Ads by Google Ads by Google

Tala o le Lalolagi


Le Ipu mulimuli ua manumalo ai le alii talavou e tupuga mai matua Amerika Samoa ma le Tama o le Tonga, Milton “Tony” Pouha Finau, lua ai lea o Ipu ua ia mauaina i le lima tausaa o ta’amilosaga Tapolo Fa’apolofesa ua ta’alo ai. Malo le tauata’i, malo le fa’aeaea. [ata: foa’i]

MILTON POUHA “TONY” FINAU - LAUILOA I LE TA’ALOGA TAPOLO FA’APOLOFESA UTAH & USA:

 

O Tony Milton Pouha Finau, o se alo e tupuga mai i matua o le Samoa ma le tama Tonga. Na malaga mai i Utah matua a’o alaala tumau i Amerika Samoa, ma o le tatou Ekalesia a Iesu Keriso o le Au Pa’ia o Aso e Gata Ai. Peita’i na soifua a’e Tony Finau ma lona uso matua o Gipper Finau i Utah, e fiafia uma i le Ta’aloga Tapolo, sa aoaoina ai a’o amata mai la’ua aoaoga. O Tony na soifua mai i ona matua ia Setema 14, 1989 ma ua lisia  Tony Finau o le ulua’i atalii lea e tupuga mai i Samoa ma Tonga ua ta’alo fa’atauva i le PGA Tour poo tagata ta’a’alo Tapolo Fa’apolofesa.

 

Na muamua maua le avanoa o Gappie Finau e ulufale ai i le tauvaga e mafai ai ona Tapolo Fa’apolofesa a’o 16 ona tausaga, peita’i e le’i ausia e ia lena fa’amoemoe. Ina ua maua le avanoa o Tony Finau e ulufale ai i le Ta’amilosaga Tapolo e mafai ai ona ta’alo tapolo fa’apolofesa na suipi e ia lena avanoa, ma ua amata ai loa ona tauva fa’apolofesa o ia i le atoaga o lona 17 tausaga.

 

I le amataga o le tausaga lenei 2021 na tulaga fa ai Finau i ta’amilosaga tapolo uma lava sa ia ulufale ma tauva ai. Tulaga fa o ia i le The American Express, tutusa i le tulaga lua i le ta’amilosaga Tapolo a le Farmers Insurance Open, tutusa fo’i i le tulaga lua i le Ta’amilosaga Tapolo a le Saudi International i le malaga ta’amilo i le Atu Europa, ae na toe lusi lava lona tulaga muamua ia Max Homa i le Ta’amilosaga Tapolo a le Genesis Invitational i Riviera Country Club i le Pacific Pallisades, Kalefornia. Na manumalo o ia i le Ipu o le 2021 The Northern Trust ina ua ia malo ia Cameron Smith i le la’ua playoff.

 

O lona uiga ua lua ai Ipu ua umia e Tony i le lima tausaga o lona soifua tauva i le Tapolo Fa’apolofesa, o se matati’a maualuga lea ua maua e se tasi o tama polenisia toe talavou.

 

E le na’o le pau lea o le ta’aloga e fiafia i ai Tony. E fiafia fo’i i le Basketball, peita’i ua ia filifilia le Tapolo e avea ma ta’aloga e fa’atauva ai, aua e na’o ia lava ma le kalapu e sailia lona manumalo, ma e le to’atele fo’i nisi olona atunuu ua iloga ai se latou taumafaiga.

 

I le taimi nei o lo’o ua i ai fo’i le Fa’alapotopotoga o le Tony Finau Foundation o lo ua galulue malosi ina ia a’oa’oina le fanauiti ia iloa lelei ona ta’a’alo i lea fa’agatama, ma e sailia ai nisi e lelei fo’i aua le fa’aauauga o taumafaiga i le lumana’i, ma ia sili atu se taumafaiga a se tasi nai lo se mea ua oo i ai o ia i lenei vaitau.

 

Ua fa’aipoipo lea alo o Amerika Samoa ma Tonga ia Alayna Finau ma ua to’afa o la’ua alo, lea lava e fa’amautu i Utah, peita’i o lo’o ua fa’aauau pea ona tauva o ia i le Ta’amilosaga Tapolo Fa’apolofesa a le PGA Tour.

 

Ia Tesema o le 2019 na ta’alo ai Tony i se tasi o Au Tapolo a Amerika mo le 2019 President’s Cup i Royal Melbourne Golf Club i Ausetalia, ma sa manumalo lea ‘au a Amerika. 

