Ads by Google Ads by Google

TALA O LE LALOLAGI


[ata: foa'i]

Pago Pago - AMERIKA SAMOA

FA’AMAU FA’AILOGAINA GALUEGA O FEAGAI AI - OFISA O LE MEDICAID I AMERIKA SAMOA

Ua tasi moemoe le fa’autaga a le National Association of Medicaid Directors o le a taua’aoina aloa’ia le latou fa’ailoga fa’aletausaga i le Ofisa o le tatou Medicaid i Amerika Samoa.

O lea fa’ailoga ua tamau ai le latou silafia lelei o le lautele ma le lavelave o le galuega ua mae’a ma fa’aauau ona fa’atino fo’i e le Ofisa o le Medicaid i Amerika Samoa, talu mai ona taumafai fela’ua’i ma femalaga’iga latou malaga mo e fia faia talavai ma toe taliu atu o le to’atele mai Hawaii i Samoa, ua mae’a latou talavai, i le vaitau o le Covid-19.

O nei faigamalaga uma, ua latou matauina ai le galulue fa’atasi o lea Ofisa ma le mamalu lautele o femalaga’i, ma ua gafatia e le aufaigaluega ma le pulega fo’i a le Ofisa o le Medicaid ona gafa taulima mana’oga eseese, e tusa ai o le Polokalama ma latou tautua e agava’a ai i latou ua avea ma sui e talia nei alagamanuia.

“I le taimi o le fa’aletonu ai o fa’agasologa masani o galuega masani a le Medicaid, ua suia ma si’itia ai fo’i ma le agava’a ua fa’ailoa mai e le aufaigaluega ma le pulega i Amerika Samoa, e faatautaia ai le latou tautua i le lautele. E le o maluelue teisi ai lava ma le latou naunau e tautuaina tagata uma.” O se tala manino mai lea a le sui o le NAMD i le taimi na taua’aoina ai lea faailoga i le fa’atonu sili o le Medicaid Office i Amerika Samoa.

Ua taga’i toto’a le NAMD i tulaga nei: Ia Mati 2020 na tapunia aloa’ia ai e Amerika Samoa femalaga’iga ona o le Covid-19, ma ua le mafai ai ona femalaga’i le to’a 2,000 o tagatanuu ina ia faia latou talavai masani ma fa’atulaga i Honolulu ma isi setete uma o le Malo tele.

Ua tele ina le mafai ona feso’ota’i fo’i lea to’atele o le atunuu ma latou foma’i ma ua fa’afaigata atili aua e le o masani tele i latou ma feso’ota’iga tau tafa’ilagi ina ia le fa’atonu a latou talanoaga masani ma latou foma’i ina ua le mafafai ona faimalaga. O le tatou Ofisa lea ua tula’i mai e matua fesoasoani i lea faiva.

Ua leai ni femalaga’iga ma ua fa’apea fo’i ona tula’i mai le Polokalama a le Medicaid ma le latou Ofisa e fa’ataunuu lea tulaga.

Siitia le tulaga e fa’atautaia ai le auaunaga mo le mamalu lautele o e ua auai i le polokalama i le atunuu.

Ua tu fo’i lea ofisa ma lana aufaigaluega i le va ma so’otaga i Ofisa o Falema’i ma Foma’i i fafo ina ia mautinoa ua soloia ni fa’afitama’i e tula’i mai ona o le fa’atuai, pe o le suiga fo’i o talavai mo sui uma ua tali le Medicaid i le atunuu.

O lea ituaiga o tautua, ua iloga ua siitia ma ua atili ona avatu le fesoasoani ia sologa lelei so’otaga uma mo talavai ma mea e fa’atupe mai e le Medicaid mo tagata lautele o le atunuu.

Ua le gata i lea ua iloga se taimi muamua ua tula’i mai le Ofisa o le Medicaid ma latou fa’atautaia femalaga’iga mo e fegasoloa’i e faia talavai i le va o Pago Pago ma Honolulu. I lalo o se fuafuaga fa’ataoto a le Teritori ua latou fa’atautaia ai nei malaga ma ua mafai ona malaga ai ta’i 200 o latou sui agava’a i le Medicaid mo talavai i Hawaii ma toe taliu mai fo’i i aiga i taimi fa’atulaga mo nei malaga fa’apitoa.

Ua iloga ona gafatia e le Ofisa o le Medicaid a le atunuu ona tatala mai le tautua lautele a falema’i ma foma’i i fafo e ala i feso’ota’iga maumaua’i, ina ia gafatia lava ona toe fa’agasolo lelei talavai a matua matutua ua litaea ma ua tautuaina e polokalama a le Medicare ma le Medicaid.

