Pago Pago, AMERIKA SAMOA

FESOASOANI FA’ALAPOTOPOTOGA MANU MAI LAGI - SIKOLASIPI A FANAU A SAMOA

I se pepa o fa’amatalaga ua fa’ailoa ai i le vaiaso ua te’a e to’a 4 fanau o a’o’oga i le Kolisi Tuufa’atasi ua mafai nei ona fa’afiafiaina aua ua taua’aoina i ai avanoa fa’asikolasipi sa saunia lelei e le Fa’alapotopotoga a le Manu Mai Lagi. 

O lenei fa’alapotopotoga e  fou ma ua agaga i latou ina ia fa’amama avega i fanau uma e le o taulia talosaga i le Bell Grant poo le Financial Aid a le malo tele e totogia ai latou a’oa’oga i le Kolisi. O i latou na sa soifua ae i Samoa Tuto’atasi, Tonga, Fiti ma isi malo uma e le o se teritori poo se setete o Amerika.

O le tamaitai Faia’oga mai Tafuna lea e fa’aautu i ai lea Fa’alapotopotoga le tamaitai o Ms Christian Sa’alea, ma o le fa’amoemoe autu lava lea sa ia fa’atulaia ai lenei fa’alapotopotoga, ina ia tautuaina nei fanau i se fesoasoani tele e aoga mo le totogia o latou a’oga i le Kolisi Tuufa’atasi o Amerika Samoa.

O le Komiti Faafoe o le Fa’alapotopotoga o le Manu Mai Lagi, e matele lava i faia’oga uma i latou, ma o i latou nei latou te va’aia toto’a talosaga na fa’aulu mai, ma latou filifilia fo’i sui o le a agava’a mo le fesoasoani a le Manu Mai Lagi i lenei tausaga a’oga.

E 13 talsoaga na taua’aoina, ae to’afa o i latou nei ua agava’a ai. E ta’i $300. le tinoitupe ua taua’aoina atu mo nei fanau e to’a 4 ma sa faia le fa’atasiga i le DDW mo le taua’aoina aloaia o nei meaalofa fa’asikolasipi a i latou ua agava’a ai.

O tinoitupe nei ua taua’aoina mo nei fanau a’oga, sa tapena lava e le tamaitai faia’oga o Ms Sa’alea ma nisi o ana pa’aga o ni agelu agalelei lava ia te ia.

O i latou ua maua lenei fesoasoani tupe e totogia ai latou pili ua aofia ai: Merenita Setu; Jeannie Togiailau; Nellie Lisala; Rita Tuua

Ua mafai ona avea oe ma se tasi o le au agelu agalelei mo nisi fesoasoani i nisi o fanau o taumafai e totogia latou aoga ona e le o maua le fesoasoani a le Financial Aid, ua na’o na e fesoota’i lava i le latou tulau a le Manū Mai Lagi Foundation i le Facebook.

FA’ATUPEGA A LE OFISA O LE LOIA MO LE LAUTELE VAIVAI LE TAMAOAIGA & ISI

Ua fa’alauiloa ma le agaga fiafia ua toe fa’amanuiaina fo’i le Ofisa Loia mo le Mamalu Lautele, e aofia ai i latou e vaivai le tamaoaiga maua, ma ua le agava’a ai e totogia se loia e tula’i mo i latou i fa’amasinoga, poo le American Samoa Legal Aid, i le fa’atupega e $950,000.

O lea vaega tupe ua fa’atulaga mai ina ia mafai ona fesoasoani le Legal Aid e va’ai toto’a, suesue lelei, ma tali atu i amana’oga o nisi ua a’afia i le sauaga i totonu o aiga, ma nisi ua fa’ataumaoia i feusua’iga fa’aleituaiga. O lenei alagatupe ua toina mai lea i le Matagaluega o Fa’amasinoga a le Malo Tele - Ofisa o A’afiaga Tau Sauaga o so’o se ituaiga o a’afia ai Tina [OVW].

O le fa’atupega lea e ao ina fa’aaoga e sapaia ai polokalama e latou matua sofa’ia lea ituaiga o fa’afitauli i totonu o le atunuu, sauaga i totonu o aiga, sauaga i taimi o fa’amasaniga, sauaga tau fesusua’iga fa’aleituaiga, ma le fa’amataaitu. 

