SAMOA

SALALAU TALA I LE ASIASI MAI O LE 'ROCK' I SAMOA

E tusa ai ma ripoti i luga o upega tafa'ilagi, ua fa'ailoa mai ai le iai o se fuafuaga mo se asiasiga a le alii lauiloa o Dwayne Johnson po o "The Rock", i Samoa, ma o se taimi muamua lea ua toe taliu mai ai le alii ta'uta'ua, pe afai ae taunu'u lea faamoemoe, talu mai lana faigamalaga i le 2004 mo lona faafotutupu.

O lo'o ta'ua i le faamatalaga o lo'o i luga o upega tafa'ilagi, le faia o se folafolaga a Johnson i le 20 tausaga ua tuanai, i le susuga i le Malietoa Tanumafili II, a'o soifua o ia, faapea ma tagata o Samoa, o le a ia tu'u ona uiga faatamaititi.  O se faaupuga sa faapea ona faaleoina e le Malietoa, ina ua fa'ae'eina le suafa Seiuli ia Johnson i le 2004.

TO'ALUA MALILIU I SAMOA I LE AMATAGA O LE TAUSAGA FOU

E pei ona sa fa'amaonia e le Komesina o Leoleo, le susuga ia Auapa'au Logoitino Filipo i le Samoa Observer, e to'alua nisi o le atunu'u, na maliliu i le amataga o le tausaga fou 2025, na aofia ai se alii talavou i Faga, Savaii na so'a e se ta'avale a'o alu atu i lana uila.  Faapea ai ma se tino maliu o se alii na maua atu i tua o ofisa tuai o Palota, i Mulinu'u.

Ae e le'i aofia ai i le ripoti a Auapa'au ia se tama matua Vaimoso na maliu i le vaveao o le aso Sa muamua o le tausaga, a'o taumafai e vaovao se fusuaga i le va o ona atalii ma nisi o lona aiga.

I le fa'alavelave lea sa tupu i Faga, Savaii, ua faapea ona lokaina mai ai le avetaavale, ma molia i le avetaavale le fa'aeteete ae ua mae'a ona toe tatalaina o ia i tua, e faatalitali ai lona faamasinoga.

I le tino maliu lea sa maua i Mulinu'u, o lo'o faatalitali pea leoleo mo nisi faatonuga mai i le fomai faapitoa (coroner) ae o lo'o iai se talitonuga, na maliu lenei alii ina ua pule i lona ola.  Ua fa'alauiloa mai e Auapa'au i le taimi o lenei ripoti, le le'i faamautuina o le suafa ma le nu'u e malaga mai ai lea alii.

TAPUNIA UAFU MATAUTU MO SINA TAIMI PUUPUU

Ona o tulaga louloua o le tau, o lea sa tapunia ai le uafu tele a le malo o Samoa, i Matautu i le aso Lua i Samoa (aso Gafua i Amerika Samoa) ma sa fa'alauiloa mai e le Ofisa o Uafu ma Malaevaalele a Samoa (SPA), afai ae fa'aauau pea tulaga faaletonu o le tau, o le a faapea ona fa'aauauina ona tapunia le uafu i le aso Lulu (ananafi i Amerika Samoa).

E ui ina sa taofia femalagaiga a va'a ona o tulaga faaletonu o le tau, ae peitai, sa fa'aauau pea ona tatalaina ofisa o le uafu e pei ona masani ai.

Ae sa mafai pea ona fa'aauauina femalagaiga o va'a i le va o Upolu ma Savaii a'o lapata'iina e kapeteni ia tagata femalagai ina ia nonofo i totonu o potu faatulagaina o va'a, ona o le sou o le vasa i le malolosi o matagi.

FEILOAI LAAULI MA LE PALEMIA E SOALAUPULE TULAGA O LE KAPENETA

O le taeao ananafi, na feiloai ai le afioga i le Palemia o Samoa ia Fiame Naomi Mata'afa ma le Minisita o Faatoaga ma Faigafaiva, le afioga ia La'auli Leuatea Schmidt, e talanoaina le lumanai o le afioga i le Minisita, i totonu o le kapeneta, i le mae'a ai o se fono tele a le itu a le F.A.S.T (Faatuatua i le Atua Samoa ua Tasi), i le afiafi o le aso Lua i Samoa (aso Gafua i Amerika Samoa), lea na saunoa uma ai sui o le Palemene e tusa ai ma lenei mataupu.

O le aso Gafua (i Samoa) sa faatonuina ai e Fiame ia Laauli, ina ia faamavae mai i lona tofiga o le taitaifono o le F.A.S.T ma se taitai sinia o le kapeneta.

E ui ina sa lagolagoina uma e Minisita o lo'o i le itu a le F.A.S.T ia le tumau pea o Laauli e avea ma o latou taitai, ae peitai, o le faaiuga e tusa ai ma le tofi taitai o le malo, e sau lea mai i le afioga i le Palemia.