E ese mai lea ua latou gafatia fa’atasi ma latou pa’aga ona latou tuufa’atasia ma fa’atula’ia le TalofaPass, e avea ma ala e mafai ai ona fa’atautaia pea femalaga’iga i taimi o le a tatala aloa’ia ai femalaga’iga i le va o Hawaii ma Pago Pago, e aunoa ma se toe nofova’ava’aia.

Ua fa’apea fo’i ona latou fa’atautaia fa’atasi ma latou pa’aga le so’otaga ma le Hawaii Safe Travel ina ia feso’ota’i lelei nei ala tafailagi mo femalaga’iga e fa’aauau ai i tua atu o le fa’asa sa fa’atula’ia i atunuu e lua, ma ua toe tatala ai femalaga’iga ma le manuia.

O le polokalama lenei e lua ona vaega, ma ua ausia a’ia’i ona fa’atautaia ona o le galuega maumaua’i a le Ofisa o le tatou Medicaid i le atunuu.

Vaega muamua, ia fa’aauau pea ona mata’i le fa’asa ona so’ona femalaga’i le lautele ae ia tatala avanoa mo e uma ua agava’a i le Medicare ma le Medicaid. O le vaega lua, pe afai e tatala aloa’ia femalaga’iga, ia tumau pea ona va’ava’aia toto’a le tulaga saogalemu pea o le atunuu mai le sofa’i mai e le Covid-19.

O nei ala feso’ota’i, ua fa’atautaia ina ia galulue fa’atasi atunuu uma ua aofia ai e fa’aaoga, ma ia fa’aleleia atili ai so’otaga tau femalaga’iga ma fa’amaumauga o e femalaga’i.

Ua iloga le gafatia ona galulue fa’atasi o atunuu uma ae maise o Ofisa o Medicaid ma isi matagaluega o lo’o latou fetufa’i, feso’ota’i ma galulue fa’atasi ia mautu le saogalemu o Amerika Samoa mai le oo mai i ai o le Covid-19.

“E ui fo’i ina i ai nai fa’aletonu e alia’i i taimi uma e femalaga’i ai tagata, ae o a’afiaga e mafai lava ona soalaupule ma toe fa’aauau le tautua latou, o se mea sili lea ona mata’aina i le galulue fa’atasi ai a le Pulega ma le aufaigaluega a le Medicaid i Amerika Samoa.” O se toe tala lea a le a le sui sa ia taua’aoina lea fa’ailoga o le NMDSpotlight Award ia Sandra King -Young, fa’atonu o le Medicaid Office i Amerika Samoa.

MALAGA TALIU MAI LE HAWAIIAN AIR - 1:00 PM ASO FARAILE

O le malaga toe taliu mai a le Hawaiian Air na toe tolopo e fa’ato’a malaga mai i le aso Faraile, itula e 1:00 i le aoauli, ma sa faia lea fa’asalalauga ma tima’iga i pasese uma, e le toe fa’atuai le va’alele ona o le siakiga o uta ma le ‘aumalaga. O le malaga lea e nurmera 466 ma e fa’atolu lelei ona tolopoina lea malaga fa’ato’a ta mau le taimi e malaga sa’o ese atu ai.

O lo ua tula’i mai o lea malaga e tele mea sa fa’aletonu ai i lona fo’i taumafaiga e tu’uva’a ese atu mai Hawaii ma le aumalaga ua mae’a fa’atulaga. Na suia le taimi e tatau ona aluese atu ai le faigamalaga lea mai le mea sa mua’i fa’alauiloa mai, e tu’uva’a ese mai Honolulu i le itula e 4:00 i le afiafi.  Na fa’ailoa mai lea o le a tu’uva’a ese atu i le itula e 8:00 i le taeao, ma to’ai taunuu i Pago Pago pe o le itula e 2:00 i le aoauli. 

Peita’i e mae’a atu ona fua uta ma le aupasese o le a sauni e ulufale i le va’alele, ae toe fa’ailoa mai, ua sili mamao le mamafa o le faigamalaga ma latou uta ua mae’a totogia mo le faigamalaga. Na toe tauofo mai lea o nisi e fia nonofo ae totogi tupe e le Kamupani va’alele a le Hawaiian Air. Na oo lelei lava i le $4,000. le tinoitupe na ofo mai ae faato’a manatu nisi e toe nonofo.

Lea fo’i la ua oo atu i Tafuna Airport, ae toe fa’aletonu fo’i le latou taimi e tu’uva’a ese mai ai, ae ua le toe mafai loa ona fa’atuai se tasi lava o le pasese mai le taimi atofa e malaga ese mai ai.

