Pago Pago - AMERIKA SAMOA

FA’AU’UGA #75 KOLISI TUUFA’ATASI - LEILANI IULIO, FOFOGA FA’APITOA

O le aso Faraile o le vaiaso ua te’a, Tesema 17, 2021 na fa’atautaia ai le fa’au’uga lona 75 o le Kolisi Tuufa’atasi o Amerika Samoa ma e to’a 117 alo o le atunuu na fa’au’u mai ai ma fa’ailoga maualuluga o le AA ma Tusi Pasi i kosi eseese ua fa’ai’uina ai latou taumafaiga ma le manuia.

Na amatalia le sauniga mamalu i le itula e 10:00 i le taeao, ma sa fa’aaogaina fo’i lea fa’au’uga e tauaaoina aloaia ai nisi o tusi pasi maualuluga o nisi o sui sa tauavea a latou aoaoga fa’apitoa mo fa’ailoga maualuluga i Iunivesite ma Kolisi i fafo.

O le fofoga fa’apitoa na tapenaina se upu fa’amalosi mo le vasega o fanau fa’aiuaso o lenei vaitausaga, sa saunia lea e le tamaitai faipisinisi o Leilani Francis Iulio.

O ia e to’alua ai pule sili e fa’atautaia le pisinisi mo nogatupe, lea e tautuaina le mamalu lautele o le atunuu, Le Lima Fesoasoani.

E toalua fo’i alo tamaitai o le tina faipisinisi lenei o lo’o ua fa’ailoa maia latou nuu o lo ua nonofo mautu ai, o Silulu Julius Sialega Alama ma Fiona Tuiletufga Opetaia Alama,  o Tafuna, Nuuuli ma Tufuipa i Apia.

Na amata aoaoga a Leilani Iulio i le Manulele Elementary, soso’o ai ma le ulufale i le Fa’asao Marist High, toe ulufale i le ASCC mo fa’ailoga maualuluga ao le’i ulufale i le Iunivesite o Hawaii i Hilo.

O lo’o galue o ia i le Lima Fesoasoani ma tautua mai ai le mamalu lautele o le atunuu, ma e auai o ia i lana Ekalesia Maria Fatima i Aua, o le Ekalesia Katoliko  Pule’aga Samoa Pago Pago.

E ese mai lea e tautai lua fo’i le auaunaga i le Fatuoaiga International Holy Family Parish lea e auai i ai lona tina ma se isi vaega o le aiga aua o lo ua faamautu nei i Tafuna i latou uma.

O Leilani Iulio fo’i o se totino o le Asosi a le Aufaipisinisi i le atunuu, Chamber of Commerce.

Ua fa’atasi i la’ua ma le tama o le aiga Ailua Aukusitino Iulio ma e to’aono fo’i o la’ua alo mai le 7 tausaga se’ia oo i le 23 tausaga le matutua.

Ua mae’a fa’au’u nisi o le fanau a Leilani Iulio mai le Kolisi Tuufa’atasi o Amerika Samoa, o Louaivasa Talamoto Laulu na fa’au’u ma togi maualuluga i le tausaga 2018 ma le tamaitai o Tinou Fiona Laulu na fa’au’u i le fa’au’uga ia Me 2021, sa avea fo’i o se totino o le PTK poo le fanau a’oga e maualuluga latou togi imataupu sa tauavea i le ASCC.

Fa’ailoa fo’i le agaga fa’afetai o le tina e fa’auluulu i ai tautua mo fanau a’oga i le Kolisi, Dr Emilia Le’i, “Fa’afetai mo le sao o lea tamaitai faipisinisi i le atunuu, Leilani Francis Iulio, ua ia saunoa e fa’amalosi’au i le taumafaiga a le fanau a’oga, ia le muta ai i lenei taumafaiga le fa’amoemoe, ae tausailia malosi isi fa’ailoga i luga atu, ina ia manuia le folauga a le tatou atunuu i le lumana’i.”

Sa ia fa’ailoa fo’i, “E leai se mea e maua ma le filemu, e lutia i puava i le tele o taimi, ae a maua le fua lelei, e matua iloga fo’i ona toina mai ai fa’amanuiaga a le Atua ia te oe ma lou aiga, le Malo ma lau Ekalesia.”

Ua fa’aauau pea lava ona faia i fafo ane o le Multi Purpose Hall tele a le Kolisi a latou fa’au’uga ina ia mafai ona nofoia ma le toto’a uma malo fa’aaloaloga, aiga ma matua o i latou ua fa’aiuaso i lenei vaitausaga.

FA’AIUGA TAUVAGA TOMAI FA’AFITAFITA - POLOKALAMA JROTC A AOGA MAUALULUGA

O le tauvaga masani a le A’oga Maualuluga uma o lo’o tauavea ai le Polokalama a le JROTC sa fa’atino lea ia Tesema 10, 2021 i le Tafuna Elementary Gymnasium, na fa’aiu ma le manuia ma ua maua mai fo’i fa’amaumauga uma e tusa o taumafaiga a le fanau a’oga  sa fa’atauva ai.

O le matata patino sa fa’atauva ai nei aoga maualuluga o le Fanafana i ona vaega eseese, o tomai fa’afitafita e tatau ona mae’a tapena ai le fanau ua manatu ina ia tautua i soo se vaega o le militeri.

E fa a’oga maualuluga sa tauva i lenei tausaga mai le itula e 9:00 se’ia oo i le itula e 2:00 i le aoauli na fa’atautaia ai lea tauvaga.

O Samoana, Leone, Tafuna ma Fagaitua, ae ua le auai Kanana Fou High ma Manu’a High o isi aoga o lo’o fa’atautaia ai le polokalama JROTC.

E fa au ta’ito’a fa sa mai le a’oga, o lona uiga e ta’i to’a 16 le fanau a’oga sa auai uma i le fa’amoemoe lea ma tolu ituaiga posisi sa fa’atauva ai fanafanaga i lea tauvaga. O le Tu ma Fana, Tootuli ma Fana ma le taoto ma fana.

E fa’asefulu ona fana le tulaga e tasi a le sui tauva e to’atasi, ma e mafai ona maua togi e 100 i le posisi e tasi, e maua ai o pulufana e 300 i le sui tauva e to’atasi.

Ua maua mai i fa’amaumauga le sui ua ia ausia togi silia mo le fa’ailoga Top Gun ua maua lea e Cadet Delzalayna Ah Chong o Tafuna High, 240 ona togi ua maua ma o le togisilia lea ua fa’amauina mai ia i latou uma na tauva.

Ua maua mai fo’i fa’amaumauga, ua maua mai le aotelega o togi aofai: Ua tulaga muamua ai Samoana High i le aotelega o latou togi e 3,209 na maua. O se taimi muamua lea ua fa’amauina, ua maua ai e Samoana le aisilia i lea tauvaga. Tulaga lua ai Fagaitua High i o latou togi na maua e 3,115. Soso’o lea ma le tulaga tolu o Tafun High 3,048 togi ma mulimuli mai ai Leone High i o latou togi e 2,710.