Ads by Google Ads by Google

Tala o Faamasinoga


[ata: foa'i]

Pago Pago - AMERIKA SAMOA

TULA’I SE ALII I LUMA O LE FAAMASINOGA MAUALUGA E TALI MOLIAGA O LE FAAMALOSI TAGATA

O le faaiuga vaiaso ua tuana’I na tula’I ai I luma o le Afioga I le Faamasino Sili ia Fiti Sunia ma le Faamasinoga Maualuga, le alii o Viliamu Filemoni, e tali iI ona moliaga i lona faamalosia ma le faia o ni amioga mataga, e aofia ai le taofia faamalosi, o se faafafine e 16 tausaga.  

O moliaga o Filemoni, ua afua mai ona o se faalavelave na tupu ia Fepuari 7, 2023 I Leone.

O lo’o taofia nei Filemoni i le falepuipui seia vagana ua ia totogia se tinoitupe e $20,000 e tatala mai ai o ia I tua.

O le tua’a o le na a’afia I lenei mataupu, sa o’o atu I le ofisa a leoleo I Leone e ripotia le fa’alavelave.  Ua ta’ua I totonu o faamaumauga a le faamasinoga, sa faailoa atu e le tua’a o le ua a’afia, o lona alo o se faafafine ma ua mafatia tele o ia I le mea ua tupu.

Ma e tusa ai ma faamaumauga o le tagi, na tu’uaia e Filemoni le mafuaaga o lenei faalavelave I le ua a’afia I lenei mataupu.

TU’UAIA SAPPA SANTANA I FUALAAU FAASAINA

 O le amataga o lenei masina, na tula’I ai Sappa Santana, I luma o le Faamasinoga Faaitumalo ma e $3,000 le tupe faatulagaina mo le tatalaina o ia I tua.  O lo’o ua molia Santana I le umia o vaega Fualaau faasaina, o le Aisa.

E tusa ai ma le mau a le malo, o le amataga o le masina na faafeso’ota’I atu ai e le ofisa a leoleo o lo’o gafa ma le mataituina o alatele, I le vaega o lo’o mataituina Vaega o Fualaau Faasaina, le umia e Santana o  se paipa o iai se pauta paepae, ina ua suesueina o ia I se faalavelave tau taavale na tula’I mai I le afioaga o Auto.

I le taunu’u atu o leoleo I lea faalavelave, na feiloai ai ma Santana mai I Aua, o ia lea na faafoeina le taavale, e pei ona ta’ua I le mau a le malo.  O Santana sa ia autafa o le auala ma sa ia u’uina se telefoni ma se ato faafafa.

Sa ia faamatalaina I leoleo, na moe o ia I le taimi sa ia faafoeina ai le taavale ma ia le mafai ai ona taofiofia le taavale.

Ina ua fesiligia o ia e leoleo i mea o I totonu o lana atofaafafa, sa tu’uina atu iai e Santana I leoleo lana ato ma o iina na maua ai e leoleo le paipa o iai se pauta paepae, ma o lo’o afifi I se pepa pa’epae.

Na ta’ua e leoleo, ina ua vaai Santana I le paipa, sa ia fai atu I leoleo, o ia e ana le ato ae le o mea o iai I totonu.

Ina ua taunu’u leoleo I lo latou ofisa I Fagatogo, na aveina atu loa le ato fa’afafa ma mea o I totonu I le vaega a le ofisa a leoleo e suesueina Fualaau Faasaina ma na faamaonia ai, o le vaega o Fualaau faasaina, o le Aisa lea sa I totonu o le paipa.

E tusa ai ma se faamatalaga a Santana, o le paipa, o le paipa a lana uo teine, na tu’u atu ia te ia e taofia.  Ma o lea na agai atu I Fagaitua e ave le meaai a lana teine, ae moe ai i le aveina o le taavale ma tula’I mai ai le faalavelave tau taavale I Auto.

Sa mafai ona aveina le ua molia I le falema’I I lea lava aso mo le togifitiga o ona manu’a ma ina ua mae’a togafitiga a foma’I, na aveina sa’o atu lava o ia I le ofisa a leoleo I Tafuna .  

A’o faatinoina tiute a leoleo e sauni ai Santana mo le aveina atu I le falepuipui, ae maua ai se ula o iai se tama’I fagu, o iai totonu se pauta paepae.  Sa ia ta’u atu I leoleo, o ia e ana le ula, ae o le tamai fagu e le o se meatotino a ia.  Sa mafai foi I suesuega a leoleo ona faamaonia ai, o le pauta paepae sa I totonu o lea tama’I fagu, o se vaega o Fualaau faasaina, o le Aisa.