Ads by Google Ads by Google

TALA O LE LALOLAGI


[ata: foa'i]

Pago Pago, AMERIKA SAMOA

TOATELE AUFAIGALUEGA FOU A LE TAYLOR FARMS MAUA I LE COVID-19:

Ua fa’atuai la’ititi mai le aumalaga o toe soso’o mai a le Taylor Farms mai Amerika Samoa, ona o lo ua fa’ailoa mai nei, o le to’atele o sui na malaga mulimuli mai nei, ua maua nei i le Covid-19 ma ua le faigaluega ai i latou, e ua fa’anofovaava’aia mo togafitiga.

E le o se mea e fa’apopoleina ai le paia o aiga aua e malolosi lava i latou, ua mae’a fo’i ona faia o latou tui puipuia peita’i o le suiga o le tau i o latou tino ma ua malulu fo’i Washington, ua mafua ai ona maua i latou i le Influenza, ua vave fo’i ona pepesi solo atu ai ma le Covid-19 aua o auga lava e tasi. Ina ua faia suega, ua iloga mai ua maua le to’atele i le Covid-19 ma ua nonofo uma lava i latou i le faletalimalo o alaala ai, ma faanofova’ava’aia ai i latou.

“Ona o lea tulaga ua i ai nei le siitia o le fatau aofai o tagata ua maua i Uosigitone nei i le fa’ama’i Covid-19, o lea ua fa’atuai ai ona toe aumaia le isi 35 o sui ua manatu ina ia aumai vave i le fa’aiuga o lenei tausaga. Ia onosa’i mai pea lava i latou uma ua mae’a fa’aulu a latou talosaga. O lo’o i ai lava le mana’omia i le aufaigaluega, ae le mafai fo’i ona fa’atamala le Taylor Farms i le puipuigamalu o tatou tagata faigaluega uma lava, tuai ma tagata fou, ina ia le maua se tasi e maumau le soifua.” O se tala lea mai le sui fa’asalalau a le Taylor Farms Northwest. 

O le vasega o e na mua’i malaga mai a le Taylor Farms ua tofu nei ma fale mautotogi e nonofo lelei ai ma ua tofu ma potu i fale mautotogi ae tuufa’atasia fo’i latou saoga e nonofo ma totogi ai latou fale nofo. Peita’i o le  Faletalimalo lava a le Taylor Farms ua avanoa mo le aumalaga mulimuli lea na fa’ato’a fa’ato’ai mai.

Fa’ailoa fo’i e le tamaitai ua fa’amatua i ai tama’ita’i a lea Kamupani, “Ua sologa lelei lava le fa’asolo mai o siaki totogi ma ua lagona fo’i le fiafia e faigaluega, pe a oo ina oo mai fuainumera o siaki totogi e matua tetele le eseesega ma i tatou i si o tatou malo. Fa’afetai lava le tatalo mai o aiga ma e peie ia i matou uma, e leai lava ni fa’aletonu se’i vagana ai le tulaga e le’i masani lelei nai uso fou i le tau fo’i o le tatou setete nei.

ANGELA CHEN - MAUA LE AVANOA E TAUVA AI MO LE SIKOLASIPI A LE NATIONA MERIT SCHOLAR PROGRAM:

Ua maua mai se tali fiafia i le talosaga na fa’aulu a le tamaitai talavou o Angela Chen o le Pacific Horizon School i Tafuna, ua talia lana talosaga ina ia auai i le to’a 16,000 o fanau aoga o le a filifilia mai ai nisi e fa’atupe e le National Merit Scholarship Program, ma o le lona 67 ai lenei o tausaga talu ona mafai ona talosaga nisi o fanau fa’ai’uaso mai totonu o le Iunaite Setete atoa mo lea fa’atupega o latou aoga Kolisi ma Iunivesite e tausailia ai latou fa’ailoga maualuluga eseese lava.

O le tamaitai o Angela Chen o le alo e fa’asino ia Michell He ma Manua Chen ma ua aofia nei o ia i nisi o le a tauva mo se avanoa e mafai ai ona maua lea fa’atupega e sailia ai latou fa’ailoga maualuluga e afua i le afa tausaga aoga o le tausaga e 2022.

Ua fa’ailoa mai lea aotelega o le fanau e tauva mo nei fa’ailoga sikolasipi, o le aotelega o le fa’atupega e fa’aalu e le National Merit Scholar Program e $30miliona i le tausaga e tasi.

E tusa ma le 95% o le vasega o fanau ua talua mai le fa’aulu atu o latou talosaga i lenei fa’alapotopotoga e masani ona agavaa mo nei fa’atupega taua ma le tetele.

O le National Merit Scholar Program o se fa’alapotopotoga e le fa’atautaia e le Malo ae tumaoti i latou. O latou sui totino lea e tuufa’atasia lenei fa’atupega e e aofia ai ni fa’atulega e toina mai e le Malo mo fa’alapotopotoga e le fa’atautaia e le Malo, nisi o Kamupani tetele ma sa fa’atula’ia lea i le tausaga 1955 ina ia latou tagai toto’a le filifiliga o fanau pasi mai aoga maualuluga e agava’a mo nei fa’atupega.

