Pago Pago - Amerika Samoa

PIC - FA’AAUAU FOA’I MO ULUA’I MASAGA 4 - NAPEKINI & “HUGGIES”

O le vaitau lenei o foa’i fa’ameaalofa mo i latou e i ai le mana’omia! Ua le ‘alo fo’i le Pacific Independent Distributors (PID) i Fagaima i le “fa’aauau pea ona fa’ao’o atu ma toe soso’o” le isi tausaga atoa e faia ai pea i latou, a latou foa’i mo le ulua’i masaga 4 Tamaitai i Amerika Samoa.

O le vaiaso ua te’a, a’o loma ai le Kerisimasi sa oo atu ai sui mamalu o le PID ina ia fa’ao’o atu napekini ma Pepa Solo o le ituaiga o le ‘Huggies’ lea e avea le latou Kamupani ma sui autu e fefa’ataua’ia nei oloa i le atunuu, i le aiga o Sokimi i Iliili.

Ua le gata ai i le Masaga 4 le latou foa’i ua a’apa fo’i i latou ina ia tapena la’ei fou uma lava mo le isi to’a fitu o le fanau, fa’atasi ai ma latou sapalai o mea a’oga, api ma penitala o peni vali ma mea e fa’aaogaina atoa e le isi vasega e to’afitu matutua o le aiga o le masaga tamaitai e to’afa lenei.

Ona o lo’o ua fa’aauau pea ona fa’aaoga e le masaga 4 napekini ma pepa solo, ua toe a’e ai se tofa a le pulega o le PID, Fritz ma Helen Gaisoa ma le Aufaigaluega atoa, o le a toe fa’aauau pea le latou foa’i, se’ia oo ina tuua e le fanau le fa’aaogaina o latou nei oloa fefa’ataua’i i le atunuu.

“Ia i ma’ua ma le tama o le aiga, o matua fo’i o lenei fanau, e matua avatu le fa’afetai, aua ua iloga ona alofagia i matou e le PID e ala i nei foa’i i masina uma ta’itasi o le 2 tausaga o le a mae’a i le masina fou, ae maise fo’i o lea ua faliu le Pulega ma le Aufaigaluega e fa’aofu ma faimeaalofa mai i le isi vaega atoa o le fanau, fa’afetai tele lava. O ai ea le tagata ua outou manatu mai ai, tau o lea, ia avea la outou foa’i taua e fai ma ala e sisila mai ai fofoga o le Atua e ona manuia, ma fa’amanuia mai i le tou Kamupani, i le pulega ma le aufaigaluega mamalu,  “Ia oa pea le liu o lo outou Sa,” e ala i fefa’ataua’iga ma faleteu oloa.” O se tala lea a le tina e fai ai o ia ma sui o le tama o Sokimi Sokimi o Iliili, e fa’afetaia le foa’i ma le toe fa’aauauina o lea foa’i taua i le aso Tofi o le vaiaso ua te’a, Tesema 23, 2021.

O lavalava uma fo’i sa tapena mo le isi vasega atoa o le fanau e atoa i ai le 11 o i latou sa fa’atauina mai lea i le “Tanoa” poo le Faleoloa o le Laufou i Nuuuli.

Na fa’atulaga fo’i ma le pu’ega ata mo le aiga atoa ina ia mautu se latou ata atoa ma le masaga 4 ia Tesema 23, 2021 na tapena mai ai le susuga Ammon Fepulea’i ona ua misia fo’i le pu’eata a le tatou Le Lali sa masani ona faia lea faiva.

Ua le gata ai pea le agaga foa’i o le PID ua latou tapenaina mai fo’i ma le anoanoa’i o isi ituaiga oloa e mafai ona tausia mama ai le lotoifale o le aiga o Sokimi Sokimi ma le faletua ma le fanau atoa e 11.

Ua tapena fo’i le PID mo le latou foa’i e masani ona faia mo so’o se Pepe lava o le a soifua mai ia Ianuari 01, 2022 ma e faia fo’i se latou fesaosoani taua mo le vasega o foma’i tiute ma tausima’i tiute i lea lava vaitau o le Tausaga Fou, pe a aulia i le alofa o le Atua.

AUAI POLOKALAMA FESOOTA’I MA LE PCSNN- FIAFIA KERISIMASI

O le aso Lulu na te’a, sa fa’atasia ai le Interact Club i Tafuna High, Samoana High ma Pacific Horizons High ma latou fa’ataunuu fa’atasi ma le  Asosi a le Parents of Children with Special Needs se latou fa’atasiga e fa’afiafiaina ai fanau nei e soifua ma mana’oga fa’apitoa.

Mai le tele o tausaga, o se fa’atasiga lea ua sili ona to’atele ma ua fa’afiafiaina uma lava vaega sa tofu sao mo le fa’amoemoe ae maise ai lava le fanau o soifua ma mana’oga fa’apitoa, lea e fa’asino tonu i ai lenei fa’amoemoe fa’aletausaga.

Na sau Santa Claus i le DWYA i Tafuna lea sa avea ma nofoaga fa’apitoa e fa’atautaia ai lea fiafia tele. Sa ia aumaia fo’i o meaalofa sa sailia fa’apitoa e Interact Clubs mai a’oga nei e tolu, fa’atasi ai ma le Asosi a Matua o Fanau o Soifua ma Mana’oga Fa’apitoa i le tino ma le mafaufau.

Peita’i o le tele o mea sa tufatufaina mai muamua le tausamiga o taumafa e masani ona fa’afiafiaina ai le fanau, ona sau ai loa lea o Santa e tufatufa mai latou meaalofa.

Ua fa’ailoa mai o sailiga o nei meaalofa sa galulue gaua’i i ai fanau uma ua avea ma totino o Interact Clubs i a’oga maualuga a Tafuna Samoana ma Pacific Horizons. o isi a’oga maualuluga ua mae’a fa’atula’ia ai Interact Clubs a le Rotaract Club a le Rotary Club e aofia ai ma Leone High. O latou poloketi e fa’atautaia i le tausaga atoa e sailia ai e i latou meaalofa nei ua taua’aoina mo lea fa’amoemoe e fa’afiafiaina atili ai agaga ma loto o le fanau o lo’o soifua i latou ma a’afiaga tuga o le tino poo le mafaufau i le atunuu.

Ua fa’ailoa mai nei, o le fa’amoemoe tumau ua i ai nei a le PCSNN ina ia mafai ona fa’atautaia lava lenei Fiafiatele i tausaga ta’itasi e avea o se poloketi fa’atautaia fa’atasi a Inateract Clubs ma Rotaract Clubs uma o le Rotary Club i tausaga taitasi, ma e galulue fa’atasi i ai ma le PCSNN.