Pago Pago - AMERIKA SAMOA

FOA’I LEALAIFUANEVA PETER REID FOUNDATION - BOYS & GIRLS CLUB AMERIKA SAMOA:

Ua to’ia fo’i se tasi o Kalapu aoga i le atunuu, “ Boys & Girls Club Amreican Samoa [BGCAS]” i le foa’i a le Fa’alapotopotoga agaga foa’i a Lealaifuaneva Peter E. Reid i le latou foa’i fa’aletausaga e $8,000. ma ua fesoasoani fo’i i le fa’atautaiga o le polokalama o lo’o fa’atautaia a i latou “Money Matters: Make It Count”.

O le polokalama fa’apitoa lea ua faatautaia e le BGCAS ina ia iloa lelei e le fanau a’o talavou i latou, le aoga o le tupe i so’o se mea e manatu le tagata e fa’atautaia i lona aiga, i lona olaga ma lana a’oga foi. E le gata i lea, ae o le a silafia ai fo’i e le fanau, e ao ina faia le latou vaega ina ia fa’aititiia le fa’aalu sese o tupe i totonu o latou aiga, so’o se fa’alapotopotoga e auai ai i latou, ia fa’asoasoa ma fa’aaoga tatau le tupe i mea e aoga ma fa’atuputeleina mai ai atili le tamaoaiga tausi o se aiga ma se fa’alapotopotoga.

E talu mai le tausaga e 2017, e faia lava le foa’i lenei a le Lealaifuaneva Peter E. Reid Faoundation i le BGCAS, o se latou toe fa’afo’i lea i le mamalu lautele o le atunuu, e tusa ai fo’i ma le fesoasoani tau fefa’ataua’iga a le atunuu i a latou tautua eseese o lo’o fa’atautaia pea lava i le atunuu.

Ole tamaitai Taitaifono, o le  Lealaifuaneva Peter E. Reid Foundation, Olivia Reid sa avea ma sui o le fa’alapotopotoga loto foa’i, e fa’ao’o atu le foa’i taua i le fa’atina poo le taitaifono o le BGCAS, Maryann Tulafono ma le latou aufaigaluega atoa, o a’otauina le fanau talavou i le latou Kalapu i Tafuna.

O polokalama uma o lo’o fa’atautaia i le BGCAS ua fa’atutu lea i le taumafaiga e aotauina le fanau talavou, ia lava saunia ai e ulufale atu i kolisi ma Iunivesite ma ua matele a latou aoaoga fa’apitoa i mataupu ma galuega fa’atino a le STEAM: Science, Technology, Engineering, Arts & Mathematics. Ua i ai fo’i polokalama fa’apitoa ua fa’atautaia e i latou e fa’alautele atili ai le silafia e le fanau talavou ona fa’aaogaina o so’o se ituaiga o masini laiti se’ia o’o lava i Komipiuta ma isi mea faigaluega i totonu o Ofisa ta’itasi e fa’aaogaina ai so’otaga o le Initeneti, ia fa’ata’alise so’otaga mo le fa’aaogaina i fa’amaumauga ma sailiga o fa’amaumauga aoga i a’oa’oga.

O le faletua o Maryann Tulafono e faigaluega fo’i lava o ia e le totogia mo lea lava Kalapu, e mafai fo’i ona ia fa’afaigaluegaina so’o se tasi o fia fa’aaoga lana taleni ma le silafia i nisi o polokalama fa’atautaia i lea Kalapu aoga mo le fa’amasani a’ia’i o fanau i le soifua a’oa’oina fa’apitoa i ni kosi eseese e tau sailia ai latou fa’ailoga maualuluga i kolisi ma iunivesite i fafo.

“Ua le gata i lea taumafaiga ae ua fa’apea fo’i ona matua tima’ia e le BGCAS le fanau i ala e mafai ai ona latou fa’ataututu ma fa’afitauli e alia’i mai a’o aumau i fafo ma taumafai e saili ai le atamai mo tusi pasi maualuluga, o ala e mafai ai ona latou fa’aauau pea a’oga pe a tutupu mai la aafiaga e pei o faamai fita i lenei vaitau o le Covid-19, ia iloa pea fa’aauau a’oa’oga ae tumau i le soifua ia saogalemu mai pea i na fa’ama’i fita, ma isi fo’i fa’auilavea o le soifua talavou.”

“E ala i le polokalama Money Matters poo le “Taua le Tupe” ua faata’ita’ia, fa’ailoa ma tima’ia atili i latou, ina ia iloa lelei fa’asoa le seleni, faatau na’o mea e mo’omia ae le o mea e fia maua. E taua le iloa taofiofi mai ou mana’oga sese, e le aga’i ai oe i le alatonu e oo atu i lau sini na mafua ai ona alu malaga e tausaili. Ole soifua usita’i e taua, e le se ese ai mai lou fa’amoemoe maualuga na tu’ua ai aiga.”

“E matou te fa’afetaia tele lava ile agalelei ma le lotofoa’i o le Lealaifuaneva Peter E. Reid Foundation mo lenei foa’i e faifaipea, ma ua fesoasoani atili i le fanau ua aofia i lenei Kalapu i tausaga ta’itasi. Ia fa’amanuia le Atua i pisinisi uma ona o la outou foa’i e to’ia ai pea i matou uma i le BGCAS i lenei tele o tausaga,” o se tala lea a Tulafono e tusa ai o le foa’i.

