SAMOA

TU’UA’IA SE KAMUPANI TAAVALE ‘RENTAL’ I LE LE MULIMULITA’I I AIAIGA MAI I LE FAAMASINOGA

Ua masalomia le le usita’ia e se kamupani taavale ‘rental’ ia se faatonuga mai i le faamasinoga, ina ia tapunia la latou pisinisi, e aofia ai ma pasi, e pei ona fa’aalia e le loia ia Matafeo George Latu, i luma o le Faamasinoga Maualuga i le amataga o le vaiaso.

Na fa’aalia e Matafeo i luma o le faamasinoga, le fa’aauau pea ona aoina e lenei kamupani ia tupe maua mai i a latou ta’avale ‘rentals’, o se tulaga ua solia ai faatonuga a le faamasinoga.

O le itu tagi o lenei mataupu, o le Mvoice Pty Ltd ma Contextual Technology Pty Ltd, ma o lo’o talosagaina se tali vave mai i le faamasinoga ina ia iloiloina lenei mataupu.

O i latou o lo’o molia i lenei mataupu, e aofia ai Brittanie Patricia Roepke po o O’Grady, Karl Ropke ma Samoa Alofa Rentals.  O le latou loia, o Tuatagaloa Shane Wulf.

E tusa ai ma le finau a Matafeo, e 40 taavale o lo’o a’afia ma o lo’o iai se manaoga ina ia iloiloina i se taimi lata mai lenei mataupu, ona o lo’o fa’aauau pea ona aoina e i latou ua molia, ia tupe maua mai i nei taavale.

O le aso Faraile o le vaiaso fou ua fa’atulagaina e le afioga i le Faamasino o Faamasinoga Maualuga, ia Fepuleai Ameperosa Roma ia le iloiloina o lenei mataupu, i luma o le afioga i le Faamasino Sili ia Satiu Simativa Perese.

O le masina ua mavae, sa taliaina ai e le afioga i le Faamsino Sili, ia se talosaga mo le ave’esea o taavale e 60 mai i le kamupani taavale ‘rental’.

E tusa ai ma tala’aga o lenei mataupu, o lo’o taofi le itu tagi, sa faia se maliliega i le va o le itu tagi ma le itu molia, ma la’uina mai ai ni taavale se 62 mai i Ausetalia mo Samoa, ina ia mafai ona fa’aaoga e e ua molia, i la latou pisinisi taavale ‘rental’.

O lo’o ua taofi le itu tagi, o le mafua’aga o le fe’ese’esea’iga i lo lato uva, o le le fa’ao’oina atu lea e le itu tete’e, o ripoti o tala o tupe o lo’o maua mai i taavale e 62.  Ma le lona lua, o tupe sa mauaina i le faatauina o ni taavale se lua, i le tau aofai e $120,000WST; faapea ma le vaegatupe e $120,000 mai i le faatauina o nisi taavale se lua, e aunoa ma se faatagana.

Ae peitai, o lo’o finau mai le itu tete’e e faapea, e leai se latou maliliega faapea na faia ma le itu tagi.

Ae sa iai se maliliega na faia ma le susuga ia Craig Lawrence, lea e le o a’afia i lenei mataupu.  Ma i lea maliliega, e le o tapaina mai ai se tupe seia vagana ua iai se polofiti a le kamupani, ma o le mafuaaga lea, e leai ai se mafuaaga e tatau ai ona fa’ao’oina atu se ripoti i tala o tupe, i le itu tagi ma Lawrence.

Sa taliaina e le faamasinoga se talosaga ina ia fa’ao’oina atu e le itu tete’e ia taavale uma, i le lotoa a le ‘Federal Pacific’ po o le Fun Way Park, i Matautu-Tai.  Ma ia fa’ao’oina atu foi ki uma o taavale i le loia a le itu tagi, i le taimi lava e tasi, e aveina atu ai taavale.

TOE FA’ALELEIA IA LE UATI TELE I APIA

Ua mae’a nei galuega sa faia mo le toe fa’aleleia o le uati tele i le taulaga i Apia, e pei ona sa fa’amaonia mai e le Minisita o Fefaatauaiga, Pisinisi ma Leipa (M.C.I.L).  O lea galuega sa faia ma fa’amae’aina i le va o le aso 29 o Iulai ma le aso 31.

O le kamupani a le Timothy Tracey o le ‘Tower Clock Services’ mai Ausetalia, sa faatinoina lenei galuega ma o le susuga ia Tracey, e na o le pau lea o le tagata e agavaa i le tausiga ma le fa’aleleia o aseti tetele a le malo.

O le uati o se tasi o meatotino taua i totonu o le atunu’u ma le malo ma ua fa’afia ai nei ona galuea’iina ina ia mafai ona fa’aauau pea lana auaunaga.

I se fa’aaliga faalauaitele mai i le M.C.I.L., sa ta’ua ai galuega fa’aleleia sa faataunuuina i le uati, e pei o le suia o le ‘antenna’ tuai, kamutaina o vae o le uati ina ia sa’o le taimi faapea ma le su’esu’eina ma le iloiloina o si vaega uma o le uati.

E le gata i lea, sa aoaoina foi e Tracey ia nisi e latou te fa’aauauina ona tausia le uati, ina ia mafai ona fa’aauau pea lana tautua i totonu o le atunu’u.

Na fa’aalia e le susuga ia Pulotu Lyndon Chu Ling, le Faatonusili o le M.C.I.L ia le agaga fa’afetai ia Tracey ma lana auaunaga, aua le tausia lelei ma le faasaoina o measina a le atunu’u.