Ads by Google Ads by Google

TALA O LE LALOLAGI


O se tasi o nofoaga na fa’atasi uma i ai le vasega fa’aiuaso 1986 a Samoana High School, i latou na mafai ona fa’atasi mo le atoaga o le 35 tausaga talu ona fa’au’u mai i latou i lea Laumua, o le matamata lea i le ta’aloga sa faia i le Malae o le Raiders i Las Vegas. [ata foa’i]

Nisi o tama ma teine tuai a le vasega fa’aiuaso 1986 ua fa’atasia, ae le’i atoatoa atu lea o aumalaga mamao na fa’atasi atu i lea fa’amoemoe. Ua aofia fo’i i nisi o nei ata aiga o nisi o sui fa’au’u mai lea vasega. [ata: foa’i]

Pago Pago - AMERIKA SAMOA

 

FA’ATASIGA VASEGA FA’AIUASO 1986 AOGA MAUALUGA SAMOANA - LAS VEGAS

 

O le fa’atasiga lona 4 lenei ua fa’ataunuu talu mai le 35 tausaga talu ona fa’au’u le vasega o le 1986 mai le aoga maualuga a Samoana. O lea fa’amoemoe na fa’ataunuuina lea i le a’ai o Las Vegas i le fa’aiuga o le vaiaso na te’a nei, Novema 11 se’ia oo ia Novema 15, 2021.

 

O lea fa’amoemoe na toe suia le nofoaga sa manatu e faia ai, ona o le fa’asa o le covid-19, lea ua tuu mai ai le latou mafutaga e faia i Las Vegas, ae o le nofoaga muamua sa tuupoina o le a’ai matagofie o Honolulu.

 

O le Komiti fa’afoe mo lea fa’amoemoe o lo’o aofia ai le faletua o Ianeta Totemese Mageo, Laumatafiafia Rosetter, le Faifeau Vaioa Leau, Iloilo Sua’ava, Rocky Cho,  Alex Forsyth, Eddie Moana ma Kalasa Tupuola. O i latou na sa latou tautiga ina ia mafai ona fa’ataunuu lenei mafutaga, ma ua latou toe suia fo’i le nofoaga ina ua tetele na’ua mea e fa’asa i Honolulu i lenei vaitau.

 

O i latou la na fa’atulagaina le fa’atasiga i soo se setete o Amerika ua tula’i mai ai nisi iloga fo’i o le vasega  ua mae’a filifilia nei, ua avea ai Pauline Fautanu-Fiaigoa, lea ua tula’i e suia mai le susuga Satoafaiga Sipaia Fatuesi ua maliu, Failautusi o Jae Seiuli-Paulo, teutupe o Kitiona Peneueta Jr. ma sui totino lautele o Malie Malepeai, Michael Felise ma Heperona Agaiava. Mai le filifiliga o nei sui iloga aua le folauga a le Sosaiete mo lenei tausaga, ua mae’a ai fo’i mataupu sa fa’atulaga ina ia fa’atino i lenei fonotaga taua.

 

O le fonotaga lona fa lenei talu ona toe sosoo le fau ma le fau i le fa’amoemoe o lenei vasega fa’aiuaso 1986, ma ua fa’alua ai ona fa’atasi i le ‘a’ai sili ona pisi o Las Vegas.

 

I le 10 tausaga talu ona fa’au’u mai i latou mai Samoana sa fa’ato’a faia ai le fa’atasiga a i latou, ma sa tuufa’atasia lea e le susuga le Peresetene o lea vasega fa’aiuaso a’o a’o’oga i latou i Samoana, Val Tuilefanoa ma nisi o sui iloga o lea vasega e aofia ai Sandra Fruean, Reverend Simon Mageo, Se'epa Poiali'i, Annie Coffin, Naoia Kava, Mana'omaua Solova'a Mageo, Tai Fruean, Lupefa'alele Faima Tua, Steve Lefiti, Leilani Fuimaono-Eneliko, Ricky Fiso, Lui Iopu, Anthony Fuga, Seira Puletasi, Hannah Amituanai ma isi ua le maua suafa.

 

Na amata fa’atulaia lea fa’amoemoe ona o le manatu ua a’e e ao ina toe faia se galuega aoga e fa’ailoa ai le agaga foa’i mo le Laumua sa utuvai ai i latou, ma e mau i ai o latou loto. 

 

Ona o lo’o i ai lava sui iloga o le vasega faaiuaso lenei o fa’amautu i le atunuu pele o Amerika Samoa, o lea e mita’i lava e i latou mea o lo’o mo’omia e le Laumua i Samoana. Ona ua fai si tuai o le 10 tausaga na fa’ato’a amata fa’atasi ai le vasega sa fuafua loa le meaalofa e ao ina faia i le atoaga o le 20 tausaga talu ona matou fa’au’u mai.

 

O le matou vasega sa matou tuufa’atasia se meaalofa tupe mo le fa’aau’upegaina o le Faleta’alo fou o Samoana High i le atoaga o le 20 tausaga talu ona matou fa’au’u poo le 2006.

