Apia - SAMOA

TOE TOLOPO LE FAAMASINOGA O LE $200K NA GAOIA

O lea ua toe tolopoina nei e le Faamasinoga Maualuga i Samoa ia le fa’amasinoga a ni alii se to’afa, lea o lo’o molia i le gaoia o se vaegatupe e silia ma le $200,000 (tupe Samoa) mai i se kamupani, i le tolu tausaga talu ai.

O le amataga o le vaiaso nei, na tutulai ai i luma o le faamasinoga ia Navneel Nietsh Nair, Lagi Autagavaia, Pelepesite Akeli ma Tamaalelupe Silva, mo le fa’atulagaina o se aso fou o la latou iloiloga.

Na fa’aalia e le loia a le malo, le susuga ia Leinafo Taimalelagi Strickland, le mana’o o le malo ina ia toe faia se aso fou mo le faamasinoga, ona e le o avanoa mai se tasi o a latou molimau autu ona o a’oa’oga.

O lea na toe tolopoina ai e le afioga i le alii faamasino ia Fepuleai Ameperosa Roma ia le fa’aauauina o lenei mataupu i le aso 31 o Mati, 2024.  Ma se’i vagana ai Silva, ua mae’a ona toe tatalaina uma i tua leisi to’atolu, e faatalitali ai le latou faamasinoga.

Na fesiligia e le alii faamasino ia Silva i le tulaga o lana loia muamua lea sa faatonuina e le faamasinoga.  Na tali Silva, sa galo ia te ia le la fonotaga ma le loia, ma ia talosagaina ai seisi loia e avea ma ana faufautua.

Sa fautuaina e le alii faamasino ia Silva ina ia aua le manatu faatauva’a i lenei mataupu ma ia manatua, o lana loia o lo’o totogia e le malo.

Na faapea loa ona fa’atonuina le susuga i le alii loia ia Alex Sua e avea ma loia a Silva ma ia fa’auluina atu se talosaga i le faamasinoga, mo ni aiaiga aua le tatalaina i tua o Silva, e faatalitali ai lona faamasinoga.

O lo’o ua te’ena uma e i latou e to’afa ua molia ia moliaga fa’asaga ia i latou ona o le fa’aaoga sese o se vaegatupe pe a ma le $245,000 (tupe Samoa), a’o latou faigaluega i le kamupani a le Tradepac Marketing Samoa.

O lo’o ua molia i latou i lo latou ave fa’agaoi ia se vaegatupe mai i le kamupani i le va o Ianuari 2021 ma Mati 2021.

GAOIA E SE ALII TAUFA’ASESE IA LE ‘TAXI’ A SE AIGA

O se alagaupu e faapea, “Uo Uo Foa” lea ua a’afia ai nei se aiga mai Vaitele fou ina ua taumafai se Samaria Agalelei e fesoasoani i sana uo, ae liliu mai lana uo i le gaoi lana taavale.

O lenei faalavelave na tula’i mai i le amataga o le vaiaso, ina ua taumafai le to’alua o le tina o Fotutausala Ioane mai i Vaitele-fou e fesoasoani i sa la uo e suafa ia Steve Matamua mai i Lalovaea, lea sa sulufa’i atu ia i la’ua mo se fesoasoani.

Sa faamatala e Fotutausala i le Samoa Observe, o le aso Sa lea na talosagaina ai e Matamua se fesoasoani mai i lona to’alua.  Ma sa tu’uina iai e lona to’alua ia le ta’avale ma lana telefoni e mafai ai ona o la feso’ota’i, pe a alu atu Matamua e toe fa’afo’i atu le taavale i le aso Gafua na soso’o ai.

Ae peitai, na po lava le aso Gafua o fa’atalitali le ulugalii ae le toe alu atu Matamua ma sa ta’ua e Fotutausala, na fiu e vili le telefoni, ae le talia mai e Matamua.

Na ta’ua e Fotutausala, o le taxi lea, e na’o le pau lea o le auala e maua ai tupe a le latou aiga ma ave ai le fanau i le aoga.  Sa ia fa’aalia lona agaga fa’afetai i le latou Faafeagaiga i le fesoasoani atu e latou te o e su’e ia Matamua, i lona aiga i Lalovaea ae peitai, sa ta’u ifo iai e lona aiga, ua leva e le’i toe nofo i Lalovaea ia Matamua.

Sa faamatala foi e le tina loto mafatia, na lilo i manatu o si ona to’alua, o le a tauia atu o ia faapea e lana uo.

Ua mae’a nei ona fa’ao’oina atu lenei mataupu i a’ao o malu o le malo ma sa fa’ailoa ifo iai e leoleo ia Fotutausala ma lona to’alua, o le alii lea e la te tau su’ea, o se tagata ua leva ona masani iai le ofisa a leoleo, ona e a’afia i tulaga o fualaau faasaina.

TE’ENA E LE TAMAITAI FAIPISINISI MA SE ALII MAI LOTOPA IA O LATOU MOLIAGA I FUALAAU FAASAINA

O le amataga o le vaiaso, na tutulai ai i luma o le faamasinoga maualuga ia le tamaitai o Doris Te’o faapea ma le susuga ia John Petelo Tia, e tali o la moliaga e tusa ai ma fualaau faasaina sa mauaina e leoleo i Lotopa i le amataga o le masina.

O le susuga i le tamaitai loia ia Tanya Toailoa sa tula’i mo Te’o, ma ua mae’a ona ia te’ena moliaga fa’asaga ia te ia, ma e faapena foi le tali a Tia.

Na molia i la’ua nei ina ua osofa’ia e leoleo ia se fale i Lotopa i le aso 12 o Setema, 2024 ma e to’atolu i latou na lokaina mai ai.

O le lona tolu, o le susuga ia Joe Ulugia lea o lo’o faufautuaina e le tamaitai loia ia Ann Matalasi ma e le’i fa’auluina sana tali i ona moliaga.  Ae ua mae’a ona ia talosagaina se tupe fa’atulagaina e mafai ai ona tatalaina o ia i tua.  

Ua fautuaina o ia e le afioga i le faamasino ia Fepuleai Ameperosa Roma ina ia fa’aulu atu sana talosaga tusitusia ma se kopi mo le malo, ina ia mafai ona iloiloina.

Sa ta’ua e le alii faamasino ia le tala’aga o Tia i ana soligatulafono i taimi ua tuanai ma atonu o le a avea lea tulaga ma auala o le a le taliaina ai lana talosaga.

O le aso 11 o Mati, 2025 ua toe fa’atulagaina e fa’aauauina ai lenei mataupu.