Ads by Google Ads by Google

TALA O LE LALOLAGI


[ata: foa'i]

Pago Pago - AMERIKA SAMOA

 

FA’ATULAGA MALAGA TOE FA’AFO’I MAI TATOU FANAU A’O’OGA I  FITI

 

I se pepa o fa’amatalga mai le Komiti Fa’afoe o le Koviti-19 a le malo o Amerika Samoa ua fa’ailoa ai amata fuafuaga e fa’atulaga ai se malaga mai Fiti e fa’afo’ia mai ai fanau a’oga sa nonofo a’o’oga i lea malo o le Pasefika, ma e to’atele lava i ali’i ma tamaitai Foma’i mai vaega eseese o le tatou falema’i tele i Faga’alu.

 

O lo ua fa’ailoa o lea malaga ua fa’atulaga mo le masina o Tesema 15, 2021 ma o se malaga totogi pau lea faigamalaga.

 

Fa’ailoa e le Pule Sili o le Falema’i LBJ Medical Center, Faumuina John Faumuina ua ia fa’ailoa mai ai e to’afitu lelei foma’ ma latou aiga o lo’o ua mae’a mautinoa ua leva ona taofia pea i Fiti, sa le mafai ona faia muamua lenei malaga, aua sa toe pipisi fa’avave le Delta Covid-19 i Fiti ma poloka ai se fuafuaga muamua mo se malaga totogi pau e aumaia ai nei foma’i ma latou aiga.

 

O i latou nei o lo’o ua mae’a fo’i le tausaga o a’oa’oga Fa’afoma’i sa auai atu i ai i le Fiji National University, ma ua i ai fo’i ma nisi o sui totino o le Puleaga Samoa Pago Pago sa aoaoina i le Seminario i Suva Fiji, o se tasi foi lea o le au malaga mai.

 

Ua talafeagai lava fo’i lea faaiuga a le tatou Komiti Fa’afoe o le Covid-19 ma le fa’aiuga fo’i a le Palemia o Samoa, Fiame Naomi Mata’afa, o le a auina mai fo’i a latou fanau a’oga uma, o lo’o aoaoina i Fiti i le taimi nei. O le malaga togipau lea a Samoa ua fa’atulaga ia Tesema 09, 2021.

 

TASI NOFOAGA FAIA TUIGA COVID-19 MO FANAU 5-11 TAUSAGA LE MATUTUA

 

O nisi o popolega ma atugaluga e fa’atatau i le tui ua fa’atulaga mai mo le fanauiti e amata mai le 5 se’ia oo i le 11 tausaga le matutua, ua mafai ona fa’alauiloa uma ni tali mai le matagaluega o le Soifua Maloloina e ala i fa’asalalauga i le ea fa’apea ma tusitusiga lomia i nusipepa.

 

Peita’i ua fa’ailoa mai le nofoaga lava e tasi e mafai ai ona faia tui mo nei fanau o le DOH i le Falema’i fa’aitumalo i Tafuna e mafai ona faia ai tuiga ma mita’i lelei ai e foma’i fa’apitoa ni suiga i le soifua o le fanau pe a mae’a ona faia tui puipuia nei.

 

I le tele o nei fetufa’iga i le va o matua ma ali’i ma tamaitai foma’i o fa’atinoa lea auaunaga mo fanauiti mai le 5 -11 tausaga o le matutua, sa fa’ailoa mai ai e matua le isi mea o tupu mai i isi setete o le Malo tele, ua fa’aaogaina ai tui mo tagata matutua i tui o le fanau. Ua iloga ona tele a’afiaga o na fanau talu ai latou tui puipuia na faia o le Covid-19.

 

O le mafuaga lea, ua faia ai nei tuiga na’o le tasi lava le nofoaga e faia ai, ina ia mautinoa e matua, o lo ua va’ai toto’a le aufaigaluega i le ituaiga tui ua faia mo le fanau, ae le o le fesasia’i ma tui mo tagata matutua.

 

O le aso Lua fo’i o le vaiaso na te’a nei na toe asia ai e le Komiti Fa’afoe o le Falema’i Tele i Faga’alu le tatou falema’i ma o le fa’alua ai lea ona faia lea asiasiga, talu mai ona tutula’i mai le Komiti o le LBJ Medial Center a le Maota o Sui o le Fono Faitulafono.

 

O i latou auai i le asiasiga e aofia ai le sui fofoga fetalai o le Maota, Faipule Fetu Fetui Jr, le Taitaifono o lea Komiti Faipule Andra Samoa, ma totino fo’i o le Komiti, Sam Meleisea, Vailuama Leasiolagi,  Faipule Avagafono Vaimaga Maiava, Faipule Su’a Alex Jennings ma Faipule  Mike Asifoa.

 

O le afuaga o lea asiasiga, se’i latou va’ai patino, pe ua lava tapena ma sauni le Falema’i tele i Fagaalu, i se taimi e ono a’afia ai le atunuu i le Covid-19.

 

Ua fa’ailoa mai e le tamaitai Taitaifono o lea Komiti, “O se asiasiga taua tele mo i matou lea asiasiga  na faia e i matou aua e tele na’ua matou fa’afesili sa fesiligia ai le aufaigaluega ona o le fia mautinoa o le tapenaga ua maua’a ma lava sauni mo so’o se taimi e sofa’ia ai le atunuu e lenei faama’i oti.”

 

TO’A 282 PASESE NOVEMA 18, 2021 - NOFOVAAVAIA

 

Mai le pasese e to’a 282 i latou na malaga mai i le aso Tofi Novema 18, 2021, e leai ma se tasi ua fa’ailoa mai o lo’o ua maua i le Covid-19. O lona uiga ua fa’aauau pea lava ona malolosi i latou uma ma ua fa’anofova’ava’aia mo le 10 aso nai lo le 14 sa mua’i faia i pasese o va’alele na muamua atu.

 

O suega uma nei sa faia a le aupasese i le aso Toona’i ua te’a nei. O le aso Gafua ananafi o le a faia ai le isi tuiga.

 

O le vaevaega o le nofova’ava’aia ai o le to’a 282 o le pasese ia Novema 18, 2021 ua nonofo ai le 212 i le Tradewinds, 36 nonofo i le Sadies ma le to’a 34 ua nonofo i latou i Fatuoaiga Center.

 

Ua fa’ailoa fo’i e le tamaitai Foma’i Dr Fiona Trail lea e fa’auluulu i ai le nofova’ava’aia o i latou uma e faimalaga mai, “Ua tele lava le suiga lelei o le vasega o pasese mai Honolulu talu ona fa’aaoga mai le Hawaii Safe Travel ma le TalofaPass e malaga mai ai le mamalu lautele. Ua tau leai lava nisi e maua i le fa’ama’i ua ulufale mai.”