Ua fa’ailoa mai o talosaga uma lava e va’ai toto’a i ai le komiti filifili a le NMSC e fa’aalu ai latou tupe na tuufa’atasia mo lea fa’amoemoe lelei, ma e silia ma le 400 kamupani o aofia fa’atasi i lea Fa’alapotopotoga tele, ua aofia fa’atasi atu ai ma isi Sosaiete tau A’oa’oga i le lisi o latou sui totino.

O le fa’amoemoe maualuga o le NMSP, ina ia matua mautu le faamoemoe o fanau ia tausailia tusi pasi maualuluga i a latou aoaoga o lo’o tausinio ai.

Fa’amalo i le taumafaiga a Angela Chen aua e tusa lava pe to’atasi le tatou sui, ae ua tusia fo’i Amerika Samoa i lea taumafaiga ua au a le tatou alo mai Pacific Horizon.

MASALOMIA SE ‘GANG’ I LE AVE FAAMALOSIA O NI FAIFEAUTALAI

O le aso ananafi na faailoa mai ai e leoleo I Port-Au-Prince, Haiti, lo latou masalomia o se faalapotopotoga (gang) I le ave faamalosia o ni faifeautalai Amerika se to’a 17, e aofia ai ni tamaiti se toalima, o le laititi e 2 tausaga.

Sa faailoa atu e le Taitai Leoleo o Frantz Champage I le vaega faasalalau o le Associated Press, o lenei faalapotopotoga e ta’ua I latou o le ‘400 Mawozo Gang’ ma sa latou ave faamalosia nei tagata lotu mai I se aai e I le itu I sasa’e mai I le aai tutotonu o Port-au-Prince. Ma sa tu’uaia foi I latou I le ave faamalosia o ni Patele se toalima ma taupou sa e to’alua, I le amataga o le tausaga nei.

O lo o ua ta’ua e faapea, e pulea faamalosi e lenei faalapotopotoga (gang) ia nisi o aai I totonu o Haiti, ma o latou ave faamalosia tagata, taavale ia ma faia uiga tau fa’amata’u I faipisinisi.

Na ta’ua e le ‘Christian Aid Ministeries’ I Ohio, Amerika, e to’a 16 tagatanu’u Amerika o lo’o aofia I le fuainumera o faifeau ua ave faamalosia e lenei faalapotopotoga I Haiti.  

O lo’o talosagaina e le Christian Aid Ministeries ni talosaga mo I latou ua a’afia I lenei faalavelave a’o aga’I atu I sa latou asiasiga I se nofoaga o iai ni tamaiti ua matua oti.

Ua fa’aalia mai le toe o’o foi o lenei atunu’u o Haiti I tulaga pagatia, I le pulea faamalosi e tagata tau fa’amata’u, talu ona fasiotia le peresetene o le atunu’u ia Iulai 7, 2021, faaopoopo atu ai ma le mafui’e malosi lea na fasiotia ai le silia ma le 2,200 o tagata Haiti ia Aokuso.

TETE’E E NISI O LO O MOLIA I LE OSOFAIA O LE LAUMUA O AMERIKA, IA LE FESOASOANI A LOIA

O nisi o I latou o lo’o molia I lo latou osofaia pe ulufale faamalosi I totonu o le nofoaga autu o le Malo o Amerika I Uosigitone ia Ianuari 6, 2021, ia lo latou te’ena o se fesoasoani mai I a latou loia, ae ua manatu I latou, o le a latou taumafai lava I latou e tali atu mo I latou lava, I luma o faamasinoga.

E pei o se alii mai I le setete o Niu Ioka, o lo’o mana’o e totogi mai o ia e le malo, ona o lo’o avea o ia ma ana lava loia.  O seisi tagata o lo’o molia I lenei solitulafono I Pennsylvania, o lo’o taumafai e tali atu I ona moliaga I luma o le faamasino.  Ae e iai foi seisi alii mai Niu Ioka sa taumafai e finau lava e ia lana lava matuapu I luma o le faamasinoga, ae e pei ua atili ai ona a’afia o ia I solitulafono.

O le aia tatau o se tagata, e na te tula’I ai lava o ia I luma o le faamasinoga e finau lana lava mataupu e aunoa ma se fesoasoani mai a se loia, o se mataupu faavae I totonu o le Faavae a Amerika.  Ae e pei ona ta’ua e se tasi o faamasino ua iloga ona tautua I totonu o fale faamasino, o ia o se vale, pe afai e manatu, o le a avea lava o ia ma ana loia.

Na ta’ua foi e se loia mai I New Orleans, e ui o lo’o faatagaina lenei tulaga I totonu o le Tulafono, ae e le o se faaiuga atamai lea tulaga.

E toalima nisi ua manatu o le a avea lava I latou ma loia ona o moliaga ua faasaga ia I latou, I la latou vaega sa faia I le aso 6 o Ianuari 2021, lea na auai ai I latou I le osofaiga o le Laumua I Uosigitone.