 

I le 2020 na fa’ato’a lusi ai lava Finau i le Ipu o le Ta’amilosaga Tapolo a le Waste Management Phoenix Open ina ua fa’atauva ma Webb Simpson. O Finau na muamua lava o ia i pu e lua mai le amataga o le fetauiga lea se’ia oo ina lusi ia Webb i ana birdie e lua mai le amataga. Na maua Birdie e lua a Simpson i pu mulimuli e lua o lea ta’amilosaga, ma faia ai loa le la’ua playoff.

 

 

FA'ATAUTO LOIA SILI FOU A SAMOA - SU'A HELLENE WALLWORK

 

Ua maea fa’atautoina  e le Ao Mamalu o le malo o Samoa, le tamaitai Loia Sili fou a le Malo o Samoa, Su’a Hellene Wallwork ma ua fa’ailoa mai e ia le agaga fiafia tele o le latou Ofisa, ma talia leleia o ia, ina ua mafuta atu i lona ofisa mo le ulua’i taimi, o le Loia Sili a le Malo.

 

“Ese le talia fiafia o a’u,” o sana tala fiafia lea i lana emeli fa’alauiloa ai lona tofiga fou ua alofaiva ai nei tautua i le Malo o Samoa e afua ia Setema 08, 2021. Na tofia ma faamauina lona avea ma Loia Sili i le aso 4 Setema, 2021 ma ua ia suia nei le tamaitai loia sa tula’i mai ai i le nofoaiga a le Malo o Samoa ua tuana’i, Savaleanoa Mareva Betham- Annadale, lea fo’i na fa’ate’a e le afioga Palemia Fiame Naomi Mata’afa ia Setema 02, 2021.

 

“Ua ou iloa le tele o mea na tutupu, ma e le faigofie fo’i le galuega i le taimi nei ona o ia mea, ae o le a mafai ona matou faia le galuega i le tonu ma le sa’o, aua ou te fa’amoemoe i le lagolagosua mai a le matou aufaigaluega , ona mafai ona lea  fa’afaigofie mea uma,” o sana tala lea. 

 

“O le galuega e tatau lava ona faia i taimi uma, o le fautuaina lea o le faigamalo, i soo se taimi e tatau ona manino lena tulaga, ma ia le fa’atalatuu i lona faiva lena i taimi uma.”

 

I le saunoaga a le tamaitai Palemia Fiame Naomi, sa ia toe fa’amanno atu, “O lou tiute o lou fautua mai i le faiga o fa’ai’uga e fa’atautaia agai i ai le malo, ia gatusa ma tulafono ua maea pasia e fa’atautaia ai galuega a le Malo aua le atunuu, ia tautuaina le atunuu i ala tonu.”

 

Ua ia fa’ailoa fo’i e Fiame Naomi, “Ua mautalitonuina le agava’a o Su’a Hellene e na te fautuaina ai fa’aletulafono le faigamalo, ma lona fo’i lea tomai o le a fa’afoea ai le folauga a le atunuu ma lana faigamalo i le taimi nei, ia le sapasui ma fefa’asalaveia’i  tiute ma galuega a tagata uma, ae ia aluga lelei le fa’atinoga o tiute patino ina faiva ua tofia ai.”

 

Fa’aalia e Su’a Hellene, “Ou te fa’atauaina le fa’apa’iaga ma le fa’atautoga o a’u e le Ao Mamalu o le Malo, Tuimalealiifano V. Sualavi ll, ma e fa’afetaia fo’i le a’oa’iga a Matua Paul Wallwork ma le Tina o le Aiga, aua e le mapu ona fa’amanatu mai le aoga o le fa’amaoni ma le fai le mea sa’o i taimi uma. O le galuega faifaipea a Matua le a’oa’iga, ma le fa’amanatu mai i taimi uma, lea ua mafua ai le aso.”

 

O le sauniga mamalu o le faapa’iaga o le Tofi i Samoa.

 

O le tamaitai Loia Sili e le fou i le Ofisa o le Loia Sili a fa’auluulu nei ia te ia, na muamua lava faigaluega ai o ia ina ua mae’a pasia mai lona tusi fa’aloia mai Niu SIla, ae le’i toe taliu i Niu Sila e galue ai ma nofo ai.

 

Na toe taliu mai i le tausaga e 2013 ma la’ua fa’atuina ma lona to’alua le Ofisa Loia o le Wallwork & Lamb Law Firm. O le taimi nei o lo’o avea o ia ma le Peresetene o le Asosi a Loia i Samoa, ma ua ia taua’aoina atu nei lea tofiga taua i lona sui Peresetene na te tau’avea ae se’i fa’aalu uma lona taimi i le tofiga fou ua fa’ae’e mai ia te ia e galue ai.