Ads by Google Ads by Google

TALA O LE LALOLAGI


[ata: foa'i]

Pago Pago - AMERIKA SAMOA

 

TU’UA LE MALO TUALAMASALA MICHAEL SALA

 

Ua tu’ua nei le malo e se tasi o “Malu o le Malo” sa iloga lana tautua i le vaega fa’amalosi tulafono ma o lana tautua lea e tusa ma le 50 tausaga o lo’o ia faia. Ua fa’ailoa mai o lo ua maliu o ia i le a’ai o Portland, Oregon ae o ia lava sa nofo i lona aiga, i Aumi.

 

O le Tualamasala Mike sa mua’i avea ma Fa’atonu o le Matagaluega o le Saogalemu Fa’alotoifale, o lana tautua lava lea sa avea fo’i ma Sui Komesina o Leoleo a le tatou Malo, sa ia fa’atula’ia le ulua’i lala feso’ota’i o le tatou Matagaluega o le Puipuiga o le Saogalemu Lautele ma isi Matagaluega o Leoleo i le pasefika ma le lalolagi atoa le SPICIN, o se tasi sa tula’i i le foe poo le Peresetene o le Kalapu a le Liona i Amerika Samoa nei, ma isi lava vaega o lana tautua i le matagaluega o le Puipuiga o le Saogalemu Lautele e aofia ai le OTICIDE.

 

O ia fo’i ua fa’aea i ai lona aiga e avea ma matai o le aiga Sa Leiato i Fagaitua e ala i lona suafa matai Tualamasala.

 

Na molimauina lona tu’ua ai o lenei olaga e lana fanau ma sa latou fa’ailoa maia i le mamalu o ana uo mamae ma aiga e ala i so’otaga o upega tafa’ilagi a le Facebook se latou fa’amavaega fa’amomoiloto, aua e mautinoa, e le o muta ai i lana fanau i latou o misia le mafutaga mamae ma lea tama o le atunuu.

 

“Ina ua tu’ua ai e lo matou tama le mafutaga i le lalolagi nei, ua matou iloa ua motusia atu ai ma se so’otaga sili ona mamae faauo ma le to’atele o aiga ma uo mamae i lenei olaga. O ia o se tasi e fiafia tele e faimalaga solo ma maimoa i le tele o mea e fou ia te ia. O se tama fanau a Samoa e matua fiafia i lona atunuu, lana aganuu ma uiga tausa’afia o ona tagatanuu.”

 

“E iloga mea e fa’atasi ai o ia e fiafia, e faamasani gofie i so’o se tasi ae maise lava nisi ua iloga ia te ia o lo’o i ai se mana’omia. Na te vala’aulia so’o se tasi e mafuta atu i lona aiga ma fiafia fa’atasi ma ia i lona matafaga matagofie i Aumi. E le galo o ia, aua e olaola pea ona uiga ia i tatou sa molimauina lona tausa’afia ma ana galuega lelei sa ia faia e tautua ai le lautele.”

 

E le’i leva ona tu’ua e Tualamasala le aiga i Samoa ae mafuta ma le fanau i Portland Oregon ona e tatau ona faia ana talavai. Ae leai se mea e misia ia te ia i so’o se mea o tupu i Amerika Samoa e ona o ana sootaga ma uo o sui fa’asalalau, le mamalu o nisi o alo o Amerika Samoa e avea o ia ma se tama ia i latou, lea ua avea ma ta’ita’i ma fa’auluuluga o matagaluega eseese i le atunuu, o e ua latou lagona le misialofa i lea tama o le atunuu ua faiilagi le folauga.

 

Ona ua fa’alauiloa ua tu’ua e ia le malo, ua lagona e le to’atele o ana uo mamae le fa’anoanoa aua ua folau o ia i lagima ae ua le toe maua se isi avanoa e mafuta ai e pei ona momo’o i ai. Ua to’atele fo’i nisi sa latou fa’alauiloa mai ala eseese sa latou maua ai se fa’amalosi’au, se fesoasoani tu’u sa’o mai lana afioga Tualamasala Mike e fa’aleleia atili ai latou galuega ma tomai eseese, ae maise o tautua eseese sa fa’atino a’o avea o ia ma Fa’atama o le Kalapu a le Liona i totonu o le atunuu mai le tele o tausaga.

 

O le a toe maua mai se fa’aaliga fa’alaua’itele e tusa o ona toe sauniga ma nisi fa’amaumauga e tusa o ana tautua eseese i lona aiga potopoto ma le tautua i fa’alapotopotoga eseese sa auai a’o soifua o ia.

