Pago Pago, AMERIKA SAMOA

$10MILIONA TOE FA’ALELEIA AI GALUEGA SA FA’ATUPE E LE FETERALE A LE MALO

I se pepa o fa’amatalaga mai le Ofisa o le Kovana, sa fa’ailoa ai se agaga fiafia o le afioga i le Kovana Sili, Lemanu Peleti Mauga, ina ua mae’a fa’amautu mai le tupe fa’asoa mo le toe fa’aleleia o galuega uma sa fa’atautaia ma fausia i tupe a le Malo tele mo le teritori o Amerika Samoa e $10miliona lona aotelega, lenei tausaga faaletupe 2021. 

O lenei tinoitupe ua mae’a pasia lelei ma toina mai e le Matagaluega o le Initeria Ofisa o le Insular Affairs.

Ua fa’ailoa e le tusi fa’ato’ai a Keone Nakoa, le sui Failautusi o le Insular & International Affairs, “O lo ua fiafia tele le faigamalo a Peresetene Biden e sapaia ma fa’amalosia avanoa lelei e mafai ai ona fa’aleleia atili le tulaga o galuega atina’e, ma isi taumafaiga uma e fa’aleleia ai ala e mafai ai a atumotu ona fa’ataututu atu i suiga matuia ma fesuia’iga fa’afuase’i o le tau. Ua le gata i lea, ua taga’i toto’a fo’i i latou i ala e mafai ai ona fa’aleleia atili ala e tausia lelei ai le soifua maloloina o le mamalu lautele o aiga i atumotu fa’ateritori o Amerika”.

O tinoitupe ua atofa mai mo le toe fa’aleleia atili o galuega sa mua’i fausia e fa’aaoga ai tupe mai le Malo Tele, ua fa’apea foi ona maua ai se isi fesoasoani tele i le paketi fa’asoa ina ia toe fa’alava ai tupe atofa mo le faaleleia atili ma fa’aumiumi ona lelei pea nei aseta a le Malo aua le tautuaina o tagata lautele o le atunuu.

Ua mafai ona fa’aaogaina fo’i nei alagatupe e fa’aleleia atili ai le falema’i mo tautua lasi o lo’o ofoina mai ai mo le faafaileleina pea o le soifua laulelei o le atunuu. Ua le gata i lena a’o galuega foi e fa’aleleia mo aoga ma ala o tafega o vai ma le fa’aleleia atili o paipa mo le suavai lafoa’i poo le sua.

E le gata i lea e mafai fo’i ona fa’aaogaina lea aotelega o le seleni e fa’afetauia ai nisi o fa’atupega a le Malo Tele. O fa’atupega moomia nei e mafai ai ona fa’amatuu mai  nisi fa’atupega e fa’amama nisi o a’afiaga fita le ma’alofia, o feagai ma le atunuu, ma ua le gafatia ai e tupe maua a le atunuu ona fa’afetauia nei faaletonu.

O le fa’asologa la lenei o le $10 miliona lea ua maua mai i lona fa’aaogaina tatau:

• DPW - Ina ia toe fa’aleleia ai auala, alavai ma fausia ai auvai ma apitagalu - $1,400,000

• LBJ  Potu faatalitali & Potu Fanau ai Pepe ia fa’aleleia atili - $1,200,000

• Mea Toso Va’a i Satala a le tatou Malo e toe fa’aleleia ai nisi o mea ua fa’aletonu o lea vaega o le tautua: Ae maise ia fa’aauau ona fa’aleleia le 3000-tone ala e fa’ase’e mai ai va’a i luga mo lipea - $1,200,000

• ASTCA Galuega toe Lipea o le fiber-optic cable mo Aunu'u ma Manua - $1,000,000

• Matagaluega o Uafu & Malae Va’alele e toe fa’aleleia ai ma lipea le Potu Malolo i le Malae Va’alele - $1,000,000

