Pago Pago - AMERIKA SAMOA

FOA’I ALOFA A LE SITEKI A PAGO PAGO SAMOA, EKALESIA A IESU KERISO, MO LE LBJ

O le aso Tofi o le vaiaso ua tuanai, sa faaooina atu ai e taitai ma totino o le Siteki a Pago Pago Samoa mai i le Ekalesia a Iesu Keriso o le Au Paia o Aso e Gata Ai, ia se foai alofa mo le maota gasegase autu a le teritori i Faga’alu.

Faatasi ai ma foai o ‘ie afu, aluga e 30, taga aluga ma isi tulaga faapena, sa faapea foi ona faaleoina e taitai o le Ekalesia a Iesu Keriso ia le agaga fa’afetai i alii ma tamaitai fomai ma tausima’i ona o la latou auaunaga alofa ma le le fa’atuaoia, mo tagata o le atunu’u.

O le susuga i le Peresetene o le Siteki a Pago Pago Samoa, ia Michael Jr. Lavea sa avea ma fofoga a le Ekalesia ma sa ia fa’aalia ai e faapea, o se vaega lenei o le auaunaga a le Ekalesia, e o gatasi ma le autu o le vaitaimi o le Kerisimasi – Faamalamalamaina o le Lalolagi – e fesoasoani ai le tasi i le tasi ma fa’asoa atu.

Sa faapea foi ona fofogaina e le susuga i le Peresetene ia se faamanuiaga mo le Aso Faafetai ma le Kerisimasi mo le teritori atoa.

O le susuga i le alii fomai ia James Sunia na avea ma sui o le LBJ e taliaina ma faaleoina se fa’afetai i le Ekalesia a Iesu Keriso ma sa saunoa foi Sunia, e le o se taimi muamua lenei ua faia ai se foa’i a lenei ekalesia mo le LBJ.

FEILOAI TAITAI O LE MALO O AMERIKA SAMOA MA SUI O LE MALO FETERALE

O le vaiaso ua tuanai na faapea ona faia ai se feiloaiga a taitai o le malo o Amerika Samoa, lea sa faauluulu ai le afioga i le Sui Kovana ia Talauega E. V. Ale ma taitai mai i le Ofisa o le Initeria ma le Fale Paepae i le laumua a le malo tele i Uasigitone, aua le talanoaina o nisi o mataupu taua e patino i le tulafono ‘Bipartisan Infrastructure Law (BIL)’ ma le IRA (Inflation Reduction Act).

O le tamaitai ia Gretchen Sierra-Zorita sa taitaia mai le faigamalaga mai i le laumua o le malo tele, o ia lea o lo o faauluulu iai le ofisa o mataupu faavaomalo, i le va o le malo tele ma teritori i lalo o le vaavaaiga a Amerika, ma sa ia faamamafaina le taua o le nofo malamalama i faafitauli o feagai ma teritori a Amerika. 

E le gata i lea, sa ia saunoa faamamafa foi i le taua o le galulue faatasi o teritori ma le faatulagaina o ni auala e mafai ona fofoina ai nei faafitauli.

O le tamaitai faatonusili ia Lisa Tuatolo mai i le ofisa a le ODAPM, ma o ia foi o lo o avea ma fesootaiga i le va o le malo tele ma Amerika Samoa i le BIL, sa faataatiaina poloketi ma faafitauli a le teritori e faatatau i le BIL ma le IRA.

O le a faapea foi ona asiasi atu Gretchen ma le susuga ia Keone Nakoa, le sui failautusi o le Inisula faapea ai ma le faletua ia Lydia Faleafine-Nomura, i nisi o poloketi a le teritori, e aofia ai le taligalu i Aunu’u, o le aoga tulaga muamua i Tula faapea poloketi mo le puipuia o matafaga i Tula ma Alao.

Na fa’aalia le agaga fa’afetai o le afioga i le sui Kovana ia Talauega i le asiasi mai o taitai mai i le malo tele.

MALIU SI TAMA MATUA I AUSETALIA, LEA NA AUMAI I LE MELI

O se tala faanoanoa mai i vaega fa’asalalau, i si tama matua lea na ave’ese mai i luga o se meli lea na afea Amerika Samoa i ni nai vaiaso ua tuanai ma faatopetope atu i Ausetalia mo togafitiga, ua maliu i le falemai i Brisbane. 

O le tama matua ia Dave Crocos sa faapea ona faamanavaina e le Atua ana galuega i le afiafi o le aso Lua o le vaiaso ua mavae, a’o iai faatasi ma si ona aiga.  E maliu o ia ua atoa le 68 tausaga o lona soifua.

E le o faamaonia mai le gasegase o le tama matua na mafua ai ona afea e le meli sa faimalaga mai ai ma si ona to’alua mai i Los Angeles ma afea Sydney Ausetalia, Hawaii ma Aukilani.  Ae na amata ona faapopoleina le aiga ina ua amata ona fiva le tama matua a’o i luga o le va’a.  Sa le i mafai ona fofoina lona gasegase i luga o le va’a ma o lea na saili ai se falemai latalata atu i le mea ua o’o mai ai le folauga a le va’a, lea na afea ai loa Amerika Samoa ma aveina atu loa lenei tama matua i le LBJ e faatalitali ai le aveina atu o ia i Ausetalia.