Ads by Google Ads by Google

TALA O LE LALOLAGI


[ata: SN]

Pago Pago - AMERIKA SAMOA

 

FA’AOPOOPO AUFAIGALUEGA FALEMA’I, LBJ

 

Ua i ai nei se fa’aopoopoga lelei mo le aufaigaluega a le LBJ Medical Center i Fagaalu talu mai ona mae’a fa’anofoesea le vasega o foma’i ma iai sui uma na malaga mai i le malaga tu’usa’o mai Fiti i le fa’aiuga o le tausaga ua te’a.

 

Fa’ailoa e le susuga le Pule Sili o le Falemai Faumuina John Faumuina, o sui fou ua fa’aopoopo mai i le aufaigaluega a le falema’i ua mafai ona fa’atumu ai nisi o avanoa sa i ai, aua le fa’aatoatoaina lelei o le fa’ataunuuina o galuega a le tatou falema’i.

 

E to’aono foma’i mo le falema’i tele, sa malaga mai i le ulua’i malaga tu’usa’o mai Fiti ia Tesema. E to’alima o nei foma’i, o fou i le galuega ae to’atasi lava o le sui ua toe taliu mai i fanua mo ona faiva fa’aauau i le tau togafitia o gasegase o le atunuu.

 

E to’atasi le sui e foma’i mo Fa’ata, toa’tasi le foma’i o gasgase lautele, e to’atolu foma’i mo le ER ma le foma’i mo tina ma’itaga ma fananau, lea ua toe taliu mai i fanua. O le isi to’alua o sui e mafai ona galulue i le Lab poo le faletalavai ma tui toto, ae o le isi o se Inisinia i masini e fa’aaogaina mo togafitiga.

 

Ua fa’aauau pea lava ona maua mai le fesoasoani tele a le LBJ Medical Center mai le Ekalesia a Iesu o le Au Pa’ia o Aso e Gata Ai, lea e ofo mai e tautua i tofiga foma’i fa’apitoa ma isi fo’i o latou faletua o tamaitai tausima’i pasi. O le fa’afetai lava mo lea fesoasoani sili ua agava’a ai Samoa e ala i le tautua a lea Ekalesia ma ona sui misiona fa’afoma’i.

 

O le isi lava tautua e sili ona mo’omia lea e maua mai ai le latou foma’i fa’apitoa mai Utah ma le Ekalesia Mamona, o le foma’i fa’apitoa mo ponaivi ma so’oga o ivi o le tino. O le isi o le foma’i e fa’apitoa mo le taotoga ma le siakiga o tuasivi, ma foma’i e nafa ma tina ma’itaga ma pepe fou, o se isi mea e faigata tele ona maua mai e le pulega o le tatou falema’i tele.

 

“O lo ua galulue i latou nei mo le isi 18 masina ma e fa’afetaia tele lea tautua. Ua tele fo’i suiga ua va’aia i tagata uma sa fa’ataunuu a latou taotoga ma siakiga e foma’i eseese sa tautua mai i le tatou falema’i i tausaga ua te’a, o se fa’afetai si’itia lea i aso ta’itasi ona o se ala ua fesoasoani mai ai le LDS i lo tatou falema’i ma le mamalu lautele.” O se tala lea a Faumuina John Faumuina, CEO i le LBJ Medical Center.

 

AMATA MATAITUINA VIRGIN BLUE AUSETALIA FEOA’IGA I LE VA O SAMOA

 

E ui o lo’o lutia le lalolagi ma le Alamoana o le Pasefika i le Covid-19 ma ona fa’asa, ae ua amata ona va’ava’ai toto’a mai le Virgin Blue a Ausetalia i feoa’iga i le ea mo Samoa i le amataga o lenei tausaga fou.

 

Ua faailoa mai fo’i e le pule o le Transport a le Malo o Samoa, Magele Hoe Viali, ua mae’a ona toe talosagaina mai le fa’afouga o le Laisene o le Virgin Blue a Ausetalia mo feoa’iga i le Ea e uia ai Samoa.

 

Ua fa’ailoa mai fo’i e Magele Hoe, “E tatala lava le laisene o le Virgin a Ausetalia e fa’afoea ai latou malaga i le va o Ausetalia ma Samoa, ae na taofia lava ona o le amataga mai ona a’afia malo ma fa’atula’ia fa’asa mo feoa’iga fa’avaomalo e feso’ota’i sa’o mai ma Samoa.”

 

“O le talosaga ua mae’a umia nei e le matou ofisa, e toe tatala ai feoa’iga i le va o Ausetalia Samoa & Ausetalia [ASL] Air Service License, lea na tapunia ona o le Covid-19 i le lalolagi, ae le’i fa’apea o se lape i le tautuaina o atunuu e lua.”

 

Ua toe fa’ailoa mai fo’i e Magele Hoe, na mua’i pasia fo’i e Samoa le tusi pasi o le Foreign Air Operator Certificate mo le Virgin i le tausaga e 2020, ae ua mae’a uma le aoga o le latou laisene i lea taimi i le tausaga a te’a 2021. O lea la ua toe amatalia ona fa’atalosagaina le toe pasia o le latou laisene mo feoa’iga i le ea.

 

Peita’i i le taimi nei, o lo’o taofia lava fo’i feoa’iga a le Virgin i Ausetalia ona o le Covid-19 ma ona fa’asa fa’avaomalo ma fa’alotoifale lava fo’i i le latou malo.

 

Ua fa’ailoa mai i Ausetalia, o lo’o ua poia fa’atasi nei le fiafia o tagata ma feso’ota’iga ma aiga ona o le a’afiaga o aiga i le to’atele ua po’ia i le Covid-19 fou o le Omicron, e silisili fo’i ma e ese fo’i ona auga.

 

Ua tele malaga e uia ai Ausetalia ma amatalia mai Ausetalia mo isi malo ua le fa’ataunuuina ai ia malaga mo fafo mai o le atunuu.

 

Ua matele ina le lava pailate mo faigamalaga aua o lo’o ua fa’anofoesea i taimi uma e aofia ai nisi ua fa’amaonia latou suega sa malaga mai i a latou va’alele. O se isi lea fa’aletonu ua a’afia ai feoa’iga ona o le tetele mai o le Omicron i Ausetalia atoa.