Pago Pago - AMERIKA SAMOA

FAI MEAALOFA PACIFIC INDEPENDENT DISTRIBUTORS & ANA PA’AGA - ULUAI PEPE 2022

Talu mai le tausaga 2016 sa a’e ai se taofi o le pulega ma le aufaigaluega a le PID Inc. fa’atasi ai ma latou pa’aga, Kimberly-Clark® o le kamupani o lo’o gaosia ma sapalai mai latou oloa tau le tausiga o fanauiti, lea ua fa’ameaalofa atu ai napekini ma pepa solo mo pepe o le Huggies mo le ulua’i pepe o le tausaga. O le PID Inc. o lo’o latou fefa’ataua’ia nei oloa i le atunuu. Ua iloga fo’i le lelei tele o lea ituaiga o napekini ma e fiafia i ai le to’atele o tina o le atunuu e tausia lelei ai a latou pepe fou.

Ua le gata ai i lena le foa’i, ae ua taua’aoina fo’i nei ato fa’ameaalofa mo tina o pepe ma afai lava ua tele tapenaga, ua fa’asoa uma atu mo tina uma olo’o maua atu e lenei aufaigaluega o lo’o i ai ma latou pepe fou i le potu o talavai a tina ma pepe fou.

Ua le ese fo’i lenei tausaga, ua latou fa’atino le foa’i mo le pepe fou na soifua mai ia Ianuari 01, 2022 ma sa fanaua o ia lenei i totonu o le ta’avale a le EMS na aumaia ai fa’atopetope i la’ua ma si ona tina i le falema’i. Na fa’amauina mai e le EMS le taimi fanau o lenei pepe e 12:23am i le tulua o le po ma ao. O ia o le pepe tama ma o se alo e fa’asino Lisale ma Fiatuina Polevia mai Leone.

O le mamafa o pepe e 8lbs 6oz ma ua fa’ailoa mai o ia o le lona 6 o le fanau. Ua avea lenei meaalofa ua taua’aoina mo pepe e fa’amanuia atu ai fo’i ma le tausaga fou i ona matua le isi vaega uma o le fanau o lo’o fa’amuli mai i le aiga. 

Ua fa’ailoa mai sa i ai le isi ali’i fo’i na soifua ane i le afiafi o le aso To’ona’i Ianuari 01, 2022 ma e 7lb 01oz le mamafa, ae o ia o le ulua’i pepe ua talia fiafia e ona matua e amata ai fo’i lenei tausaga 2022.

Ua le gata ai iina le alofa ma le lima mafola o le PID Inc. ma ana paaga e aofia ai ma le Pacific Elegance. Ua latou saunia fo’i ni oloa eseese e tausia lelei ai le soifua maloloina lelei o le tino ma fa’atofusia ai le aufaigaluega atoa i le Potu o Tina Failele, Potu o Pepe Fou ma le Potu o Talavai a fanauiti i ona ali’i ma tamaitai foma’i fa’apea ma tausima’i uma o galulue ai i le tausiga lelei o tina ma latou pepe.

O lea foa’i o se fa’atinoga o le agaga fa’afetai tele i o latou a’ao ma le galulue malosi ai ina ia mautinoa e fa’afaigofie ona soifua mai ni pepe aulelei i le tatou atunuu. O le aotelega o meaalofa nei e 40 e fa’atulaga lava ia tofusia ai le aufaigaluega uma i nei potu talavai. Ua aofia i nei ato fa’ameaalofa o le $100. e taumafa fua ai se ‘aiga fiafia i le DDW Beach Cafe ma isi mea ua foa’ia mai e le Kimberly-Clark® e aoga mo le tausiga o le tino.

TAUAU FA’ATULAGA SUEGA E TOLU O LE COVID I HAWAII - TOTOGIA E TAGATA MALAGA

O i latou uma o tagata e le’i fa’amaonia e nonofo mau i Amerika Samoa, e tauau ina totogia e i latou suega e tolu e ao ina faia i Honolulu a’o le’i malaga mai i Amerika Samoa.

