Pago Pago - AMERIKA SAMOA

A’OA’OGA FA’APITOA FESOASOANI I AUFAIGALUEGA MASII MAI - LEND A HAND

E le gata i le tele o isi ala ua fesoasoani ane ai le Lend a Hand e fa’aleleia atoa le masi’i mai o tagata faigaluega fou mai le tatou atunuu pele e faigaluega iinei, ae ua latou si’itia fo’i le fua lea, ma ua toe faliu e fesoasoani atili i le taumafaiga e fa’afaigofie ia i latou le suiga o le soifuaga ua ola ai nei, mai le mea sa soifua a’e ai i le tatou atunuu.

“E moni e leai se tasi e vaivai o sui uma o malaga mai, ae le o mea uma e faigofie ona fai, i lou taunuu mai, maua le aoaoga e faigaluega fa’apitoa ai, ma feso’ota’i ma aiga iina ma mana’oga faivavale e tatau ona fa’aoo atu. O mea ia e aoga ai, ona fa’asoa atu nisi sa muamai i le vasega fa’ato’a fa’ato’ai mai,” o se tala a se tasi o sui ua fili fa’apitoa mo fetufa’iga ma nai tagata fou fa’ato’a amata faigaluega iinei, ona o nei avanoa le ‘au maua ua latou fa’atumuina i le Taylor Farms Northwest.

Ina ia maua a’ia’i le fesoasoani, sa muamua lava oo ane le Lend a Hand tufatufa atu nisi o mea e sili ona mo’omia vave, e ala i lavalava mafanafana ma ofu fa’atimu e tatau ona fa’aaogaina e i latou i galuega, ma le ola ai fo’i i atunuu malulu. Lona lua ua taumafai ona latou faia se auaunaga e maua ai telefoni fou mo i latou aua feso’ota’iga ma aiga i Samoa.

O le tele o sapalai o se’evae ma totini ua taua’aoina fo’i, aua e le’i maua ni totogi o lea fa’ato’a tau amata galulue. Ae peita’i o le toe oo ane ma le ituaiga a’oa’oga fa’afaufautua ma lagolagosua i ituaiga fesoasoani mo le silafia ona soifua iinei, saili se fale e nofomau ai, fa’amautu lelei mea e mo’omia ona fa’atino aua le agai i luma o le nonofo ma le faigaluega fa’atasi i le Kamupani lenei, o le isi lea ala e tatau lava ona fesoasoani ai.

“O a’oa’oga ma fonotaga fa’apitoa nei, e mo’omia lava. Ua iloga ua i ai nisi o fa’afitauli ona o tala fe’avea’i. Ua amata ona maua nei ituaiga o mea, aua ua soifua feso’ota’i nei i le galuega, ae sa le masani ai, o le natura lea o le soifua feso’ota’i. E eseese taofi o tagata uma, e tele fo’i fete’ena’iga. O lona uiga a le mausali le fa’apalepale ma le mautinoa ona taofi mau o le afuaga na e malaga mai ai, e atili fa’atupua’ia fete’ena’iga nei.”

“O ituaiga ala nei e fetufa’i ai tagata e to’atele ma fa’aalia taofi, ae fesoasoani mai sui ua fa’aauupegaina i tomai tau feso’ota’iga fa’aletagata ma le tasi, poo Social Workers, ina ia fa’aititia ona fa’ataua o tala sala tua, ae ave le fa’amuamua a’ia’i, i le mafuaga na e sau ai,” o se isi lea fa’apupulaga atili o le ituaiga o fonotaga fa’aleaoaoga ua faia.

“Ua matua fa’afetaia lenei avanoa ua maua e le Lend a Hand e avea ai i latou o se vaega fa’afaufautua mo le aufaigaluega fou, o uso ma tuagane fa’apea ni matua o malaga mai ai ona o se avanoa lelei e tau sailia ai le tamaoaiga tausi i nei fo’i atunuu,” o se toe tala lea a le tamaitai e fa’auluulu i ai le Lend a Hand, Fiapia Tasi Taito.

AUAI URSULA TE’O MARTIN FA’AALIGA TINO LELEI - FA’AALIGA FA’APOLOFESA 2022

O lo’o fa’aauau pea lava taumafaiga uma a le alo o Amerika Samoa, Ursula Aiono Fitimale’afa Te’o - Martin, lea o lo’o tapena mo le fa’aaliga tele i le 2022 i Las Vegas lava. O ana tapenaga uma nei, e mautu ai sona avanoa e tauva ai fa’avaomalo i le Olimipeka o lumana’i nei.

