Ads by Google Ads by Google

Tala mai le Fono Faitulafono


[ata: foa'i]
ausage@samoanews.com

Pago Pago, AMERIKA SAMOA

 

SILIA I LE $9 MILIONA LE TAU O VAALELE FAAPITOA UA MAE’A

 

E silia i le $9 million le tupe ua fa’aalu e le malo e featupe ai malaga a vaalele ia na faatulaga e toe faafoi mai ai le mamalu o le atunuu na poloka i fafo talu mai le taimi na tapunia ai malaga a vaalele i le va o Amerika Samoa ma Hawaii.

 

Na taua e le Loia Sili o le malo, o se totino foi o le Komiti e gafa ma puipuiga o le faama’i o le KOVITI-19 i se iloiloga ma le Maota o Sui i le vaiaso nei e faapea, o le tulaga sa pito sili ona tele le tupe a le malo na all ai, o le totogiina lea o le nofoaga na taofia esea ai pasese i Hawaii ao lumanai ai le toe taliu mai i le atunuu.

 

O le taimi nei, e le mafai e le malo ona toe featupe se isi tulaga e taofia ai le atunuu i Fale Talimalo i Hawaii ao lumanai ai le toe foi mai i le atunuu. 

 

E pei ona taua e le Komiti Faafoe i nisi o feiloaiga ma le vaega o Tusitala, sa i ai le fuafuaga mo pasese uma na malaga mai i le atunuu latou te totogi le $500. E oo mai i le taimi nei, e toatele lava pasese e lei totogia a latou tupe, sei vagana ai se vaega toaitiiti ua mae’a ona tausisia vaega o lea maliliega.

 

TUI O LE KOVITI MO FANAU AOGA

 

Ua taoto atu nei se fautuaga mai le Maota o Sui i le Komiti Faafoe e gala ma puipuiga o le faamai o le KOVITI-19, ina ia silasila toto’a i le mataupu o le unaia lea o tui puipuia mo fanau aoga manu e lei toe oo i le taimi e toe a’e ai aoga i le masina fou o Aokuso.

 

Na taua e le afioga i le alii Faipule ia Vailoata E. Amituana’i le taua tele o le polokalame o loo faagasolo e le Matagaluega o le Soifua Maloloina, o le faia lea o tui puipuia mo fanau e i lalo o le 12 tausaga. O le unaia o fanau aoga e faia tui puipuia mo le KOVITI-19, o se avanoa lelei lea e mautinoa ai le saogalemu o i latou ma puipuia mai ai i lending faamai mata’utia.

 

Sa ia taua lona popolega o loo i ai nei nei a’e aoga ae lei soo uma fanau aoga i le tui puipuia o loo faagasolo i le taimi nei. Sa ia talosagaina foi le Ofisa o le Soifua Maloloina mo se fesoasoani i fanau ua leiloloa a latou pepa Falema’i ae o loo moomia le fia faia o tui puipuia.

 

Na taua e le Faatonusili le tumau o le Matagaluega o le Soifua Maloloina ia Vesi Talalelei Fautanu Jr e faapea, e ui o le Aso Toonai na tea nei lea na tapunia aloaia ai le polokalame a le Soifua Maloloina mo le faia o tui mo fanau e i lalo o le 12 tausaga le matutua, ae o loo faaauau pea i nofoaga sees ua uma ona faatulaga e faia ai lenei auaunaga. 

 

Na taua e Vesi le taua tele o le faia o tui puipuia mo fanau aoga. Afai ae a’e aoga ae lei taitai mae’a ona tui fanau, e mafai ona talosaga atu le Matagaluega o Aoga a le malo i le latou Komiti Faafoe, mo se faaaanaga e faagasolo ai tui puipuia mo fanau aoga i totonu o aoga taitasi. 

 

E tusa ma le 22.2% o fanau e i le va o le 12-15 tausaga le matutua ua mae’a ona faia a latou tui. Mai le fiatau aofa’i o fanau e 3,711, o le to’a 1,675 o i latou ua mae’a ona faia a latou tui taitasi, ae to’a 825 ua mae’a ona faia tui e 2.

 

MALAGA A VAALELE I LE VA O AMERIKA SAMOA MA HAWAII

 

E le o tatalaina malaga va’alele i le va o Amerika Samoa ma Hawaii, poo le va foi o Amerika Samoa ma Samoa i Sisifo. O le saunoaga tuu sa’o lea mai le afioga i le Loia Sili a le malo ia Fainu’ulelei Falefatu Alailima-Utu i se iloiloga sa faia i luma o le Komiti o le Soifua Maloloina a le Maota o Sui i le vaiaso nei.

 

O le aso, Aso Tofi, Iulai 29 lea ua faamoemoe e taunt mai ai le malaga mulimuli o va’alele na faatulaga e le malo o Amerika Samoa, lea ua mafai ai ona aumaia le silia i le to’a 1,800 tagatanu’u na taofia i Hawaii ma Amerika talu ona tapunia malaga va’alele i le tausaga na to’a nei, ona o le faama’i o le KOVITI-19.

 

O le mae’a ai o le malaga mulimuli e 8 i ai malaga sa faatulaga e le malo, ona tuu atu loa lea o isi malaga o loo mulimuli mai e faasoasoa mai e le Kamupani Vaalele a le Hawaiian Air. O loo i ai le fuafuaga e tasi pe 2 malaga i totonu o le masina, o le mafua’aga lena e le tatau ai ona manatu le atunuu o le a toe tatala malaga a va’alele, ona o malaga ia laa faasoasoa mai e le Hawaiian Air, e le o ni malaga e pei ona masani ai i vaiaso taitasi, ae o malaga i le masina. 

 

Ua i ai foi le fuafuaga a le malo e suia vaega e lesitala ai tagata i Hawaii ma Amerika e fia malaga mai i Amerika Samoa, mai le 2 o loo i ai i le tasi. O lea fuafuaga ina ia faa faigofie ai i tagata o le atunuu i fafo ona lesitala o latou suafa i le taimi e fia malaga mai ai i le atunuu.

 

E faapena foi mo malaga i le va o Samoa e 2, e le o mafai ona toe foi malaga a vaalele i aso taitasi, ae o loo fuafua pe a ma le 2 malaga i le vaiaso.