I le fonotaga a le Komiti Fa’afoe o le Covid-19 i le masina ua te’a sa fa’ailoa mai ai e le fa’atonu o le Medicaid Sandra King -Young, e afua mai ia Ianuari 27, 2022 o sui uma lava e le o nisi e nonofo mau i Amerika Samoa o le a le mafai ona latou taliaina penefiti poo tautua masani a le Medicaid.

O le uiga o lea saunoaga, ona o le totogi o suega sa masani ona faia fua ae totogia lea e le Medicaid i lana paketi mo Amerika Samoa.

O lea faiga sa le mafai ai ona fa’apoopo atu se isi avega i le vasega o tagata femalaga’i, ae maise o e uma e alaala ma faigaluega i Amerika Samoa ua toe taliu mai i fanua ma aiga.

O le totogi o suega nei e aofia ai le totogi o suega o le 19 aso a’o le’i malaga mai, 5 aso a’o le’i malaga mai ma le 24 itula a’o le’i malaga mai i Amerika Samoa nei. O mea ia o lo’o aiaia i le TalofaPass lea e fa’aaogaina mo femalaga’iga e Amerika Samoa.

“O i latou uma e le o nisi ua nonofo mau ma e le o ni tagata ua fa’amauina o sui e nonofo mau i Amerika Samoa o le a totogia lava e i latou latou suega na e tolu.”

Ua fa’amalamalama atili e le tamaitai fa’atonu, “O suega uma nei e fa’atautaia i Amerika Samoa o lo’o totogia lea e le Matagaluega o le Soifua Maloloina.”

Ua fa’ailoa fo’i se taofi o le tamaitai fa’atonu o le Disaster Assistance & Petroleum Management, Lisa Tuatoo, “Atonu o le a i ai fo’i seisi fa’atupega e maua mai e le FEMA e mafai ona totogia ai suega Covid-19, ua le mafai ona totogia e le Medicaid mo e malaga mai.”

Ua fa’apea fo’i ona fa’ailoa maise taofi o le ali’i Loia Sili Fainuulelei Ala’ilima Utu, “Ia fa’autagia mai fa’amolemole e fa’aaofia atu le vasega o Loia lea e tatalia le ulufale mai e fia fa’atutumu avanoa mo le vaega o avanoa a le matou fo’i matagaluega ina ia lelei fa’agasolo galuega a le tatou Malo.”

Na fa’ailoa mai e le Dr Elizabeth Lauvao le fuafuaga fa’ataoto mo le aumalaga mai ia Ianuari 06, 2022, ua aofia ai ma le 7 aso e nofova’ava’aia ai i le 3 nofoaga ua fa’atulaga pe a to’ai taunuu mai.

Ua fa’ailoa mai nei mea uma e fa’aaoga i ai se sailiiliga auiliili a sui ta’itasi o le Komiti Fa’afoe o le Covid-19, ina ia aluga lelei mea uma, ae le’i mautu mai se sailiga o le ituaiga Covid-19 fou ua alia’i mai fo’i o le Omicron. Ua fa’ailoa mai ua matele fo’i ina lofia le tele o atunuu o le lalolagi i le verusi fou lenei.

Ua fa’ailoa mai e le sui o le Ofisa o le tatou Malo i Hawaii, le susuga Suafaasisina Polu, e silia ma le 300 i latou ua mae’a lesitala mai i le TalofaPass mo le malaga lea ia Ianuari 6, 2022 ma ua mae’a fa’aoo mai iuga o a latou suega muamua i le aso 2 Ianuari, 2022.

E to’alua sui o le Ofisa Autu o Amerika Samoa i Hawaii sa auai i le ulua’i fonotaga lenei a le Komiti Faafoe o le Covid-19 i Amerika Samoa O Kurt Fevella ma Elizabeth Tatofi Tavake.

O loo asiasi mai i la’ua i le atunuu inaia mafai fo’i ona fa’amalamalama a’ia’i i tulaga uma o lo’o gaua’i i ai le Komiti Fa’afoe lenei ina ia fa’atautaia aga’i i ai latou tiute fai i tagata femalaga’i mai i le atunuu.