Pago Pago - AMERIKA SAMOA

MANA’OMIA ISI 25 TAGATA AGAVA’A FAIGALUEGA TAYLOR FARMS UOSIGITONE

O lo ua fa’aauau pea lava ona taumafai mai le Kamupani a le Taylor Farms i Kent Setete o Uosigitone ma ua latou fa’aauau pea ona aumaia avanoa mo tatou tagata i Amerika Samoa nei.

Ua mafai ona faafesoota’ia e nisi ua manatu e fia galulue i nei avanoa faigaluega le Ofisa Loia o Aaron Warren i Nuuuli e fa’atino mai ai latou fa’atalanoaga mo nisi e fia faigaluega i le latou Kamupani.

Ua fa’asalalauina fa’alaua’itele fo’i nei avanoa i fa’asalalauga i leitio ma tusia fo’i tala i le tatou nusipepa e tusa o nei avanoa faigaluega.

Mai le amataga sa silia ma le 50 sui na oo uma i le nofoaga autu o lea Kamupani i Uosigitone mo avanoa nei, peita’i o nisi ua toe ave’esea ai le avanoa lelei, ona o lo’o ua solituina e i latou tulafono tau le feagaiga malilie fa’atasi e faigaluega ai i le Taylor Farms. O nisi ua latou fa’ailoa mai, e le talafeagai ma o latou tino le malulu o le setete, toe malulu fo’i le nofoaga e faigaluega ai.

O lea ua mafua ai ona le lava pea i latou e faigaluega i lenei kamupani, ma ua manatu ai,  sailia patino lava i latou ua i ai le naunauta’iga.

I le to’a 20+ o i latou o lo ua tumau pea, ua matua aluga lelei lava ia i latou le galuega ma ua selesele fo’i i totogi lelei sa fa’anaunau i ai. Ua iloga mai ua suia nei le ituaiga tagata faigaluega ua mana’omia e le Taylor Farms, o i latou ua masani i le soifua faigaluega, ma ua naunau ia maua se avanoa mo lea ituaiga o galuega. O le fa’atalanoaga muamua lava i le ofisa loia i Nuuuli o le a avea ma ki i lou avanoa o e talosagaina.

O le Kamupani lenei, ua iloga le lelei ma alumia o ana oloa gaosia o mea taumafa tatau ma le paleni ua gaosia ma fefa’ataua’i i le mamalu lautele mai faleoloa tetele i le setete o Uosigitone fa’apea fo’i isi setete uma i Matu i sisifo o le Iunaite Setete o Amerika. 

Mai fa’amaumauga mautu a lea Kamupani ua fa’ailoa mai ai e tusa ma le $2.2miliona tau o oloa ua maua mai a latou fefa’atauaiga i le tausaga. E 35 lala o lea Kamupani i le Iunaite Setete, ae fiafia tele le latou pulega i le tino malolosi  ma le tinou o tagata Samoa i le galuega.

O lo ua fa’ailoa mai le totogi amata o lo’o ua faigaluega ai tagata e $16.50 i le itula ae afai ae ova taimi e $24.75 i le itula.

E tele isi penefiti e maua e le tagata faigaluega e aofia ai ma le lelei o lona litaea e maua, ma le inisiua e totogi ai talavai ma pili falema’i fa’apea ma talavai nifo. Ua fa’atulaga ina ia nono fo’i le pasese mai le Kamupani e malaga atu ai, faatasi ma le totogi o pepa malaga pe afai e le’i i ai se tusi folau.

O lo ua saunia fo’i se nofoaga e nonofo lelei ai uma i latou ao faigaluega ma tapena mulimuli ai ni latou fale e nonofo ma faigaluega ai mulimuli pe a maua latou totogi.

ASO MALOLO O LE MALO, TESEMA 24 & TESEMA 31

I se fa’aaliga fa’alauaitele mai le Ofisa o le Kovana, ua fa’ailoa ai e le afioga i le Kovana Sili, Lemanu Peleti Mauga,  aso malolo e lua mo le masina lenei mo le malo o Amerika Samoa. 

Mo le malologa o le Kerisimasi, e pei ona fa’amanatuina i le aso To’ana’i, Tesema 25, ua fa’ailoa e le kovana, le aso e fa’amamaluina ai le Kerisimasi e faia lea i le Aso Faraile, Tesema 24. 

Mo le malologa o le Tausaga Fou, e pei ona fa’amanatuina i le aso To’ana’i, Ianuari 01, 2022, ua fa’ailoa e le kovana, le aso e fa’amamaluina ai le Tausaga Fou e faia lea i le Aso Faraile, Tesema aso 31. 

O nei aso malolo e lua o le a tapunia ai foi ofisa uma o le malo. 

Ma o nei aso malolo e lua mo aso fiafia o lenei tausaga, o le a tapunia ai foi fale tupe i le teritori ia Tesema aso 24 ma Tesema aso 31.

MAUA TUSI PASI ‘MASTER EDUCATION’ 25 FAIAOGA  - TESEMA 9

O le avanoa sa maua mai le San Diego State University mo le to’a 25 faia’oga ina ia sailia ai latou fa’ailoga maualuluga Master of Arts in Ediucation, ua fa’aiu manuia nei ia Tesema 09, 2021.

O se tasi lea o vasega sa fa’auia mai latou aoaoga mo fa’ailoga maualuluga nei e le Matagaluega o A’oga a le tatou Malo.

O le fa’amoemoe lava, ia si’itia atili le tulaga e mafai ai ona aoaoina fanau a le atunuu, ma ia lava ma totoe fo’i i latou ua agava’a e avea ma faia’oga i a’oga maualuluga ma le Kolisi Tuufa’atasi a le tatou Malo.

O le fa’auuga o i latou nei sa fa’atautaia lea i le Gov. Rex Lee Auditorium.

O le polokalama lea sa tauavea ai e faia’oga mataupu e ao ina fa’aleleia atili ai aoaoga a le fanau i tulaga tau Ta’ita’i, ae faamoemoe e fa’aleleia atili ai latou tomai mo le aoa’oina o fanau i a’oga maualuluga ma Kolisi.  Ua fa’atupeina lea polokalama e le ASDOE, i lana polokalama o le KEEP, lea e toe fa’aleleia atili ai agava’a o faia’oga mo le a’oa’oina o fanau, ma ua fa’apa’aga ai ma le Iunivesite o San Diego State.

E to’a 25 i latou na amata, ma ua faapea foi ona fa’amanuiaina i latou uma i nei tusi pasi maualuluga i le taimi nei.