Ads by Google Ads by Google

TALA MAI AMERIKA


[ata: foa'i]

Pago Pago - AMERIKA SAMOA

SIAMUPINI FSC 411EN-BN AMI FA’ALEOLEO AMERIKA SAMOA:

Mai Amerika Samoa, Hawaii ma Guam sa tauva ai le FSC 411 En Battalion, lea ua fa’ai’u ma le manuia le tatou taumafaiga ma ua tu mati’e lava i nei lala e tolu o le USArmy Reserve i le Pasefika.

Ua mae’a fa’apineina fo’i le latou manumalo a’ia’i, ma ua fa’amauina lo latou agava’a i nei tauvaga fa’amiliteri e iloiloina ai tomai ma ala o toleniga fa’apitoa ia agava’a ai soo se sui Fitafita Fa’aleoleo a le USArmy.

Ua taliu nei i fanua nei alo o le atunuu ma le pine fa’amau o le latou taumafaiga ua tumati’e i le tauvaga o le “Fitafita Silia Agavaa” poo le FSC, 303rd 411EN BN Maneuver Enhancement Brigade Best Squad i Guam. O le tolu ai lea nofoaga ua mae’a fa’atauva ai i latou, e fa’afetauia ai isi uma lala o le Ami Fa’aleoleo e 4 i Hawaii ma nisi fo’i ua tu’ufa’atasia ane i Guam, ae ua fa’ailoa le agava’a o a tatou tama fanau i tomai mo’omia e fa’atula’ia fuafuaga tatau mo osofa’iga, ma e lelei fo’i ona aiaia osofa’iga ina ia mautinoa e saofaga mai nisi fa’auilavea e sofa’i le saogalemu o le taumafaiga.

O le vaega na masi’i mo le tauvaga, ua pau lea o le FSC 411 EN BN e i ai ni totino tama’ita’i na tauva ai mai le amataga se’ia oo i lona fa’ai’uga i Guam. O se mea sili lea i le silasila ma le nofo tapua’i a le mamalu o aiga ma le atunuu fo’i.

“Lea ua vai ua mafai! O le tulaga o le galulue faatasi lea ua mata’ina ma tumati’e ai le taumafaiga atoa. O le agaga tonu lava lea o so’o se taumafaiga a le vaega au, ia so’ofaatasi i mea uma e mafai ai ona autausia le fa’amoemoe ia manuia!” O se tala fiafia lea a le ali’i pule sili o le USArmy Reserve Joshua Flatley.

O i latou ua gafatia ona aumaia i Amerika Samoa lenei manumalo ua aofia ai: SSG Utai, Genesis; SGT Oliver, Monica; SPC Faatili, Senetenari; SPC Taatasi, TJ ma SPC Feala, Anthony. Malo le tauata’i!!

FA’AAUAU LE AUAUNAGA A LE “LEND A HAND” TUFA FUA ME’A’AI I TACOMA, WASHINGTON:

O le lotoa lava a le Ekalesia mo So’o Se Atunuu i East Tacoma o lo’o ua mae’a fa’atulaga ina ia avea pea ma nofoaga e lelei mo tagata uma ma aiga e fia pikia ni pusa o ituaiga mea’ai ua mafai ona tufatufaina fua mai e le Lend a Hand Program ma ana pa’aga.

O le taumafaiga lenei e tofu lava le masina ma le aso atofaina e tufatufaina atu ai oloa si’i atoa poo le tele fo’i e moomia mo lou aiga. O nei oloa e aofia ai le tele o oloa tuuapa, o mea’ai fulisa ma fua o fa’ato’aga e aofia ai mea’ai ‘aina mata ma fuala’au ‘aina e gaosia ai mea tausami.

O le Kamupani a le Lend a Hand ua fa’atautaia lea e le tamaitai Faipisinisi o Fia Taito Tasi mai Vailoatai ma nisi o lana aufaigaluega ua latou tutu fa’atasi ina ia mafai ona fa’atautaia pea lea auaunaga lelei mo le mamalu o so’o se tagata po o le aiga o moomia le fesoasoani ma le tausiga tau mea taumafa i le setete o Washington.

Ua i ai ana pa’aga fa’apitoa mo le tapenaga o le sapalai o mea’ai e taua’aoina atu i le mamalu lautele o loo moomia sapalai o mea taumafa.

O lenei foa’I alofa na faataunuuina I le Aso Faraile, Ianuari 20, 2023 mai I le 8:30 I le taeao, ae na faamae’aina I le 10:00 I lea lava taeao.

“O le faiga lea ua masani ai le to’atele ua aoga i ai le tufatufaga o mea’ai, o le ala lea e fa’ato’ai atu ai i nisi fo’i e fou i lenei tautua, ina ia latou vave mai, e fa’atonutonu atu lava le solo mai a ta’avale ma avatu loa le sapalai ua mana’omia ma fa’ai’u ai le fa’amoemoe i le umi e na’i le 2 itula.” O se faamatalaga lea a Fia Taito ia ua feso’ota’i mai mo lenei fa’asalalauga.

I soo se tufatufaga lava e faia a le Lend a Hand, e latou te talia lava so’o se tasi e agaga e foa’ia lona taimi e mafai ai ona fesoasoani i galuega fai mo le tautuaina o le mamalu lautele e gasolo atu mo pusa mea’ai fela’ua’i. 

O le tele o taimi e ofoina atu fo’i le fesoasoani a alo o Samoa o lo’o nonofo i Seattle, Tacoma, Kent, Federal Way ma Auburn i lea lava setete, ae maise ai le Kalapu Ta’avale a Aloali’i Samoa i totonu o Washington lea e aofia ai le Dynasty Car Club.