Ads by Google Ads by Google

TALA O LE LALOLAGI


Le tamaitai Samoa o Manufou Liaiga-Anoa’i ua sauni mo ona faiva i lenei fo’i tofiga fou ua seei ai mo le Asian Pacific Region. [ata: foa’i]

Pago Pago - AMERIKA SAMOA

 

TOFIA MANUFOU LIAIGA-ANOA’I - TOTINO KOMITI FA’AFOE, APAICS I KALEFONIA

 

Ua fiafia le agaga o se tasi o alo tamaitai o Amerika Samoa ina ia mae’a ane suaga a le va’atele, ua tofia o ia e avea ma se tasi o totino o le Komiti Fa’afoe o le Asian Pacific American Institute mo Suesuega i mataupu eseese a le Konekeresi.

 

O le aso o le ulua’i aso lea o lana nofoaiga, ma ua leai lava se tasi ua ia fa’afetaia, a’o le Silisiliese o le Atua ma avanoa ua fa’afaigaluegaina ai o ia, aua ua ia tula’i nei i lea Komiti Fa’afoe, e le faigofie ona nofoia e se tasi o sui mai le tatou atunuu la’ititi lona faitau aofai.

 

Ua ia fa’afetaia fo’i le tamaitai Fa’atonu SIli Madalene Mieke, le sui sa ia fa’atuina lona igoa mo lea avanoa taua, ina ia silafia le anoanoa’i o avanoa mo fesoasoani mi tagata o atumotu o le Pasefika ma atunuu o Asia o lo’o aiaia nei i totonu o le Konekeresi a le Malo tele o le Iunaite Setete o Amerika ma ona teritori.

 

E le gata i lea, ae ua fa’afetaia fo’i se isi avanoa muamua sa ia mauaina i le tausaa 2012 sa mua’i malaga ai o ia e fa’amasani i tiute fa’apenei a’o tula’i se tasi o tamaitai Kawen Young i lea tofi ua ia maua nei, ae na avatu ai ma ia e fa’amasani e fa’alogo i fonotaga ma feutaga’iga fai a le Komiti Fa’afoe lenei ma sui mamalu o le Konekeresi, ae maise i le Komiti Fa’afoe a le Konekeresi i mataupu e taua ma aoga mo Asia ma malo fa’aatumotu o le pasefika. 

 

“O lenei avanoa ua ou maua tonu lava, ae ua oo mai fo’i le vala’au a le Atua e malolo lenei tamaitai taua i lou olaga, tau ina ia ou gafatia ona fa’atautaia galuega sa e agaga i ai, ma si’itia atili taumafaiga ia agava’a malo o Asia ma Malo fa’aatumotu o le Pasefika i alamanuia e mafai ai ona fa’aleleia atili latou atina’e ma pulega o latou malo fa’alotoifale. E le galo lou sogasoga i mea lelei ma taumafaiga e auau i le tatou sone i Asia ma le Pasefika,” o sana fa’afetaia lea ua mafai ona fa’auia mai e ala i le taumafaiga ua ia tula’i ai nei.

 

Ua naunau lona agaga o se sui fou i le nofoa ma le Komiti Fa’afoe ina ia maua le avanoa e ta’ita’i uma lava o atumotu o le Pasefika ina ia talanoaina ai ma aiaia nisi o alamanuia e mafai ona faaleleia ai galuega atina’e mo latou faigamalo fa’aatumotu, aemaise lava, “O le a ou taumafai atili ia iloa uma e lo’u sui feuiuiaiga o tautua eseese, ona aiaiga ia le solituina i so’o se taimi.”

 

“O fesoasoani o lo’o ofoina mai e le APAICS e iloga ona tele, ma o le a va’ai toto’a i ai ma le fa’amoemoe e mafai ona agava’a ai o tatou tagata, ma e fa’afetaia le galuega faifaipea a tatou ta’ita’i o lo ua mae’a fa’auia atu le tele o nei fo’i ituaiga o tautua ma ua faapea fo’i ona taumafai atu lo outou sui fa’atauva’a ua tula’i nei, ia le mapu ona feso’ota’i mai, ina ia fetufa’i ma iloa atu mana’oga tupito i o tatou lotoifale i tatou atumotu,” o se tala lea a le tamaitai o Manufou Liaiga-Anoai.

 

Liaiga-Anoa’i o se tasi o tama fanau a Samoa sa soifua a’e i San Francisco, sui muamua o le augatupulaga a lona aiga ua soifua a’e i eleele o Amerika. I le taimi nei o lo’o avea o ia ma totino o le Komiti Fa’afoe o le Jefferson Elementary School i Daly City, ma o le fa’atolu ai lenei o tula’i o ia i lena tofi.

