Ads by Google Ads by Google

TALA O LE LALOLAGI


[ata: foa'i]

Pago Pago, AMERIKA SAMOA

SOOFAATASI EKALESIA ASO FITU CORNERSTONE SAMOA SDA & ASO FITU SAMOA I AMERIKA - SAPATI O LE FA’AMANATUGA:

Ina ia mafai ona maua se mafutaga fa’atasi a Ekalesia Aso Fitu Samoa e lua ua fa’atautaia ma ua malolosi fo’i a latou tala’iga i tagata Samoa o alaala i le Setete o Uosigitone, sa fa’atulaga ai e ta’ita’i le latou Sapati Tuufa’atasi Fa’afalelua i le Aso Sapati na te’a nei.

“O le taumafaiga lenei ua fai si leva o fa’atino mai, e aoga i le tulaga o le fa’amasani o le auuso, ae o le agaga fo’i o le fai uso ma faifai mea fa’atasi i le Talalelei, o se mea fa’amalosi agaga, ma fa’afiafiaina atili ai le vasega o talavou e mafuta fa’atasi.” O se tala lea a le susuga le Faife’au Pr. Tau Viliamu o le Cornerstone Samoa Seveth Day Adventist Church i Kent, lea e faia latou sauniga i le Trinity Chapel.

O le Sapati lea sa fa’atulaga ina ia faia fa’atasi ai le fa’amanatuga a lenei fa’afalelua, ma fa’aauau ai fo’i se latou sootaga ua mae’a amatalia, aua o sui nei e ta’ita’ia nei Ekalesia Aso Fitu o sui totino uma mai le SISDAC-Amerika Samoa. 

O le susuga Pr. Tau Viliamu ma le Faletua Lisa Nuuuli Mailo Viliamu, ua malolo mai i ti’asa, sa la’ua galulue mai i tausaga e tele a’o i Amerika Samoa i la’ua ma le fanau i Leone SISDAC-AS lea la ua siitia mai i Washington State ma ua fa’aauau ai le la’ua auaunaga i le Cornerstone Samoan SDA. O le Faife’au sa avea o se tasi o Malu o le Malo o Amerika Samoa a’o le’i masi’i mai i Amerika nei.

O lo’o mautu uma le fanau i le Ekalesia ma ua tofu fai aiga fo’i i latou i tamaitai Samoa, lea ua atili ai ona lauolaola le galuega ma ua fa’atautaia lava sauniga i le gagana Samoa. O le Taitai Toeaina o le galuega o le tina toa o Valasi Afamasaga mai Aleipata, Samoa ma o le to’atele fo’i o lana fanau lea ua fa’atasia i le ekalesia ma ua galulue fiafia ai.

Mai le Ekalesia Aso Fitu Samoa i Amerika mai DesMoines ua fa’atasia i ai le susuga le Faife’au Pr Tupulagi Ulusago mai Puipa’a ma Vaitele Samoa ma le Faletua o Temukisa Smith Ulusago mai Aleisa ma Portland, Oregon i Amerika nei. Ua lagolagosua i le galuega le susuga le A’oa’o o Penisula Si’ofaga ma le faletua o Evi Siofaga, mai Vaitogi, Amerika Samoa.

O le ta’ita’i toeaina o le tina matua o Ofusina Eneliko Taupa’u mai Leone, Happy Valley Amerika Samoa ma Falealili Samoa, ma le tina fo’i o Sulu Faumui mai Vaiusu, Samoa. E ese mai lea ua i ai le fo’i Misionare fa’apitoa a le Ekalesia lea e aofia ai le tina o Koreti Eneliko -Michael mai Leone ma le tina o Itagia Kusitafu Wiley - Crichton. O tina matutua o lo’o faufautua i le galuega ua i ai le tina o Laina Fa’ailoga mai Vaitogi ma Imeleta Eneliko - Ifopo o Leone, Amerika Samoa ma Falealili, Samoa. O le taimi nei o lo’o avea le tamaitai o Koreti Michael ma Failautusi a le Ekalesia ae o le tamaitai o Angelina Taupau Toilolo ua avea ma Teutupe tofia o le Ekalesia lea.

