Ads by Google Ads by Google

TALA O LE LALOLAGI


[ata: foa'i]

Pago Pago - AMERIKA SAMOA

 

FA’ATULAGA TUIGA COVID -19: 3 ASO LULU SOSO’O & $100 LE TOTOGI

 

O le taumafaiga ina ia matua taofia mea uma ae fa’asaga le aufaigaluega totofi e fa’atautaia tuiga o Tui Puipuia o le Covid-19 i Amerika Samoa mo aso e tolu, ua soloia le manatu ina ia tapunia galuega i le atunuu atoa mo aso e tolu, ae o lo ua fa’atulaga mo aso Lulu e tolu o Tesema 2021.

 

O le fuafuaga ua galulue fa’atasi i ai le vasega o Pulenuu mai afio’aga ta’itasi lea sa latou sailia nofoaga lelei ma e tulata i a’oga, lelei foi auala e faigofie ma ia mafai ona fa’atutaia ai tuiga nei mo tagata uma e le’i faia tui puipuia.

 

O aso fou o Tuiga ua fa’atulaga mai: Tesema aso muamua, itumalo ogatotonu, Ituau – Aitulagi; Tesema 8, Falelima i sisifo, Tualauta – Alataua); ma Tesema 15 mo le Falelima i sasa’e (Vaifanua – Maoputasi).

 

Ua a’atulaga fo’i le $100 mo i latou uma ua fa’ato’a faia lea o latou tui puipuia mo nei aso e tolu ua fa’atulaga mo tuiga, ae le aofia ai i latou o le a faia tui lona tolu o le Booster lea po o i latou i galulue i le malo. 

 

O lenei suiga o le tuiga tele lea sa fa’ato’a fa’alauiloa i le fonotaga a le Komiti Fa’afoe o le Covid-19 i le aso Gafua na te’a nei, ma ua mae’a fo’i ona ta’ua’aoina aloaia i le Kovana, Peresetene o le Senate ma le Fofoga Fetalai o le Maota o Sui latou kopi o lea tuiga tele ma aso ua fa’atulaga e faia ai.

 

O se aso o i luma o le a fa’alauiloa ai e le malo nofoaga ma taimi e faia ai tui mo aso fa’atulagaina.

 

ASO FA’AFETAI 2021 - POLOKALAMA MO AIGA TA’ITASI & FOAI I UOSIGITONE 

 

I le setete o Uosigitone, ua iloga le Aso Fa’afetai ua patino e fa’amanatuina e aiga, peita’i, ua latou silafia lelei, o le tele fo’i o pisinisi ua le malolo a latou tagata faigaluega, ae ua tatala pea, ae ua totogia tagata uma e tiute i lea aso, ‘ua fa’atoluina le totogi masani.’

 

O se mea lea ua taui ai mai le agaga fa’afetai o pisinisi ma Kamupani uma le tu’ua o le aiga, ae mafuta atu i le galuega e fa’atino tiute. O le setete lava latou e tapunia ana auauga masani uma, se’i vagana ai le vaega o tautua e le mafai ona tu’ua, e ta’imua mai i le malupuipuia o le soifua lautele, ma le tausia lelei o e ua fa’agasegasea i lenei vaitau fiafia ma le agaga fa’afetai o le atunuu atoa.

 

Mo le aufaigaluega a le Taylor Farms, o lo’o ua matu ane mea uma sa fa’avesivesi ai, ona o le tau fa’amasani o a tatou fanau o lo’o ua o mai ai, ua toe manatu nei lea pulega ina ia toe fa’aa’e mai se aumalaga se tasi mo lenei tausaga, lea e tatau ona o mai i le malaga muamua Tesema 2021.

 

O le fa’afetai a lenei Kamupani, ona o tagata faigaluega ua iloga le malolosi, e ui e fou ia te’i latou nei tau ua nonofo ma faigaluega ai, ae o le mea ua sili ia i latou o le mau talitonuina, e faigaluega malosi i latou, e fa’amaoni ma fiafia ina ua amata maua totogi, e le o ni totogi sa va’aia muamua e i latou i lo tatou atunuu, ma ua lava ma totoe ai le latou fa’asoa.