E tusa ma le itula e 8:45 i le afiafi ae fa’ato’a fa’ailoa mai loa, o le a tolopoina le malaga toe taliu mai a le va’alele, ma e alu ese mai le itula e 11:30 i le taeao o le aso Faraile, Novema 19, 2021.

O le a fa’atulaga ai lea malaga e sese’e i Honolulu i le itula e 6:0 i le afiafi, peita’i e tatalaina faitoto’a o le Ofisa va’alele i le itula e 6:oo i le taeao ina ia siakia le aumalaga ma latou uta. Vaega a le TSA e amatalia le latou galuega mo le siakiga o ata mai le itula e 9:00i le taeao se’ia oo i le 10:30am.

Ua fa’ailoa mai fo’i na galulue fa’atasi le aufaigaluega a le Hawaiian Air ina ia fa’afeso’ota’ia le vasega o ofisa va’alele e fa’aauau ese ai malaga a nisi o le aumalaga lea.

O Pasese uma lava ua mae’a fa’aulu a latou fa’amaumauga ma tulaga o latou tui Covid-19 ua mae’a faia e malaga mai ai i Hawaii e le toe tau toe lesitalaina, ua aoga pea lava le latou lesitala na mae’a faia. 

UA FA’ALAUILOA I LE FARM FAIR NOVEMA 18, 2021 - LA’AU AOGA I SAMOA UA MOU ATU:

O le la’au na fa’atulaga mai aso ua leva e mafai ona gaosia mai ai le Tauaga Samoa, ua iloga ona seasea maua i le vaomatua o le atunuu. O le Tauaga e aoga tele i le taumafaiga e tatau le pe’epe’e e mana’omia mo le gaosiga o le tele o taumafa iloga a le atunuu.

Peita’i, ua matauina fo’i ua matele le atunuu ina fa’aaogaina le taga araisa vaivai o lo’o aumaia ai le araisa i le atunuu e tatau ai le pe’epe’e mai le popo i taimi e tapena ai le tele o taumafa masani a le atunuu.

O lea foi suiga tele o mea e fa’aaoga mo lea agaifanua, ua matele ai ina fa’atu’utu’u tagata o le atunuu mai le teuteuina lelei fa’atasi ai ma le totoina o pupu tauaga aua le tapenaga o tauaga mo le tatauina o pe’epe’e i le gaosiga o mea taumafa.

O le susuga le Faifa’ato’aga Tatou Talamoa, sa matauina le fa’atau atu ana tauaga e tele i le atunuu ma ua lelei tapena mo le fa’amoemoe e fefa’ataua’i ma se lapata’iga aoga e pei ona fa’ailoa atu i luga. I le taimi nei ua nofouta fo’i i ai le Matagaluega o le Vaomatua ma le Gataifale i lea tulaga, ina ia faia i ai se galuega a le latou aufaigaluega i lea tulaga.

E ese mai lea ae ua taga’i toto’a foi i ai le Matagaluega o Fa’ato’aga ina ia utagia le fautuaga ua fa’ailoa mai e lea sui iloga o le Asosi a Faifa’ato’aga i Amerika Samoa.

O le Fa’aaliga Tele o Fua o Fa’aeleeleaga na fa’ato’a mae’a i le aso Toona’i na te’a nei, e tolu aso sa fa’atautaia ai e afua mai le aso Tofi, Aso Faraile ma le aso Toona’i na te’a nei.

SAUNI LE ASOSI A TAMA MALISI TUAI MO LE TA’AMILOSAGA TA POLO (GOLF):

O lo ua fa’ailoa mai ua lava tapena nei le Asosi a Tama Tuai a Malisi a Amerika Samoa i le latou taumafaiga e toe fa’atula’ia le latou Asosi Malosi i se latou sailiga tupe, e ala lea i le latou Ta’amilosaga Tapolo ua mae’a faia i le fa’aiuga o le vaiaso na te’a nei.

O le a mafai ona fa’alauiloa mulimuli atu se fua fa’aaliali o lea taumafaiga ma le a’ao foa’i foi o le mamalu lautele e ala i lo latou auai ma ta’a’alo fa’atauva i lea tagapolo.

O le Asosi lea a Tama Malisi, o le fa’atuatuaga sili lea o le Au Football a Malisi i lenei tausaga, ma o se fiafiaga ia i latou le fa’atinoga a fanau a’oga i le ‘au ua taumafai nei.

Ua tula’i mai fo’i le susuga Keith Gebauer ma Christopher King ina ia latou fa’atauanau i a latou uo mamae ia auai mai mo le tagapolo aua lenei fa’amoemoe, ua mae’a tapena le Asosi mo le latou fa’ailoga o le tulaga muamua ma o lo’o fa’atautaia fo’i ma se lulu poo le se’i e maua ai fa’ailoga eseese mo e uma na auai.