Pago Pago - AMERIKA SAMOA

SUA ELEELE FAUSIA MALUMALU SA - EKALESIA A IESU O LE AU PA’IA O ASO E GATA AI

O le aso Toona’i na tino ai le moemitiga a le mamalu lautele o le atunuu ua avea ma totino o le Ekalesia a Iesu o le Au Pa’ia o Aso e Gata Ai, aua ua leva ona latou talutalu ma iluilu i se aso e fa’atuina ai le latou lava Malumalu Sa i o latou eleele i Pago Pago, Amerika Samoa.

Na potopoto le to’atele, e afua mai e mautofi i le Ekalesia se’ia oo lava i le fanauiti mo lea fa’amoemoe i Ottoville Stake Center, aua o iina sa saunia ai le sauniga mamalu o le fa’afetai ma le agaga fiafia ona ua taunuu se faamoemoega, o le la’au o le soifua lea.

Peita’i mo le suaina lava o le eleele ma lea sauniga mamalu na fa’atautaia, sa aofia i ai sui iloga sa vala’aulia fa’apitoa mai le Malo i lona Taiao, Kovana Lemanu P. S. Mauga ma le faletua Ella Mauga, Peresetene o le Senate Tuaolo Manaia Eti Fruean ma le Faletua Fiapa’ipa’i Fruean, Fofoga Fetalai o le Maota Savali Talavou Ale ma le Faletua Beauty Ale, le Sui Mamalu o le Ofisa Autu o le Faipule i le Konekeresi Uifa’atali Aumua Amata, le afioga Pulu Ae Ae Jr. fa’apea fo’i le mamalu lautele o taitai o isi uma Ekalesia eseese i le atunuu.

O le susuga Elder Brett Nattress, le Taitai o le Au Peresetene o le Pasefika sa ia ta’ita’ia le sauniga mamalu i totonu o le Malumalu Tapua’i i Ottoville Stake Center, e fa’afetaia ma talosia fa’apitoa ai le galuega lenei o le a amatalia, lea ua fa’atino i le suaina o le eleele pe a mae’a le sauniga mamalu.

O le susuga Elder Fa’apito Auapa’au, sui o le Area 70, sa ia fa’atautaia lea vaega o le sauniga. Sa ia fa’ailoa le aoga tele o lenei galuega tele i le vasega o talavou i totonu o le atunuu, ma sa tapena fo’i le tamaitai o Joalin Young avea ma se tasi sa molimau fa’apitoa i le aoga ia te ia o lenei malumalu.

Sa faailoa mai e Joalin, “Ou te naunau ina ia mafai e lou tama, lea e le’i avea ma se totino o le tatou Ekalesia nei, ona papatisoina i lenei malumalu, ia mafai ai ona fa’amauina fa’atasi i matou i lenei malumalu i se aso o fotua’i mai.”

O le susuga Vaitinasa Dr. Salu Hunkin sa avea ma sui e na te folasia le tala fa’asolopito o le Ekalesia a Iesu o le Au Pa’ia o Aso e Gata Ai i Amerika Samoa.

Na afua mai lana talatala i le taimi na to’ai taunuu ai misionare i le motu o Aunuu i le tausaga e 1863 e oo mai lava i le aso. I le taimi nei ua atoa le 16,490 totino o lea Ekalesia e tusa lea ma le 49% o le faitau aofai o le atunuu atoa.

O Elder Vince Haleck, se tasi o sui mamalu o le Ekalesia, “Emeritus General Authority,” sa ia saunoa fa’apitoa i le latou faanoanoaga tele i le 40 tausaga talu ai, sa liua ai le fa’aiuga mai le Ofisa Autu i Utah, ina ia suia le nofoaga e fa’atuina ai le Malumalu Sa mo le Atu Samoa, ia fa’atuina lea i Pesega Samoa, ma emalaga uma atu i tatou i Samoa i tatou sauniga uma e tatau ona faia i le Malumalu. 