 

“O le faamanuiaga o lenei tausaga sa le manatu lava o le a oo mai i lenei tausaga ua maua. O le tele fo’i o le naunau ina ia fa’amautu nai o matou aiga, ae ua motusia mai ai le mafutaga ma e pele i le agaga. Peita’i, ia mau mai lava le onosa’i. O le faigaluega lava ma le taumafai ia siitia le soifuaga ma fanau ma aiga pele.”

“O le fa’afetai lena e sii a’e i le Atua, aua o ai ea na ilu pe vavalo o le a oo mai i Amerika ma faigaluega ai i lenei vaitau? Fa’afetai tele i le Atua o manuia, tau ina ia fa’amanuia mai i le soifua maua ma le malosi ia tumau, a’o i ai i nei galuega ua sailia ai manuia.”

 

“O le fa’afetai foi i le Kamupani Taylor Farms ua latou fa’aosofia avanoa lelei nei, ma mau talitonuina o tatou tagata e sailia mai ai latou aufaigaluega, ua afua ai lenei manuia. Fa’afetai i le pulega fa’apea ma i latou na mafaufauina nei ala e fesoasoani atu ai.” O se tala fiafia lea a le tina o Telesia Sami, ma ua iloga lava fo’i ona ia fa’asalalauina lana fa’afetai fa’alaua’itele i luga o ala feso’ota’i o Upega tafailagi.

 

Ona o le vaiaso o le Aso Fa’afetai, o lea ua maua ai le avanoa lelei e mafai ai ona fa’ailoa mai ni o latou manatu e agatonu ma lenei vaitau, “O le mea sili ua maua le avanoa e avatu ai le fa’afetai. O le avanoa na maua ua mafai ona o mai ai ma tausailia le manuia tau le tamaoaiga tausi o aiga. Fa’afetai i lenei Kamupani, fa’afetai fo’i mo aiga i le nofo tapua’i mai, tau ina ia tatou maua le onosa’i ma le fa’apalepale mai i lenei taumafaiga ia a’e manumalo. Nai Matua ma aiga, o lo’o tumau lava i matou i le agaga o le fia mafuta ma outou, ae se’i fai se ‘ai o malaga,” o se tala lea a le ali’i o Iosefo, o se tasi o lo’o ua tu’ua le mafutaga ma le to’alua ma le fanau pele, fa’apea matua ma aiga, ae malaga mai mo le tausaga atoa, pe a mai se sailiga e toe fo’i ma ia.

 

Ua le faia ni fuafuaga a pisinisi peita’i ua latou manatu ina ia fa’ataunuuina nisi o galuega fa’atino e fa’asoa atu i nisi i lenei vaitau o le Agaga Fa’afetai ma le vaitau fiafia o le Kerisimasi mo i latou uma o lo’o va’aia patino e i ai le mana’omia i lotoifale o latou aiga.

 

Ua fuafua ai le foa’i tele a le Lima Fesoasoani poo le Lend a Hand Foundation mo le mamalu lautele o le atunuu o mana’omia soo se ituaiga o mea taumafa sii atoatoa ma nisi o oloa o fua o fa’ato’aga o so’o se ituaiga o lo’o folasia.

 

Ua fuafua lea foa’i tele e tolu nofoaga o le a fa’atautaia ai i le aso 11 Tesema e aufa’atasi ai i latou ma le Daynasty Car Club mo le latou tufatufaga taua mo le vasega o e o lo’o maumausolo ma ua faigata ia i latou le taumalulu o lenei setete. O le a taua’oina palanikeke ma pulou mafanafana o “Beanies” e fa’amafanafanaina ai i latou. O lo ua le tu’ua nao nei mea ae ua fa’ailoa mai i sui uma o le Kalapu ma le Lend a Hand Foundation, foa’i mai ma ofu mafanafana fou pe o lo’o matafou ma lelei fa’amamaina, ina ia taua’aoina mo i latou o lo’o i ai le mana’omia.

 

O le aufaigaluega atoa a le Taylor Farms ma le vasega o latou ta’ita’i ma le pulega o le a faia le latou fa’atauga OKA Samoa e fa’amanatu atili ai i le to’atele, taumafa e matua taulia ma o le ma’oi taumafa o le to’atele i le motu.