Ua alagatatau foi ona fa’aaogaina lenei vaega tupe e fa’atautaia ai fonotaga fa’aleaoaoga e aofia fa’atasi atu i ai ma sui fa’amalosi tulafono ina ia mautu lelei lo latou silafia o mea uma e ao ina fa’amalosia e i latou ma agava’a ai mo le fa’atupega lea.  O loo mafai foi ona fa’atautaia ao aoaoga fa’apitoa i tulaga o sauaga tau feusua’iga fa’aleituaiga, ina ia le ma pe fa’atalatuu le tagata ua a’afia mai lona fa’ao’o mai i le matagaluega o leoleo, o ni o latou omiga pe a’afia ai i latou.

“Ua matua ou fiafia tele ina ua maua mai lenei fo’i fa’atupega aoga tele mo le vasega o fa’alapotopotoga tumaoti mai tautua masani a le Malo,” o se tala lea a le tatou Faipule i le Konekeresi Uifa’atali Amata. 

“E ese mai le vaega tupe ua mae’a fa’ato’ai mai i le tatou malo i le vaiaso ua te’a, ae o lea foi ua tatou maua mai lea fa’atupega e toina lea i fa’alapotopotoga tumaoti, o lona uiga ua tatou savalia se ala tonu ma le sa’o lelei ina ia mafai ona galulue fa’atasi i tatou uma ma le atunuu i se taumafaiga ina ia taofia le so’ona sauaina o tina ma fanau i totonu o le mafutaga fa’aleaiga ma le atunuu atoa.” 

Avatu foi le fa’amalo a le tatou Faipule i le Konekeresi i le susuga le ta’ita’ifono o le Komiti Faafoe o le Legal Aid, Faipule Larry Sanitoa, ae maise le fa’atonu sli o Scott Hess ma nisi o le vasega o tagata faigaluega malosi a le OVW ina ia mafai ona fa’amatuu mai lenei fesoasoani tupe mo le teritori e fa’afo’ia ai lea fa’afitauli e tupu so’o i le atunuu.

Ua ia fa’afetaia foi le ali’i Loia sili Merrick Garland o le OVW ma le sui fa’atonu o le OVW Allison Randall mo lea fesoasoani aoga mo Amerika Samoa.

TOE TALIU UMA SEILA FEOA’I VA’A A SAMOA I LATOU GALUEGA I FAFO

I se ripoti mai Samoa - E to’a 30 i latou o Ali’iva’a poo Seila ua tu’ua Samoa ina ia fa’atasi atu i latou galuega i fafo, lea e feoa’i ai i latou o Ali’iva’a i Va’aoloa tetele.

O le vaega a le Samoa Shipping Services lea ua fai ma latou matafaioi le fa’aulu atu o latou Ali’iva’a ua pasia aoaoga faapitoa i le Marine College i Mulinuu ma o i latou foi nei sa mua’i avea ma ali’iva’a i va’a oloa tetele nei, a’o le’i sofa’i le lalolagi e le Covid-19. Na taliu mai i aiga se’ia mae’a le tetele o le fa’ama’i, ma ua toe fa’ailoa mai ua agava’a i latou e toe feoa’i aua ua mae’a tuiga o tui puipuia o le Covid-19.

O le SSS o le lala lea o le Malo e nafa ma le tele o latou va’a folau ma le fa’aauupegaina o latou seila uma ia agava’a mo feoa’iga i luga o le vasa, atoa ai ma le a’oa’oina o i latou i tomai e moomia mo nei faiva i le tai.

O le ali’i Pule Sili o le SSS, Lautimu’ia Uelese Va’ai, sa ia faailoa mai, “Ua mafai nei ona matou tuuina le 217 o seila i ni o latou avanoa e avea ai ma auva’a i nisi o va’a oloa tetele ma ua avea nei le 30 o i latou i lenei masina. O le isi vaega e fa’asolosolo atu lava mai le atunuu, ae ua i ai latou avanoa ua maua mai fafo.”

E to’a 191 i latou ua mae’a maua avanoa faigaluega i le vasega o va’a Meli Tetele ma le toa 26 o i latou ua maua avanoa i va’a oloa Freighters poo oloa fulisa.

Ua fa’ailoa fo’i e lea ta’ita’i, “Na amata mai ona taumafai lo’u Ofisa ina ia toe faafaigaluegaina le to’atele lea o Seila ia Iuni 2021 ma ua fa’afetaia lava ua mae’a maua galuega mo le to’a tele ua i ai nei i Kamupani Va’a i fafo, ae o lo’o fa’amoemoe atili le SSS ina ia mafai ona toe fa’afaigaluega le isi to’a 500 o Seila ae le’i mae’a le fa’aiuga o lenei tausaga.”