Pago Pago - AMERIKA SAMOA

FOLASIA AGAIFANUA A SAMOA, FA’ALAUILOA TAMAITAI TUSITALA - FAPEPELE HUNKIN

O le atoaga o le 30 tausaga o le Sosaiete a Tagata Aumau i Columbus South Carolina, na fa’aalia ai fo’i le folasaga sa saunia e le tamataitai tusitala mai Nuuuli Amerika Samoa, Fa’apepele Hunkin.

O lana folasaga sa ia tula’i fo’i e fa’alauiloa mea e sili ona taua i le soifuaga o tagata Samoa i aso fai so’o.

I luga o le laulau ua mae’a teuteuina atoatoa i mea ua manatu le tamaitai tusitala e fa’ataua tele i le olaga ma le soifuaga o tagata uma i Samoa atoa. Ua i ai le La’ei Taupou ma le Manaia e tapena ai mo fa’afiafiaga fa’ale-aganuu a Samoa. O le Ofu ietoga ma le Tuiga faapea fo’i le ula nifo ma le, O le titi fulu moa ma le sei fulu moa. O le ula nifo ma taulima nifo ma ipu. 

Ua i ai fo’i ata o nai ona matua, e ui ina ua tu’ua le mafutaga, ae o le olaga o tagata Samoa e taua tele Aiga. O fa’atasiga a Aiga e sili ona taua ma osiosi aiga fo’i i so’o se mea e fai. 

Ua le misia le Tusi Pa’ia ma le Tusi Pese ma Viiga o le Atua, o mea ia e lua e saili manuia ai aiga ta’itasi o le Samoa o le Atua foafoa, o le Atua o manuia.

O lo ua i ai le fa’atagata o le Tulafale ma lana Ulafala sa folasoa, ua i ai fo’i le Tootoo ma le Fue o auupega a le Tulafale e saunoa toto’a ai. Ua le misia fo’i sei fugala’au felanulanua’i o tamaitai Samoa i lea folasaga, ma lona ili a tapilipili ai pe a vevela le tau e pei ona i ai nei i le tau mafanafana.

Na asiasia lana folasaga e le mamalu o e sa latou feso’ota’i i lenei sosaiete ma sa latou fesiligia le mafuaga e matua to’atele ai fanau a Samoa e auina atu i le vaega au, lea e litaea mai ai le tamaitai Tusitala ma ua fa’amautu ai o ia ma le fanau i lea lava a’ai. 

O sana tala ua fa’ailoa mai ai e Fa’apepele Hunkin, “O se fiafiaga i so’ose taimi se avanoa fa’apenei e fa’alauiloa atu ai le oa o le tatou aganuu, ma e tusa lava pe fia afe maila e mamao ese mai ai i matou ma le tatou atunuu peleina,o ana agaifanua ma mea e taua i o tatou olaga o se Samoa moni.”

O lana tusi lea sa avea o se tasi o poloketi na faatupeina mai e le Commission for Minority Affairs, ma sa ia mauaina fo’i lea avanoa i fa’aaliga faapenei muamua. O lo ua asiasia lana folasaga e le to’atele o sui mamalu o lea fa’alapotopotoga  e aofia ai ma nisi ua latou masani ma fa’auoa’i ona o lana taumafaiga ua a’e manumalo, i lana tusi ua mae’a lomia.

FA’AU’U DR. JOHNNY TOMA - FA’AILOGA DR. LIBERAL ARTS IUNIVESITE GEORGETOWN

E lima tausaga o tausailia ma toe faigaluega le atali’i o Amerika Samoa, Johnny Victor Toma mai Pago Pago ina ia mautu lana sailiga o lona lea fa’ailoga ma toe faigaluega fo’i o ia.

O le Georgetown University e i Washington DC, ma. ua fa’ailoa mai e Dr Toma, e ui lava ina lutia le taumafaiga i le Covid19, ae ua fa’aaoga tatau ai fo’i a’oa’oga e fa’auia i laina feso’ota’i fa’ata’alise a le Initeneti mo sailiga, suesuega ma fa’auia ai galuega mo le taumafaiga ia au.

I lana taumafaiga sa auaua’i ai ana mataupu i le tasi lava le kosi i le afa tausaga e tasi, ona o le tau fa’apalenia o lona taimi mai lana galuega o faigaluega tumau ai.

“Pau le taimi e maua ma avanoa ai e suesue ma faia ai galuega mo le fa’ailoga lenei, o le taimi ua manava mai ai i galuega.” O se tala lea Dr Toma. E ese mai lea ua tele fo’i ona fa’ailoga Masters ua mae’a umia, ma ua avea lea ma se isi fo’i fa’amauga lelei mo lana taumafaiga lenei i le Iunivesite lava o Georgetown.

O le isi mea sa fa’aumiumi atili ai lona taimi o le tausga atoa o tusi lana pepa e ‘au’au i ai lona fa’ailoga, ma sa fa’ato’a pasia lana folasaga o lana pepa na tapena ia Aperila 26, 2023 i luma o se komiti filifilia faapitoa e faafofogaina lana folasaga mo lona fa’ailoga maualuga Doctrate in Liberal Arts.

O le fa’au’uga o Dr Toma e tolu lelei sauniga tetele sa fa’atino ai, e tofu lava le aso ma le sauniga mamalu e fa’atautaia ai. O le sauniga mulimuli sa filifilia ai Dr Johnny Toma e saunoa fa’apitoa mo le vasega fa’ai’uaso o le tausaga 2023.

Sa saunoa fa’apitoa ai Dr Toma i le olaga o tagata Samoa, e tatau ona fa’apaleni lelei lava le soifuaga i le olaga fa’apapalagi ma le olaga fa’asamoa, i taimi uma, pe afai e te fia soifua manuia ma le fiafia.

O le sauniga lona lua na fa’aofuina ai loa le ‘au fa’au’u i o latou pulou fa’apitoa o latou fa’ailoga ua ausia ma ua umia fo’i ia  Me 18, 2023.  O le sauniga lona tolu na fa’atautaia lea ia Me 19, 2023.

“Ou te lagona lava le pa’i malu mai o le Atua i lo’u agaga aua  o nei mea uma, ua mae’a ma gafatia e le mafaufau ona fa’atino, aua ua ia fa’amanuia mai i lo’u sui fa’atauva’a. Ia vi’ia lava le Atua!” O se tala lea a Dr. Toma e tusa o le taumafaiga umi.