TALA MAI SAMOA


[ata: foa'i]

SAMOA

FA’ALAUTELE IA LE SA A LE MALO O SAMOA I VAEGA FA’ASALALAU

I nisi o taumafaiga ina ia taofia ia le vaega fa’asalalau a le Samoa Observer, mai i le faatinoina o latou tiute e tusa ai ma le tulafono a Samoa, ua fa’asalalauina mai ai e le Minisita o Faatoaga ma Faigafaiva, ia le faasaina ona toe tapu’eina o ata o i’a, po o le fa’atalanoaina o tagata faatau I’a, i le maketi I’a, se’ia vagana, ua maua mai se faatagana, mai i le malo.

O lenei ripoti sa fa’asalalauina i le vaiaso ua tuanai, e le National Indigenous Times, lea na ta’ua ai le to toeititi atoa le 12 masina, talu ona le faatagaina ia Tusitala, ona fesiligia ia taitai ma sui o le malo, lea o lo’o talitonuina, o se aia tatau lea i malo faatemokarasi.

O lenei faalavelave sa tula’i mai, ina ua asiasi atu se Tusitala, i le maketi o I’a mo sana ripoti e tusa ai ma le palolo o lenei masina.  Ae sa toatele nisi o tagata faigaluega o le minisita, na o latou taofia ia le galuega a le Tusitala, ma fa’ailoa atu iai, e mana’omia se faatagana mai i le ofisa maualuga.

Ma sa fa’ailoa ifo e se tasi o tagata faigaluega sinia, a le ofisa o faigafaiva, i le Observer, e mana’omia ona fa’ao’oina atu sa latou talosaga i le ofisa o le minisita, ina ia mafai ona pasia mai e le pulesili po o le minisita.

Sa ta’ua e le tamaitai Tusitala, o lenei tulafono, e aofia uma ai vaega faasalalau, e le o patino i le Observer.

FA’AFEILOAIA E LE KOMITI FAAFOE MA LE AUFAIGALUEGA A LE SNPF IA LE LATOU PULESILI FOU

Na pasia mai e le Kapeneta ia le Pulesili fou o le SNPF, ia Iulai 2026, peitai, o lea ua fa’ato’a nofoia, e le susuga ia Lealali Faleotese Asaua, ia lona tofiga fou ma o le amataga o le vaiaso, sa fa’afeiloa’ia aloa’ia ai o ia, e le komiti faafoe a le SNPF ma le aufaigaluega, i se ‘ava o feiloaiga.

Na faapea ona fa’afeiloa’i aloaia ai foi ma le Komiti Faafoe o Faatonusili a le SNPF, e aofia ai ma le afioga i le Taitaifono, ia Tagaloa Tautaituasivi Eddie Wilson, ma ona totino ia Lavea Peseta Lua Nafoi, Tu’u’u Anasi’i Leota, Malouamaua Constance Rivers ma Lemalu Venus Iosefa Salanoa.

Ua lototele ia le pulega ma le aufaigaluega a le SNPF, o lo’o aumaia e le latou pule fou ma le komiti faafoe, o tomai faapitoa, tomai faaletaitai, e mafai ona ta’ita’iina ai le latou galuega, i se tulaga sili atu, aua le auaunaga o le atunu’u ma ausia ai le latou faamoemoega, o le “Manuia Nei, Mausali Taeao.”

ULUA’I FONOTAGA LAUTELE A LE IUNI LAKAPI A SAMOA

O le aso 11 o Novema, ua atofaina e faataunu’u ai le uluai fonotaga fa’aletausaga lautele, a le Iuni Lakapi  Samoa (SRFU), i le faletalimalo a le Sheraton.

O le SRFU lea ua lesitala, i le Minisita o Fefaatauaiga ma Galuega (MCIL), ia Iuni 2026, ma aloaia ia Iulai 31, 2026, ina ua mae’a ona tu’u’eseina e le malo o le Lakapi Samoa.

Ua toatele nisi o totino o le Lakapi Samoa, ua tula’i ‘ese ma o latou fa’amaopoopoina ia le SRFU lea ua iai nei, i lalo o le taitaiga a le susuga ia Matafeo George Latu, o se tasi o tama ta’alo tuai a le Manu Samoa, faapea ma nisi o tama sa ta’a’alo i le Manu Samoa, ma a latou faiaoga.