 

Ese mai lea o lo’o avea fo’i o ia ma Komesina o le A’ai o Daly City Personnel Board, San Mateo County Arts Commission - o le sui tofia mo le District 5. O ia fo’i o le Totino o le Pacific Islanders Encouraging Fun, Engineering, Science & Technology. O le Totino fo’i o le Komiti o le Regional Pacific Islander Health Task Force ma o lo’o sasao fo’i i le Komiti Fa’afoe a le REACH mo San Maeo County.

 

Talu mai le 10 tausaga ua te’a, o lo’o tula’i lava o ia o le Komesina o le San Mateo County ma sa avea ma le Peresetene o le Komisi mo Mataupu a Tina i tausaga ua mavae. Na se’ei fo’i o le Komesina o e A’ai o Daly City Arts & Culture Commission mo le tamaitai Sui i le Konekeresi o Jackie Speier’s e latou te va’aia toto’a mataupu tau le Asian Pacific Islander Caucus. 

 

O lo ua fa’ato’a tula’i lava le tamaitai o Li’aiga Anoa’i i lona nofoa o le Sui Peresetene mo Aoga uma a le Setete o San Jose. Sa mua’i avea o ia ma Taitai mataalia o le Head Start Program mo ECE uma i San Mateo County.

 

Ua iloga e tele tautua a lenei tina e feso’ota’i ai ma tagatanuu uma o atumotu o lo ua aumau fa’atasi nei i lea itumalo o Daly City ma San Mateo, ma ua iloga ai, e aoga sana fa’asoa i mataupu e aoga mo tagata o atumotu ma malo o Asia i le pasefika.

 

FAUTUAINA KOMITI FA’AFOE COVID-19 - GALULUE & FEUTAGA’I ALA FA’ALELEIA ATILI LE GALUEGA

 

I se pepa o fa’amatalaga mai le Komiti Fa’afoe o le COVID-19 a le malo, ua fa’ailoa ai saunoaga a le afioga i le kovana sili, Lemau PS Mauga i le fonotaga a le komiti, “Ia tatou fa’aauau ona faia a’ia’i le galuega o le puipuiga o le atunuu mai lenei fa’amai ia le ofi mai lava i Amerika Samoa. Aua le fa’avaivai e ui ina tele lu’iga ua atagia mai e le fa’apuupuuina le taumafaiga, ae ua tele na’ua le tupe ua fa’aalu e le Malo ina ia mautu le puipuigamalu o le tatou malo ma ona tagata.”

 

Ua saunoa fo’i o ia e fa’ailoa atu i sui mamalu o lea Komiti Fa’afoe, “O le tatalaina o femalaga’iga ia Setema ma lu’iga ua tatou matauina e oo mai, fa’atasi ai ma le ave’esea o le nofova’ava’aia i Honolulu ae fa’aaoga mai le tatou TalofaPass mo e malaga mai i fanua ma aiga o le atunuu, o lo’o ua taugata lava, ae o le tatou galuega o le fa’ataunuu ma le fa’amaoni o tatou galuega uma, ia le ofi mai lava lenei fa’ama’i faigata i o tatou lotoifale.”

 

O le isi fa’amoemoe ua i ai nei o le malo, o le fa’aauau ona fa’atula’ia pea polokalama na mua’i talanoaina e fa’aaoga i taimi e lutia ai le atunuu i ni fa’ama’i pepesi ae maise lava i le fa’atautaiga pea o a’oga a le fanau ae le o mai i le a’oga, peita’i e fa’aaoga le tekonolosi fou i masini e fa’atautaia ai a’oa’oga i laina feso’ota’i o initeneti ma upega tafailagi.

 

O le malaga e to’a 278 ua mafai ona malaga mai Hawaii i Amerika Samoa ia Oketopa 14, 2021 ua fa’ailoa e Dr Elizabeth Lauvao, “O se malaga sili lea ona to’atele ua tulaueleele mai ma e ao ina fa’anofova’ava’aia uma i nofoaga e tolu, Tradewinds, Sadies by the Sea ma Fatuoaiga. Ua aofia ai ma le aumalaga ua fa’anofo vaava’aia fo’i ma le auave pasi latou aua o i latou na o lo’o muamua lava ona tau mai i ai le aumalaga ma tautuaina i latou.

 

O lo ua mua’i faia latou tuiga i le aso Sa ma le s Gafua lea na maua ane ai le to’atasi lava o le au pasese ua maua fo’i e fa’amaonia lana suega o maua i le Covid-19 ma ua fa’ase’e atu fo’i lea sui ma isi uma na feso’ota’i ma ia i le nofoaga fa’apitoa mo le fa’anofoesea mo suesuega atili a le Covid-19