua o fanau iti.

E $1,000 le tupe faatulagaina mai i le faamasinoga e totogi e mafai ai ona tatalaina i tua le ua molia. 

FAALAVELAVE TAU TAAVALE I LUGA O LE ALATELE; MANUNU’A AI NISI

O le aoauli o le aso Gafua, Iulai 3, 2023 na tupu ai se faalavelave tau taavale i luga o le alatele i Gataivai ma sa faataalise atu iai sui malu o le malo ma taumafai e fesoasoani i nisi na a’afia i lea faalavelave.

I le faatalatalanoaina e leole o aveta’avale e lua na aafia i lenei faalavelave e pei ona ta’ua i totonu o le ripoti, sa ta’ua e Lorena Tuiolosega lona fa’atoa manava mai i lana galuega ma agai atu loa i lona aiga i le itu i sisifo, ma ina ua pasi teisi atu lava le pioga o iai tane tetele i Gataivai, sa ia aapa ai mol ana telefoni, ae ona le iloa ai ua se’e atu lana taavale agai i le itu tauagavale o le auala, i le mea o lo o agai mai ai taavale.  Ma sa tuai ona ia toe faasa’o lana taavale, na feto’ai ai loa ma se taavale o lo o agai mai leisi itu o le auala.  Na ta’ua e Tuiolosega, sa na o ia na i totonu o le taavale.

I le faamatalaga a le aveta’avale lea na so’a e Tuiolosega lana taavale, le susuga Faatau Kome, a’o agai atu lana taavale i le itu i Sasa’e, sa ia va’aia le agai atu o le taavale a Tuiolosega, ma sa ia vaaia le talanoa o le avetaavale i luga o le telefoni, ma sa ia taumafai loa e tutu’u lana taavale agai i le itu i tai o le alatele ina ia le feto’ai a la taavale, ae peitai, sa i’u lava ina taia lana taavale e le taavale a Tuiolosega.

Sa ta’ua e Kome, ina ua taia lana ta’avale, sa ia taumafai e seu mai totonu lana taavale ina ia aua nei oso i totonu o le sami ma ia aua ne’i tau lana taavale i le taavale o lo o mulimuli atu i le taavale a Tuiolosega.  

E toaono le pasese a Kome sa i totonu o lana pikiapu, na aofia ai lona toalua i luma o le nofoa pasese, o ona alo tamaitai e toalua se i nofoa na pito i tua ma ona atalii e toatolu sa i tua o le keli o le pikiapu.

Sa faamatala foi e le aveta’avale lea sa mulimui atu lana taavale, i le taavale a Tuiolosega, na ia molimauina le oso o le taavale a Tuiolosega agai i e itu tauagavale ma i lana vaai mai i tua, na tu’u i lalo le lima o Tuiolosega mai lona taliga, e foliga mai sa talanoa Tuiolosega i luga o le telefoni, ae o le taimi lena, ua le toe mafai seisi gaioiga a Tuiolosega e taofia ai le tupu o le faalavelave.

I le mae’a o suesuega a le vaega o le EMS, na aveina atu ai loa nisi e toalua mai i le au pasese o le taavale a Kome, i le falemai mo nisi suesuega.  Ma sa tete’a uma i la’ua i tua mai i le falemai, i lea lava afiafi.

O le aso Lua o le vaiaso ua tuanai, na tulai ai Tuiolosega i luma o le faamasinoga e tali ona moliaga, o faitauga e lua i le ave taavale faatamala na a’afia ai ni manu’a i nisi.