• LBJ e fa’atau ai nisi Ta’avale mo galuega a le EMS [4]- $1,000,000

• ASPA 4 lelei ta’avale e mafai ona lau ai le Lapisi - $1,000,000

• DPW mo le fa’atauina o meafaigaluega tetele, Loli Pusa Sasa’a Masini suaeleele ma isi e fa’aaoga i le fausga o alatele - $1,000,000

• DPS Fa’atauga o Ta’avale Tinei Afi - $966,000

• American Samoa Government M & O ia toe fa’aleleia ai nisi o galuega ua ame’a fausia. - $514,000

150 TAGATA FAIGALUEGA A LE STAR KIST UA AMATA FAIGALUEGA

E tusa ai o fa’amaumauga ua mae’a maua e le tatou nusipepa nei ua fa’amaonia ai le aotelega e 165 o tagata faigaluega mai le polokalama a Samoa ua fa’afaigaluegaina nei  i le  StarKist Samoa.

O lea aotelega e le’i atoa ai le 200 o tagata faigaluega na mua’i fa’atagaina mai e le Malo o Amerika Samoa mo le fa’amoemoe e fesoasoani lea i le to’atuga ai o le StarKist Samoa Inc. ona ua le lava le aufaigaluega mo galuega fa’atino a le Kamupani i aso ta’itasi.

Peita’i i le taimi nei ua mae’a tapena le 150 o i latou mo galuega a le Kamupani I’a, ma ua mae’a fa’amauina mo le silafia a le au usufono o le fonotaga lona 187 a le WRFMC e ala i le Lipoti ua tapena a le tatou malo, lea e fa’aigoaina “AS Island Report.” O le fonotaga lea o lo’o ua mae’a i le aso Sa na te’a nei.

O le lipoti lenei sa tapena ma fa’auia i ala o fesoota’iga i upega tafailagi ma ua fa’ailoa ai le talosaga pea a le Kamupani I’a ina ia fa’amatuu mai nisi tagata faigaluega e silia ma le 200 ua mae’a fa’atulaga e le Malo Amerika Samoa i le taimi nei.

E pei lava ona mua’i faalauiloa atu e le tatou nusipepa nei, o nei sui faigaluega uma lava mai Samoa ua fa’amautu i se polokalama faapitoa ua fa’aigoaina o le Guest Workers a le Malo Amerika Samoa.

O nisi mea ua lipotia mai e le Lipoti ua taua’aoina mo le fonotaga lea a le WRFMC, ua aofia ai le fa’aitiitia o fagotaga ua fa’atautaia i le atunuu i le taimi nei ona o le fa’aletonu o afi o nisi va’a alia mai Pago Pago, ma ua totoe ai na’o le lua alia ua faaauauina faiva.

E fa nisi va’a alia mai Pago Pago lava ua fa’aauau ona fagota mo aiga ma le fa’atau atu i le atunuu ma e agava’a mo le fagota i totonu o le sone a le tatou malo.

Mai le Manu’atele ua fa’amauina ai na’o le tolu va’a ua fa’amauina latou fagotaga, 2 mai Ofu ma le tasi mai Ta’u, ma e matele lava e tasi le t vaiaso le taimi e fagota ai. O le fa’aitiitia o le kesi ma mea e fa’aaoga e le au fagota, o nisi na fa’afitauli o lo’o feagai ma le vasega o tautai fagota i le Manu’atele.

Ua fa’amauina i le lipoti, ua tele na’ua va’a fagota poo alia fagota ua na’o na taula lava i uafu mo va’a fagota ua le toe fagogota le vasega o tautai. O nisi o nei va’a ua fa’amauina o lo’o i ai ni galuega lipea e ao ina faia a’o le’i toe tuu atu i le tai.

Ua fa’ailoa ai foi e lima lelei  Alia Fagota lea o lo’o tatalia se tali mai a latou talosaga ina ia tali mai e le Mea Toso Va’a a le tatou malo, ona o lo ua latou fa’ailoa mai, o le mafuaga o le fa’aleagaina o latou va’a o  se lape o le tautua a le vaega o le Tautua a le Malo o Amerika Samoa i le tausaga e 2017.