Ua aofia i lea Ekalesia le 11 matafale galulue malosi, ae o le Taitai Tiakono o le susuga Patrick Toilolo, ae lagolagosua ai le susuga Tautalamaaitu Leo Adolf Aiono.

O le sosia o nei Ekalesia sa masani ona galulue fa’atasi i ai le Ekalesia a’o le sofa’i le saogalemu o le atunuu e fa’ama’i o pepesi nei le Covid-19, o le taina lea o le La’au poo galuega teu fanua [Landscaping & Tree Trimming]. Peita’i o le vaitau lenei, ua fa’asau le taulaga mai lou lafo i lou loto malie sei vagana ua toe tatala le atunuu mai le fa’asa o lo’o fa’amamaluina nei.

I le latou sauniga tuufa’atasi, sa ta’ita’ia ai e Pr Viliamu le sauniga o le Lesona, ae lauga le taita’i mai DesMoines, Pr Ulusago. O le upu sa fa’aautu i ai nei vaega e lua o le Sapati fa’apitoa, “Ia avatu i le Atua lona Vi’iga.” O le vi’iga fo’i sa lagiina e le Ekalesia AsoFitu Samoa i Amerika mo le Lauga, sa peseina ai ma le fiafia “Ia e ave le Suafa o Iesu i mea uma, Le suafa lava lea e fiafia i ai le Lagi.

O le aiga matagofie sa fa’atautaia i le Toona’i o lea Sapati tuufa’atasi, ma sa saunia lava e Ekalesia na lua. Sa leai se fa’aletonu o le talimalo a le Cornerstone, ae le’i tu’ua fo’i le fia fai mafutaga lelei o le Aso Fitu Samoa latou.

OFO ATU FESOASOANI A LE US COAST GUARD PUIPUIA LE GATAIFALE O SAMOA:

A’o fa’aletonu le Nafanua ll i le taimi nei, ua ofoina atu e le vaa a le US Coast Guard “Cutter Oliver” le latou fesoasoani ina ia latou puipuia ma va’ava’aia toto’a le gataifale o Samoa.

O ituaiga leoleoga sa moomia ona fa’atautaia pea lava o le tulaga lea o galuega fa’asolitulafono e ono fa’atautaia i le gataifale a’o leaga ai le va’a o le Nafanua ll.

O nei faiga fa’asolitulafono o le gataifale e aofia ai mea e le o lipotia, o tulafono tau fagotaga e le o faia e tusa ma aiaiga o tulafono tamau o fagotaga, aua o loo tele lava fagotaga e fa’atautaia i le gataifale o Samoa nai lo Amerika Samoa nei, a tagata Samoa lava.

O lea galuega fa’apa’aga ua leva ona fa’atautaia mai e le va o le Malo o Samoa ma le USCoast Guard.

“O le ofoina atu o lea tautua mo Samoa ua faia lava aua e i ai le EEZ o lo’o tatou fesoota’i ai ma Samoa, ma e tatau lava ona faia le puipuiga lenei a’o fa’aletonu ai le Nafanua ll.” O se tala lea a le ali’i Commander Jeff Bryant. E fiafia lava i matou e faia lea auaunaga mo Samoa, aua o i’a lava ia e fagotaina e i tatou, o lo’o tatou fa’aaogaina fa’atasi nei sosia o le gataifale, aua o i tatou lava o le usoga, e soso’o lava tatou sone fagota.”

E ui ina latou puipuia le gataifale o le atu Samoa, ae le’i i ai se taimi ua taula ai le Cutter Oliver i le latou Uafu i Samoa, o lo’o latou toe taliu mai lava e taula mai i le Uafu i Pago Pago.