 

O le atoaga o le 30 tausaga talu ona matou fa’au’u mai ai na tuufaatasia ai meaalofa tupe ma fa’atauina ai Ili mo le a’oga. Peita’i o le atoaga o le 75 tausaga o le aoga na fa’ailogaina ua foa’ia ai fo’i le meaalofa tupe.

 

O lenei fo’i fa’atasiga ua fa’amati’e ai ona tu’ufa’atasia nisi meaalofa tupe ma ua toe filifilia ai tofiga galulue o le laulauafono a lenei vasega, ma ua fa’amoemoe fo’i, o le a se isi fa’atasiga tele a le Laumua, ae ua sauni fo’i le vasega fa’aiuaso 1986 mo se isi meaalofa e fuafua tatau ona taua’aoina.

 

I le fa’atasiga lea na amatalia ia Novema 11, 2021 i Las Vegas sa muamua lava ona latou fa’amanatuina le auaunaga a Fitafita Tuai ma Fitafita Tiute uma i le Iunaite Setete aua o lea fo’i le aso malolo sa fa’amamaluina. Ona faia lea o le latou sao mo le fa’amanatuina o lea aso fa’apitoa mo latou sui o le vasega ua mae’a tuumalo, o le fa’atasiga atoa e to’a 35 o sui o le vasega fa’atasi ma nisi o latou pelega sa mafuta atu ai.

 

“O le aso Toonai i le afiafi na fa’ato’a faia ai loa le latou Fiafia Night o le mafutaga autu lea le fa’amoemoe i lenei tausaga ma ua matua fa’afiafiaina i matou uma aua ua maua le mafutaga ma isi uma o i matou fa’apea fo’i ma nisi o aiga o nisi sa mafai ona malaga fa’atasi mai mo le fa’amoemoe,” o se tala lea a le susuga Jr Peneueta.

 

“O se mea lelei le toe tepa i tua i aso o talavou ma a’o’oga fa’atasi, o ai ea na ilu ma talotalo, o le a mafai ona toe faatasia ae ua tino i matutua fo’i? Ua toe fa’amanatu mea sa nanau i ai i lena vaitaimi a’o talavou, ae o le fesili, ua maua i lenei vaitau?” Ole tele lena o fetufa’iga na fa’aleo ma saga fa’afiafiaina ai, aua o le tele o moemitiga na fai, ae o le tele ia o le fesasia’i solo lea ua iloga mai ua fai. O tala lava e fa’afiafia atili ai le mafutaga ma fa’aosofia ai le fia mafuta pea lava pea.”

 

“Ua matou tau fai fa’afetaia le avanoa ua toe fetuai ai, fa’afetai i le Atua aua o ia ua mafai ai. Fa’afetai sili ona ua to’atele i matou o sui o le vasega ua mafai ona matou maua lea avanoa e fa’atasi ai i lenei tausaga, talosia le toe mafutaga i le isi 5 tausaga o lumana’i, ina ia matua fa’atumulia fo’i i nisi lagona fa’apenei ma sili atu.” O se tala fiafia lea a le susuga Val Tuilefano, le Peresetene o lea vasega fa’aiuaso i le vaitau na fa’au’u mai ai i Samoana High.

 

“Avatu fo’i le fa’afetai i talosaga si’itia ma le tapua’iga mai isi sui uma o le matou vasega ua le mafai ona auai mai ona o nisi o tuatuagia e le ma’alofia i lenei vaitau. Tau ina ia maua le avanoa e mafuta fa’atasi ai i le isi lima tausaga o lumana’i. Fa’afetai le tapua’i mai, ma ia tofu maua e i tatou manuia o le Atua fa’atasi ai ma o tatou aiga,” o se toe fa’asoa  lea a Val Tuilefano o le vasega fa’aiuaso Samoana 1986.

 

FA’AGASOLO TUIGA FANAU 5 TAUSAGA E OO 11 TAUSAGA LE MATUTUA

 

O le aso Gafua ma Aso Lulu o vaiaso ta’itasi ua fa’atulaga e faia tuiga o le koviti-19 a le fanauiti lea ua amata mai le 5 tausaga se’ia oo i le 11 tausaga mai nofoaga ua mae’a fa’atulaga ma fa’alauiloa atu i le mamalu lautele o matua, na’o le Falema’i Fa’aitumalo i Tafuna.

 

O le vaila’au ua fa’atulaga ma pasia mai e le US Food & Drug Administration ua pasia ai le Pfizer e tuia ai le fanau i lona tele ua fa’atulaga fo’i. 

 

Ua mautinoa e sainia e matua pepa fa’amaonia mo nei tuiga, ma o le fanau ma ua fa’atulaga ina ia o atu matua ma fanau i le falema’i i Tafuna i le aso Gafua ma le aso Lulu  e afua i le 8:00 i le taeao se’ia oo i le 2:00 i le aoauli mo nei tuiga.

 

Ua mae’a fa’atautaia fo’i e le Matagaluega o le Soifua Maloloina le tele o latou fa’asalalauga e fa’alauiloa atili ai le aoga tele o nei tui puipuia mo le fanau ina ia malupuipuia mai le Covid-19 pe a faimalaga i nisi atunuu pe sofa’i fo’i le malo e le Coronavirus i se taimi o lumana’i. A i ai se fesili telefoni Matagaluega Soifua Maloloina “219”.