Ads by Google Ads by Google

Tala o le Lalolagi


Faipule i le Konekeresi Uifa’atali Aumua Amata [ata: foa'i]

Pago Pago, AMERIKA SAMOA

 

FA’AFIAFIAINA UIFA’ATALI AMATA - SUIGATOFI MO LE DOI SUI FOU

 

Ua fa’ailoa le agaga fa’afetai ma ua fa’afiafiaina foi le tatou Faipule i le Konekeresi Uifa’atali Aumua Amata, ina ia mae’a le filifiliga o sui iloga i le pulega a le Matagaluega o le Initeria a le Malo Tele, ua filifilia atu ai se tasi o alo mai le Setete o Hawaii, o se tasi e malamalama lelei i a’afiaga o feagai ai ma le tatou teritori o Amerika Samoa.

 

“O se lagona fa’agae’etia pe a fa’alogoina ma mautinoa ua filifilia mai nisi o sui fou ma ua malosi atili ai le pulega o lo’o latou fa’atautaia le matagaluega o le Initeria aua o i latou nei o lo’o fa’auia atu ai fa’atupega uma mo le tatou atunuu,” o sana fa’amatalaga amata lea e tusa o le suiga tofi ua matauina nei.

 

“O le a’ao fa’atalofa ua fa’auia atu ai lenei tusi fa’amalo, aua o lo’o ua i ai mataupu aoga mo i tatou o le a latou faia i ai fa’aiuga ma fa’aauauina, ma o ni galuega sili ona taua fo’i o lo ua tatalia mai mo i la’ua i lea tulaga. Ou te mautinoa o le a aufa’atasi i matou ma Taitai o le tatou Malo i Amerika Samoa, e fa’afeiloa’ia ai lenei suiga tofi mamalu ua tofia mo le Matagaluega o le Initeria a le malo tele,” o se tala fa’aauau lea Uifa’atali Amata.

 

Ua faalauiloa le ali’i o Keone Nakoa mai Hawaii e avea ma Sui Fesoasoani a le Failautusi o le Insular & International Affairs ma le tamaitai o Betsy Hidebrandt mai Virginia e avea ma Sui Faufautua Sinia a le Insular Areas mo le Fesoasoani Failautusi ua tofia.

 

“Ou te mautinoa o le a matua aoga le silafia e le atali’i o Hawaii o fa’afitauli uma o lo’o feagai ai ma ona tagata i Hawaii, ma ia mautonu ai i mataupu o lo ua feagai ai ma tatou malo fa’aatumotu. O na mea uma e aoga lea i lana galuega ua i ai nei. Ua fa’apea fo’i le lava silafia e Hidebrandt o mea uma o feagai ai ma Uosigitone le Laumua nei, fa’atasi ai ma o la’ua agava’a fa’apitoa i mataupu tau faigamalo, ua tatou aga’i atu fo’i i se isi avanoa matagofie mo tatou mataupu e fia faailoa ma faia i ai fa’aiuga a nei ta’ita’i tofia. O le a matou galulue fa’atasi ma i la’ua nei, ia mautinoa o lo’o fa’aauau pea ona fesoasoani mai lea matagaluega mo tatou tagata lautele ma le tatou faigamalo,” o sana toe saunoaga lea e tusa o lea tofiga fou.

 

O le Sui Fesoasoani o le Failautusi o le Initeria Nakoa sa faigaluega o ia i le Bureau Chief ile Laumua i DC i le Ofisa o Mataupu mo le Malo o Hawaii, ma e muamua atu i lana lea galuega, sa faigaluega fo’i mo Senatoa Daniel Akaka ma le Fa’amasino SIli o le Hawaii Intermediate Court mo Fa’amasinoga Apili. O ia o se alo na soifua a’e ma a’oa’oina fo’i i Hawaii.

 

O le tamaitai ua avea nei ma Faufautua Sinia, Hidebrandt sa tautua fo’i i le DOI muamua ma sa mua’i galue fo’i i le Capitol Hill i tulaga tau feso’ota’iga mo le pulega.

 

SETEMA 11, 2021 - FA’AUAU FA’ASA O LE COVID-19

 

O le afioga le Sui Kovana Talauega Eleasalo Ale sa ia fa’alauiloa le fa’aauai pea o le Fa’asa mo le Covid-19 ua fa’amamaluina nei i le atunuu, ma ua tali tutusa lelei lava ma le fa’asa sa fa’atautaia mai i le masina ua tuana’i, ae tasi lava le mea taua ua faailoa mai ua suia ma e ao ina mulimulita’ia lea e i latou e malaga atu i totonu o le atunuu.

 

Ua fa’amautu e Talauega, O loo tumau pea i tatou i le Lanu Moana, peita’i, ua i ai le suiga e tatau lava ona matua fa’autagia e le mamalu o e malaga mai i totonu o le tatou malo. E fa’amamaluina nei aiaiga uma mo le isi 30 aso, e afua atu ia Setema 11, 2021. E tatau ona faia tui puipuia o le Covid-19 e i latou uma lava o lo’o gasolo mai fafo i totonu o Amerika Samoa, poo fea lava e te malaga mai ai. O i latou uma e 16 tausaga ma fa’asolo mai ina matutua, e aotelega i lea suiga, se’i vagana ai o se tasi ua mae’a fa’atonuina e foma’i e le tatau ona faia sona tui puipuia o le Covid-19. Ia umia fo’i fa’amaoniga o lea fa’atonuga fa’apitoa mo lena sui.  O isi mea uma lava na fa’amamaluina i le masina ua te’a, o lo’o fa’aauau pea lava.

 

O le a fa’atautaia ai le galuega tima’i ma le puipuiga o le Malo o Amerika Samoa i lenei fa’asa se’ia oo ia Oketopa 10, 2021 ona toe fa’ailoa atu lea o se isi Fa’asa fou aua le isi 30 aso i luma atu.