O lenei foa’i sa fa’ataunuuina lea i le Nofoaga fa’apitoa o le Boys & Girls Club i Tafuna ia Tesema 30, 2021. 

TAYLOR FARMS NORTHWEST - FIA MAUA AUFAIGALUEGA I MASINA TA’ITASI

O lo ua mae’a fa’alauiloa fa’alaua’itele le fanoga o le Taylor Farms Northwest Company i Kent, Washington, lea o lo’o gasolo i ai le toatele o e fia maua ni avanoa faigaluega i le setete o Washington i Amerika, ma ua latou fa’ailoa mai ai, “O lo’o sasi le fa’asalalauga muamua na fa’apea ai mo le masina o Tesema ma Ianuari e fia maua le 25 tagata faigaluega, e leai, o le sa’oga o lea mana’oga, e fia maua le to’a 25 o sui faigaluega e malaga mai e faigaluega i masina ta’itasi. O lona uiga o va’alele a le Hawaiian Air e malaga atu i Hawaii i masina ta’itasi e ao ina atoa le 25 o sui e fia faigaluega i lea Kamupani e malaga atu ai i fafo.”

O lo ua matauina e le’i muta la le avanoa lea, peita’i ua filifilia le matutua o i latou e talia le talosaga e amata i le 25 tausaga e aga’i i luga, ona o a’afiaga ua feagai ma le Kamupani lea talu ai e talavou tele nisi o le fanau na malaga atu muamua, ma ua fa’apea fo’i ona le mautonu lelei a latou fa’aiuga tau le soifua tausailia le lumana’i manuia.

“O le aumalaga muamua lava sa to’atele i le fanau fa’ato’a atoa le 18 tausaga ma le 20 tausaga le matutua, ua o mai e le o mautu a latou fa’aiuga fai i le soifua tau sailia ai o se lumana’i mo se aiga manuia i aiga i Samoa poo i latou lava i le si’itaga ua i ai nei. E to’atele ua fa’ama’amulu aua e le fia nonofo i fale o  mautotogi ma galulue, e fia tafafao i o latou aiga ma fa’amalie tafaoga masani o le olaga talavou. Ua fa’amatuu ese atu fo’i i latou na e o i o latou aiga ua filifili ai, ma ia faia lava le mea o manatu i ai le tagata ia e sa’oloto ma fiafia ai lona olaga.”

“Peita’i o le isi vaega lea ua matua lelei a le latou taumafaiga, ua tulituli e i latou manu o le tai taeao seia matua fa’amalie ai latou tapenaga mo nai o latou aiga e fa’amautu mulimuli mai i Amerika ma nonofo lelei ai. O le vaega lea ua iloga ai le galulue malosi o tatou tagata Samoa ma isi malo o le pasefika. O i latou na ua tatala ai pea le avanoa lenei, ona ua iloga, e malolosi ma agava’a tele o tatou tagata e faigaluega malosi ma fa’amaoni,” o se tala malamalama mai lea a Vladiva Diaz, le pule sili o lea fale faigaluega atoa i Kent.

“Ona o le tulaga e le tasi se falefaigaluega a lenei Kamupani o lo’o fia maua lava ni aufaigaluega agava’a ma le galulue malosi, o lea, ua matou fa’amaonia nei mea uma mo se aufaigaluega matutua lea sa mua’i fa’ato’ai mai. E moomia ai pea ona tatala le avanoa, o nisi ua taumafai i Samoa e faia latou visa e mafai ai ona ulufale mai, lea ua talia mana’oga sa fa’ailoa mai, e le vave lea taumafaiga ma e maua a le avanoa mo le tausaga fo’i lenei ua tatou savalia,” o se tala fiafia lea a le ali’i pule o le Taylor Farms.

O le peresetene o le Taylor Farms Northwest David Lawerence, sa ia fa’ailoa, “E matou te le manana’o e avatu fua matou tagata ua fa’afaigaluega mai i nisi o matou lala, peita’i ona o i matou lea ua ta’imua i lea faiga fou mo ni tagata faigaluega malolosi ma agaga i le galuega, o lea ua fa’avasega ai fa’apea le taumafaiga ina ia mafai ona fesoasoani atu i nisi o matou lala, pe a o’o ina tutumu uma avanoa i le matou lava lala i Kent nei.”

“Ua mafua fo’i ona gaua’i mai le matou pulega aoao o le Taylor Farms Northwest i le Iunaite Setete atoa, ona o lo’o le maua e isi lala o le kamupani aoao le matatia tau oloa fa’atau atu ma le alumia i tagata, ma le polofiti fa’aletausaga fo’i o lo’o matou maua. O le isi lava lea mea, ua mafai ai ona fa’amatu’u mai le fanoga e sailia ai e i matou lava, matou tagata faigaluega mai lea faiga ua sootaga ai ma Amerika Samoa.” O se tala lea a Lawerence.

I le kamupani aoao a le Taulor Farms e 29 ona lala ma e silia ma le 22,000 ona tagata faigaluega e aofia ai le pulega ma e i ai lala i le Iunaite Setete, Mexico ma Kanata. 

O e uma la ua talileleia a latou talosaga ua mafai ona maua avanoa i le Ofisa o Mooney Wieland i Nuuuli ma e fa’atalanoa ai sou avanoa e te malaga mai ai ma faigaluega i Kent Washington.