Ia novema 05, 2021 na fa’ataunuu ai se tasi o fa’aaliga, e le mo ni pine, ae toe fa’aalia tino lelei uma ua tapena atu mo le fa’aaliga tele i le 2022, ma e fiafia tele e fa’ailoa atu, ua mae’a maua ai le avanoa o Ursula Martin, e na’o le to’alua o i la’ua na fa’aalia la tino lelei, e auai atu i nisi o le a fa’aalia fa’apolofesa latou tino i le tausaga fou. O le fa’aaliga foi lea o le a faia lava i Las Vegas, ae o le fa’aaliga lea ua agava’a mai ai Ursula sa fa’atautaia lea e le au si’isi’i ma le tino lelei o kolenia fa’apitoa i Las Vegas lava.

O le fa’aaliga lea sa fa’atautaia i le fa’aiuga o le vaiaso na te’a nei o le NPC Steve Karr. O le ituaiga faaaliga sa fa’atautaia o le CFigure&45+ Figure Division.

“O lenei taumafaiga, e le o maua ai se pine, ae o le fa’amautinoa atili o lo’u avanoa e auai ai i le Fa’aaliga Fa’apolofesa i le 2022. Fa’afetai o lo’o ausia lava ona fa’amautu lo’u avanoa mo lea tauvaga i le 2022. Fa’afetai tele mo le tapua’iga a si o’u aiga i Las Vegas nei, ae ia tatalo mai mo le fa’amoemoe, lou nuu pele o Faleniu ma le atunuu ua taumafai e fa’alauiloa atili i se taumafaiga, e le mo se vi’iga, ae o se ala e tautua ai.”

Ua saunoa Ursula e tusa o se ala e tautua ai, ua ia fa’ailoa mai fo’i ua se’e ane ia te ia le mamalu o le suafa o le aiga o lona tama i Faleniu, ua avea ai o ia o se matai i lona aiga, Aiono Ursula Fitimaleafa Te’o-Martin.

Lona lua, ua ia la’eia le la’ei Samoa Moni, le Malofie a Tamaitai ma ua ia fa’ailoa mai, “O lo’u la’eia ai o le malofie a tamaitai Samoa, ua avea ma isi ala ou te tautua atu ai i lo’u aiga ae maise Samoa atoa, aua o lo ua fa’aalia ai sa’u taumafaiga vaivai. I lea fo’i fa’agatama, e umi se taimi e taumafai ai ona atoatoa le tino lelei o lo’o mo’omia ona fa’aalia ma le tausa’afia. Atonu e fou lea taumafaiga mo le vasega o tamaitai, ae o se mea fo’i ua loto ina ia faia, afai ae tini taunuu i se fa’aeaga o Samoa i le lalolagi atoa, o se fa’amoemoega ua sili ona talileleia lea mai le fa’amanuia mai i ai o le Atua. E moomia lava e le tou afafine ona outou tapua’ia nei faiva, ma le agaga fa’afetai e talia ai a outou fa’amanuiaga.”

O Ursula o se tasi fo’i o Vetereni, sa tautua o ia i le vaega au fa’atasi ma lona to’alua, ma sa maliu ai lona to’alua ina ua fanaina le latou Helicopter sa auina atu ai i latou mo se latou misiona fa’anana. 

Ua aumau ai pea o ia i Las Vegas i le taimi nei, ma fa’aauau ai ana koleniga. O se taimi lata mai o le a mafai ai ona fa’aalia nisi o ana koleniga ma masini o lo’o ua faaaogaina e ia i aso ta’itasi mo le faamoemoe ia taunuu ma le manuia.

Mai lea fa’aaliga sa faia i le afiafi o Novema 05, 2021, e to’alua ia te ia sui ua siitia atu nei i sui fa’apitoa mo le fa’aaliga fa’apolofesa lea o le a faia i le tausaga fou, o iina o le a maua ai se avanoa mo ia tauva ai i le Olimipeka o soso’o ai. 

“Ou te fa’afetaia le tapua’iga a lo’u nu’u ma o’u aiga atoa, se’ia oo lava i le mamalu o le atunuu pele o Samoa na lua, tau ina alofagia e le Atua lenei taumafaiga, o se sao e ta’uleleia ai fo’i si o tatou atunuu pele. Ia manuia,” sana toe tala lea.