Pago Pago - AMERIKA SAMOA

TU’UMALO SE TA’ITA’I TAUA O AFERIKA I SAUTE; DESMOND TUTU

JOHANNESBURG (AP) — O lo’o opea nei I luga o Aferika I Saute se ao pogisa o le maliu ma le oti, ina ua fai I lagi le folauga a le susuga Desmond Tutu; o se tagata uli ua lauiloa I lona tu malosi e faasaga tau I faiga saua ma le faailoga lanu I ona tagata, I totonu o Aferika I Saute ma le lalolagi atoa.

I le vaitaimi o le a’asa o sauaga faasaga I tagata uli I totonu o Aferika I Saute, sa le’I maloloina lenei taitai I lona faasaga tau I nei sauaga, I lona galue malosi ina ia saili se to’afilemu ma se mapusaga mo ona tagata, se’ia o’o lava ina I’u manumalo ana taumafaiga mo tagata uli I totonu o Aferika I Saute, I le 1994.

O le susuga Desmond Tutu o se faifeau sa ia fa’aaogaina lana pule la’a, I le avea ai o ia ma ulua’I Epikopo I totonu o Johannesburg, e faaleoina ai lagona tete’e a le toatele, I amioga ma lagona faailogalanu.  Sa avea foi Desmond Tutu ma Akiepikopo I totonu o lana Ekalesia ae sa le’I fa’avaivai ai lona lauga atu I mataupu o le Alofa ma le Tasi o tagata I le silafaga a le Atua.

Sa faapaleina Desmond Tutu I le faailoga o le ‘Nobel Peace Prize’; o se fa’ailoga e ausia e I latou e galulue malosi mo le aumaia o le to’afilemu ma le lotogatasi I tagata o le lalolagi.

SILIA MA LE 100,000 TAGATA FALANI UA A’AFIA I LE COVID-19; ULUA’I TAIMI TALU NA PESI LENEI FAAMA’I

PARIS (AP) — Ua silia ma le 100,000 tagata o le malo o Falani ua faamaumauina I a latou tala faamaumau faale Soifua Maloloina, ua a’afia I le faama’I o le Koviti-19, I le aso e tasi, talu ona pesi lenei faama’I I le lalolagi atoa.  Ma ua avea lea ma tulaga ua fa’afaigata ai I taitai o le Malo Falani ona ‘alo’ese mai I le tapunia o lo latou malo, aua se taumafaiga e faaitiitia le fuainumera o tagata ua taofia I le falemai ona o lenei faamai.

Ua faailoa mai I faamaumauga mai I falema’I eseese I totonu o Paris, o le toatele o I latou ua a’afia I lenei faamai, ua a’afia I auga fou o le Omicron Variant, lea ua tele ina a’afia ai tagata mai I Egelani, le malo o lo’o tulata I Falani.

Ua ta’ua le toe feagai o ICUs I falema’I Falani ma le faigata o galuega I le to’atele o tagata o le atunu’u ua taofia ona o le ‘varian’ fou ia ua toe pesia ai le atunu’u.  Ua silia ma le 1,000 tagata Falani ua maliliu I le vaiaso ua tuana’I, ona o lenei faama’I matuia, ma o le faitau aofai o tagata Falani ua maliliu talu ona pepesi le Koviti-19, ua silia ma le 122,000.

O le aso ua faapotopoto ai e le alii Peresetene o le malo o Falani, ia Emmanuel Macron, ia taitai o lona malo aua se sailiga o se auala e mafai ai ona taumafai e taofiofi le pepese o lenei faama’I I totonu o lo latou atunu’u.  Ua iai nisi o Saienitisi ma Faauluuluga o Aoaoga, ua fautuaina le faatuai ona toe tatalaina o aoga po o le toe faatulaga o seisi Sa mo tagata o le atunuu.

FAALAVELAVE LE KOVITI-19 I FEMALAGAIA AE LE TAOFIA AI FAATAUGA

NEWARK, N.J. (AP) — E ui ina taofia le tele o fuafuaga a aiga ma itumalo ona o lenei faama’I matuia o le Koviti-19, ae peitai, ua ripotia mai le leai o se a’afiaga o faatauga I vaitaimi o Aso Fiafia.

Na faateleina faigamalaga a vaalele na taofia I le aso ananafi, ona o faafitauli tula’I mai e mafua ona o le Koviti-19, a’o fa’aauau pea ona le iloa se I’uga o lenei faafitauli ma toe fo’I femalagaiga I ona tulaga masani.

Ae e ui I le pepesi o le ‘omicron variant’, ae peitai sa le’I faaitiitia ai le o’o atu o tagata mo faatauga aua le Kerisimasi.

Ua avea lenei ‘variant’ fou ma se tulaga ua faatuai ai ona toe fo’i le malo I lona tulaga masani ma e ono a’afia ai le tele o galuega, e pei o le tapunia o fale gaosi oloa ma alava’a, ma atili ai ona tuai le kilivaina o oloa I nu’u ma malo, ma atili ai ona alu I luga tau o oloa.

Na saunoa se tasi o faauluuluga o ofisa tau Tupe a Amerika, le susuga Robin Brooks, le toe faatuai ona tatalaina atoatoa tulaga tau tupe a le malo o Amerika ma e le o manino le umi, po o le loloto o aafiaga o lenei faafitauli, I tulaga tau tupe a le malo.

I le taimi nei, ua silia ma le 1,100 faigamalaga a vaalele I Amerika ua taofia ona o a’afiaga o le Koviti-19, ma ua 130 faigamalaga ua taofia mo le Aso Gafua.

Ua fa’ailoa mai e ofisa vaalele a le Delta, United, JetBlue ma le American le toatele o a latou tagata faigaluega ua faate’aina ona o le leai o ni a latou femalagaiga, e mafua mai lava I le faama’I o le Koviti-19.