“Ua fa’ailoa lava le agaga o tatou tagata ma lo tatou soifua faatuatua, aua sa faia lava ma le manatu maualuga, e i ai le aso faapenei, e tatou tatalaina ai se galuega i o tatou eleele e fa’atuina ai se Malumalu Sa mo tatou tagatanuu e tapua’i ai. Fa’afetaia le Atua ina ua tatou oo mai i lenei aso fa’amau fa’ailogaina o le a amatalia le fausaga o le tatou Malumalu Sa.”

O le saunoaga faapitoa a Elder Brett Nattress sa ia fa’ailoa mai ai, “O le amatalia o lenei galuega, ua fa’amauina ai, ua fa’ao’o mai ma le manuia le polomisi a le Alii i ona tagata.”

O sui mamalu uma o le Malo ma sui mamalu o le Ekalesia a Iesu o le Au Pa’iao Aso E Gata Ai, e oo lava i sui o le tupulaga talavou, sa latou suaina le eleele mo le galuega i lea aso ina ua mae’a le sauniga i totonu o le malumalu.

O le nofoaga mo lea malumalu o le eleele o loo sosoo lava ma le eleele o le Ottoville Stake Center i Ottoville. Ua fausia le galuega lenei e le Westland Construction mai Utah. Ma ua fa’ailoa mai e na’o le tolu tausaga o le a fausia ai, ae tatalaina loa.

MOOMIA FESOASOANI FESOOTAI MA LE PROGRESSIVE INISIUA:

Talu mai le masina o Oketopa ua i ai nisi ua fa’ailoa mai, ua fiu e tausailia se sootaga ma le latou Kamupani Inisiua o le Progressive. I le taimi nei e oo lava i le aso Gafua na te’a nei ua tapunia le latou Ofisa autu i Fagatogo Square i le taulaga. 

E ui ina ua mae’a fa’apipi’ia ai le faitoto’a se fa’aaliga ua tapunia le latou Ofisa, ae ua leai se numera telefoni e tusia mai ai i le fa’aaliga, e fa’afesootaia ai se tasi mo ni fa’afesili.

Ua mae’a silafia e nisi o le mamalu lautele fa’asalalauga mai Samoa ua tapunia aloa’ia le pisinisi inisiua lava lenei a le Progressive ona ua gau. Ua le toe gafatia ona fa’atautaia latou tautua masani i le atunuu, peitai e le’i i ai se fa’asalalauga o lea ituaiga ua faia e le lala i Amerika Samoa nei.

I le taimi nei, ua fa’ailoa atu i le mamalu o e uma e fia fa’amauina ni a latou fa’asea e fa’asaga i lea kamupani Inisiua, e maua le avanoa lelei lava e faila ai nei fa’asea i le Ofisa o le Komesina o Inisiua, lea ua tula’i ai le susuga Ben Te’o, i le Ofisa o le Kovana Sili o Amerika Samoa.

O le tiute o lea Komesina o Inisiua, na te siakia le agava’a o i ai i Kamupani Inisiua o so’o se ituaiga i lea tausaga ma le tausaga e fa’afouina ai latou laisene e fa’afoea ai latou tautua i le atunuu. 

O le Progressive o lo’o nafa ma le tautua, e Inisiua ai ta’avale o femalaga’i ai le atunuu ma la’u latou pasese ma uta i totonu o le atunuu.

E mautinoa, pe afai ua leai se numera telefoni feavea’i o lisia maia i le fa’aaliga fa’alaua’itele ua fa’apipi’ia i le Ofisa autu o le Progressive Insurance, o lona uiga ua fa’ailoa mai ai iina ua faigata ona toe fa’aauauina a latou tautua e pei ona masani ai.

O le susuga Ben Teo o se tasi sa avea ma faia’oga, soso’o ai ma le Pule A’oga i aoga a le Malo, ma o ia fo’i o le Peresetene o le Common Cause, o le sosaiete e va’ava’aia toto’a galuega a le Malo pe o tusa ma ala o le tulafono ma latou feso’ota’i mai ma tagata lautele e tusa o ni lape i le tautua poo le fa’atautaiga o galuega a le malo.