Ads by Google Ads by Google

Tala otooto o Fa’amasinoga


[ata: foa'i]
ausage@samoanews.com

TOE TOLOPO LE MATAUPU A FIU SAELUA

 

O le aso 14 o Novema, 2018 lea ua toe tolopo i ai le mataupu a le tofa a Fiu J. Saelua, ina ua talia e le afioga i le ali’i Fa’amasino ia Fiti Sunia le talosaga a le loia mo le itu a le malo ia David Vargas, mo se avanoa e toe tolopo ai le iloiloga o lenei mataupu.

 

O le aso Tofi o le vaiaso na te’a nei na toe valaau ai le mataupu a Saelua i luma o le Fa’amasinoga Fa’aitumalo.

 

Na taua e Vargas e faapea, o le a ia fuafua e faila se maliliega aufa’atasi ma Fiu, ma o lea maliliega aufa’atasi o le a le mafai ona fa’alauiloaina, se’i vagana ai lava le faamasinoga e silasila i ai.

 

E le gata i lea, sa ia taua atili fo’i le i ai o nisi fa’amatalaga fou ua maua e le malo e uiga i lenei mataupu, ma o lo o fa’agasolo i ai ana suesuega. Na mafua ona talosaga Vargas mo se avanoa e toe tolopo ai lana mataupu, ona o loo i ai lona fa’amoemoe na te tuua le atunuu i se taimi o le vaiaso fou mo ana fonotaga i fafo, fa’atoa toe taliu mai i le atunuu i le aso 12 o Novema.

 

E le i tete’e le loia a Fiu ia Marcell T. Uiagalelei i le talosaga a Vargas. Na faailoa fo’i e Uiagalelei i le fa’amasinoga, o loo i ai le fa’amoemoe e tuua e Fiu le atunuu mo nisi o fonotaga tau i le galuega mo Amerika Samoa.

 

Na talia e le fa’amasinoga le talosaga a Fiu, ma faia ai loa le fa’aiuga ina ia toe valaau lana mataupu i le aso 14 o Novema.

 

O le masina na te’a nei na faila ai e le malo le latou tagi fa’asaga ia Fiu, ona o tu’uaiga i lona faia lea o ni uiga le taupulea i se tama’ita’i, e aofia ai lona tagofia o ona itutinosa i se auala fa’asolitulafono.

 

Ae i le mae’a ai o le ulua’i iloiloga o lenei mataupu i le masina na te’a nei, na solofua ai e le fa’amasinoga le moliaga mamafa o le tagofia o itutinosa i le tulaga muamua sa tu’uaia ai Fiu, ina ua le mafai e le malo ona valaau le latou molimau i le taimi o le iloiloga.

 

O loo totoe pea le moliaga mama e tasi o le tagofia o itutinosa o se tama’ita’i i le tulaga 2 fa’asaga ia Fiu.

 

FAASALA FA’AMASINOGA LEOLEO E TO’ATOLU I LE FA’ATAMALA I LATOU TIUTE

 

E to’a 3 ni Leoleo ua fa’asala e le fa’amasinoga faaitumalo, ina ua fa’atamala e fa’atino o latou tiute, e ala i le tauaaoina atu lea o kopi o pepa sala (traffic citation) fa’asaga i nisi o le atunu’u sa latou fa’asalaina i luga o le alatele.

 

O le aso Tofi na te’a nei na tutula’i uma ai i latou nei e to’atolu i luma o le Faamasinoga, mo le fa’amalamalamaina o le mafua’aga ua latou le tauaaoina atu ai kopi o pepa sala e pei ona taua.

 

O ia Leoleo e aofia ai Sabrina Amosa, Iapani Tiumalu ma Det. Filemoni Amituana’i.

 

Mo le mataupu a Amosa, o le aso 25 o Setema, 2018 na solofua ai e le fa’amasinoga le pepa molia sa faia faasaga i se ave ta’avale, ina ua le mafai e le fa’amasinoga ona maua le kopi o le pepa molia e lagolago ai le tagi fa’asaga i le ave ta’avale.

 

O le aso 26 o Setema na sosoo ai na fa’atoa aga’i atu ai Amosa ma faila le pepa molia faasaga i le ave ta’avale i luma o le fa’amasinoga.

 

Ona o lea tulaga, na fa’atonuina ai loa e le afioga i le ali’i Fa’amasino ia Fiti Sunia ia Amosa na te totogiina le tupe e $60, o le tau lea o le pepa sala sa tatau ona totogi e le ave ta’avale.

 

Mo le mataupu a Tiumalu, o le aso 2 o Oketopa, 2018 na solofua ai e le fa’amasinoga le pepa molia fa’asaga i se ave ta’avale, ina ua le mafai ona oo atu Tiumalu e tauaao atu le kopi o lea pepa molia i le fa’amasinoga. O le aso 5 o Oketopa na fa’atoa faila ai e Tiumalu le kopi o le pepa molia i luma o le fa’amasinoga.

 

Ona o lea tulaga, na poloaina ai loa e le afioga i le ali’i Fa’amasino ia Sunia le totogi lea e Tiumalu o le $60, o le tupe lea sa tatau ona totogi e le ave ta’avale.

 

Mo le mataupu a Det. Amituana’i, na solofua e le fa’amasinoga le pepa molia fa’asaga i se ave ta’avale i le aso 2 o Oketopa, ina ua le oo atu Amituana’i e faila le kopi o le pepa molia. O le aso 5 o Oketopa na fa’atoa faila ai e Amituana’i le kopi o le pepa molia.

 

Ona o lea tulaga, na poloaina ai loa e Sunia le totogi e Amituana’i o le $75, o le tupe lea sa tatau ona totogi e le ave ta’avale.

 

LOGOITINO AMITUANA’I

 

O le aso 14 o Tesema lea ua fa’atulaga ai le isi iloiloga a le ali’i o Logoitino Amituana’i, i le mae’a ai lea ona ia teena o le tagi fou a le malo fa’asaga ia te ia.

 

Ua molia e le malo ia Amituana’i i le moliaga mamafa o le sola ese mai le toese ao taofia ai o ia i lalo o le vaavaaiga a le malo. O lea moliaga, o se solitulafono mamafa o le vaega D, lea e mafai ona faasala ai se tasi i le toese mo le umi e le silia i le 5 tausaga, pe fa’asala fo’i i le salatupe e le silia i le $5,000.

 

E pei ona taua i le tagi a le malo e fa’apea, o se taimi o le masina o Aokuso a o taofia ai Amituana’i i le toese, sa ia sola ese ai i tua e aunoa ma se fa’atanaga faaletulafono.

 

Na faaagafua e Amituana’i ona aia tatau, ma le faataunuuina ai loa lana ulua’i iloiloga sa faatulaga e faia i le vaiaso na te’a nei.

 

O le ali’i loia fautua ia Michael White o loo tula’i mo Amituana’i, ae o le tama’ita’i loia sili lagolago ia Laura Garvey o loo tula’i mo le malo i lenei mataupu.