 

Avatu fo’i le fa’amaisega a lenei ala o fa’asalalauga i le fanau Jennifer ma Mathew Sala ma le aiga atoa ona o le tu’ua o le malo e le afioga Tualamasala Michael Sala.

 

TAUTUA MO TUSIGA O FANAUITI & FAATELEINA FOI AVANOA FAIGALUEGA

 

I se lipoti a le Matagaluega o Alagamanuia mo Tagata Lautele DHSS, ua fa’ailoa ai leTeritori o Amerika Samoa ua fa’ateleina avanoa faigaluega mo lea vaega o le tautua i Day Care poo nofoaga o tausia ai fanauiti ona fa’atupega fa’aopoopo a le Covid-19.

 

O le aofai o Nofoaga e Tausia Fanauiti ua siitia mai le na’o le 24 i le tausaga 2020 i le 111 i le taimi nei, e aofia ai ma le Day Care ua fa’atautaia nei e le LBJ Medial Center lea e mafai ona tausia ai fanau i le 24itula, 7 aso o le vaiaso.

 

I le faitauga ua i ai nei e 30 Day Care Centers, 3 Family Child Care Homes, ma le 78 o nofoaga ua tausia ai fanau i fale o aiga ua tausia lelei ai a latou fanauiti.

 

O le Fale o le Aiga ua tausia lelei ai latou fanau ua avea o se pisinisi ma ua fa’atautaia mai lea i totonu o le lotoifale o se falenofo o le aiga. E na’o le 10 tamaitai ua agava’a i le tausiga lea, e tatau ona tausia lelei ai. E tatau ona to’alua nisi matutua ma agava’a mo le tausiga o fanau nei, ua talia le tagata e ona le maota ma se isi e fa’aopoopo atu i ai, e avea ma faiaoga i nei fanau uma e to’a 10.

 

O le Nofoaga ua tausia ai fanau i falenofo o aiga Home Center, ua fa’aaogaina ai so’o se tasi ua mae’a agava’a e tausia fanau, ua mafai ai ona ia tausia se tamaititi mai lona lava fale. O le aofai o fanau e mafai ona tausia e lea sui ua fa’atulaga lea i le matutua o fanau o lo’o tausia ma va’ava’aia lelei e lea sui.

 

Ua fa’ateleina e le Matagaluega avanoa e mafai ai ona fa’atula’ia Home Centers poo sui agava’a e tausia fanau i totonu o latou aiga, ina ia mafai ona fesoasoani lea i tina ma matua ua faigaluega i latou i galuega e le mautinoa le taimi e vala’au ai e tatau ona faigaluega, poo matua e faigaluega 24/7.

 

Ua siitia foi e le feterale le totogi e tatau ona ofoina mo i latou ua fa’atautaia le tautua mo fanau, le vasega o tausitama. Sa masani ona totogia i le $200. lea ua siitia nei i le $600 i le tamaititi e tasi mo le nofoaga o tausia ai fanau.

 

Ua fa’amauina mai e le lipoti lea a le DHSS e 450 i latou ua faigaluega nei ae faatupe e le Child Care Development Fund. Ua fa’apea fo’i ona va’aia ua tatau ona siitia maualuga fo’i le totogi o i latou ua tausia fanau, poo i latou o lo’o faigaluega i Day Care Centers ma Home Centers i le taimi nei.

 

Mai ia Oketopa 01, 2021 o le totogi maulalo sa fa’amauina mo sui e tausia fanau i nofoaga nei e $5.40 i le itula, peita’i i le taimi nei ua fa’afaigaluegaina ai sui uma i le $5.50 i le itula ma sili atu i nisi o lo’o fa’auluulu i ai nei tautua.

 

O sui foi ua mae’a pasia ma taua’aoina tusi pasi o aoga fa’apitoa mo le avea ai ma tausitama, e i ai ni a latou siaki fa’ameaalofa e mafai ona taua’aoina e ese mai a latou lava totogi masani pe a lelei lava ona fa’afoea latou polokalama i totonu o Day Care o lo’o latou fa’atautaia.

 

Mai fa’amaumauga a le Matagaluega ua mafai ona tusia ai 171 faiaoga ma sui ua faigaluega i totonu o Nofoaga Tausia Fanauiti ua agava’a i siaki fa’aopoopo nei ona ua mae’a pasia uma e i latou aoaoga fa’apitoa e avea ai ma sui agava’a e faigauluega i Day Care mo le tausia lelei o fanau.

 

O i latou lea sa mafai ona taua’aoina i ai le aotelega e $34,300 o le tinoitupe i masina ta’itasi