Pago Pago - AMERIKA SAMOA

FAILAGA O LAFOGA TAUSAGA 2021 - AMATA IANUARI 24

O le aso Gafua o le vaiaso lenei, aso 24 o Ianuari, sa amata ai ona faila lafoga o le tausaga 2021 i le Ofisa o Lafoga a le malo.

Fa’ailoa e le malo i pepa o fa’amatalaga e fa’apea ua  mafua ona fa’atuai faila lafoga o lenei tausaga, ona sa mua’i fa’atulaga ma faia suiga fou i pepa talosaga o lafoga mo lenei tausaga.

O nisi o ia tulaga, o le tusi ua fa’anumeraina 6419 lea e tatau ona susu mai ma i latou sa tauavea fanau i a latou lafoga ma sa maua fa’amanuiaga mo lafoga a le fanau ia Oketopa ma Tesema 2021 - mo le Advance Child Tax Credit. 

O tusi nei ua maea faia ma ua tuuina lea i pusa meli mo i latou e i ai pusa meli i le fa’atumuga o latou lafoga. Mo i latou sa maua mai fo’i latou lafoga i ala sa taua’aoina mai ai i le Ofisa o le Disbursing a le Malo, e ao lava ina toe aga’i ane i lea ofisa mo a outou tusi a’o le’i malaga mai e faila lafoga fou o le tausaga ua te’a.

Ia mafai lava ona taua’aoina sa’o nei tusi i le sui o le a failaina au lafoga tusa lava foi poo le sui faipisinisi ua failaina lau lafoga.

E aoga lea tusi ina ia iloa patino le fa’atumuga o lau pepa e le sui faila lafoga, ma o le a mautinoa sa’o ai le aofai o lau siaki o lafoga a le fanau e maua mai.

Ua fa’ailoa o le failaga o lafoga lea e le totogia e le mamalu lautele ae fa’afoea lea a le Ofisa o Lafoga a le tatou Malo, e amatalia tonu lea ia Ianuari 31, 2022. O lea polokalama e le aofia ai pisinisi ma e fa’atapulaa mo tagata faila ta’itoatasi. 

Mo i latou e faila taito’atasi lafoga e muta mai i le $25,000 a’o e faila fa’atasi e muta mai i le $50,000 le totogi na maua i le tausaga fa’aletupe 2021. Ua le mafai ona faila faatasi ai ma se isi ou tupe maua mai ni pisinisi ua e fa’atautaia.

Pe afai e sili atu lou totogi na maua i tinoitupe ua fa’atulaga mai, o lona uiga e ese le ituaiga failaga e tatau ona faila ai lau lafoga, ma o le a fautuaina oe e faila lau lafoga tau pisinisi, ma o le a fautuaina fo’i oe e va’aia se tagata faipisinisi tau lafoga totogi e faila mai ai lau lafoga o lenei tausaga.

Mo fa’amaumauga o pepa fanau ma saogalemu a le fanau a i latou ua faila mai ma tagata tausi, e tatau ona fa’ao’o mai pepa saogalemu ma pepa aso fanau moni o i latou o tausia e ia.

E le fa’atagaina ni kopi o nei pepa fa’amau ma o le a fa’apena fo’i ona va’ai patino le au faila lafoga i lou foi pepa fa’amaonia o oe lea e failaina lau lafoga 2021.

Ma ia atoatoa uma ia te oe pepa o lo ua mana’omia ona faila ai lau lafoga.

SAILIGA FOA’I MO TONGA - E LATOU PELEGA I AMERIKA SAMOA

Ua le fa’atali le mamalu lautele o tama fanau uma mai Tonga o lo’o alaala i Amerika Samoa i le taimi ua fa’atulaga e le Malo ina ia amata ai latou sailiga, ae ua amata ona faia e i latou a latou saliga ma ua fa’atautaia lea i nofoaga ua masani ona faia ai nei taumafaiga i le itu i tai o le Faletifaga i Nuuuli.

Na amatalia nei taumafaiga uma i le aso Toona’i ua te’a ma ua lalamua i a latou taumafaiga o le suavai taumafa ma nisi o mea uma e mafai ona fa’aaoga i totonu o aiga e i ai lavalava ma ieafu, taga aluga ma solo ta’ele ma mea fa’apena, ae maise ai o le seleni e foa’ia ua talia lava soo se meaalofa.

“Ona o le pa ai o le maugamu o Hunga Tonga-Hunga Haapai ua matua leai ni fale e nonofo ai nisi e to’atele, leai ni mea’ai ma ua mautinoa ua muamua lava fa’atama’ia le suavai manino mo le taumafa i nei motu o Tonga. Ua le gata ai i le maugamu ae ua soso’o lava ma le Tsunami ma matuaina mai ai i le pa o le maugamu, ma ua mana’omia ai lou agalelei ma le tausoa i le pagatia ua oo nisi o tatou uso ma aiga i Tonga,” o se fa’asalalauga lea na saunoa i ai le susuga Tevita Paea.

“Poo le lava mea o le a taulimaina ona o lou agalelei, e talia uma lava, fa’afetai le alofa!”

Na iloga ona fa’aaoga tatau e le mamalu lautele o le atunuu lea taumafaiga ma le fale’ie sa fa’atuina mo le auina ane i ai o latou fa’amomoli alofa, ma ua fa’apea fo’i ona foa’ia so’o se mea ma le seleni.

Ua fa’ailoa mai e Paea, o le aso 15 Fepuari, 2022 o le a tuuva’a ese atu ai le va’a folau ma le uta o nei fa’amomoli uma lava. O lona uiga o le isi lua vaiaso o soso’o nei o le a faia ai pea lea sailiga mo foa’i mamala ma o le a tuufa’atasia mo lea va’a folau mo Tonga.

Telefoni mo foa’i pe afai e fia malamalama atili ini mea e fia fa’afesiligia: 258-1465,733-4286 ma le 733-2638.

Ua maea fo’i ona fa’auia atu le fe’au fa’amafanafana ma le fa’amaisega a le tatou taitai, Kovana Lemanu PS Mauga, i le afioga le Tupu o Tonga George Tupou Vl, i le vaiaso ua te’a, fa’apea fo’i ma le fe’au fa’amaise ma fa’amafanafana mai ia Uifa’atali Amata, le tatou Faipule i le Konekeresi mo Tonga.