Ads by Google Ads by Google

Tala otooto o Fa’amasinoga

ausage@samoanews.com

LOMA IOSIA

 

O le vaiaso a te’a nei na faila ai e le malo moliaga fa’aopoopo fa’asaga i se tasi o ali’i e to’atolu i ai latou o loo molia i le faia o uiga mataga i ni tama’ita’i laiti se to’alua e ta’i 14 tausaga le matutua.

 

O le moliaga fa’aopoopo ua faila fa’asaga ia Loma Iosia, o le moliaga mamafa lea o lona umia fa’asolitulafono o vaega o le pauta fa’asaina o le aisa, ma le fa’amoemoe e tule’i ma fa’atau atu i isi tagata.

 

O le vaiaso na te’a nei na fa’atoa faila ai e le malo le moliaga fou fa’asaga ia Iosia, ma ua fa’amoemoe o le vaiaso nei lea ua fa’atulaga e faia ai lana ulua’i iloiloga i luma o le afioga i le ali’i Fa’amasino ia Fiti Sunia mo le iloiloina lea o mau fa’amaonia a le malo.

 

E $5,000 le tupe na fa’atulaga e le fa’amasinoga e tatala ai Iosia mai le mataupu fou e pei ona faila fa’asaga ia te ia.

 

O le moliaga fou ua faila fa’asaga ia Iosia, o loo fa’avae mai i le mataupu e pei ona molia ai o ia fa’atasi ma isi ali’i e to’a 2, i le faia lea o uiga le taupulea i tama’ita’i talavou e to’alua.

 

Na taua e le malo i le latou tagi fou fa’asaga ia Iosia e fa’apea, i le vaveao o le aso Sa, aso 7 o Oketopa, 2018, sa i ai se tasi o tama’ita’i e to’alua ai i latou na a’afia i lenei mataupu i totonu o le fale ma le ali’i o Nick Mataia.

 

E lei umi se taimi, ae vaaia loa le aga’i atu o le ta’avale o loo ave atu e Iosia, ma piki mai ai le tama’ita’i na a’afia o T.T ma aga’i atu loa Iosia ma le fa’amoemoe e momoli le tama’ita’i lea i lona aiga.

 

Na taua e T.T i Leoleo e faapea, a o la aga’i atu ma Iosia i luga o le ala, sa la afe i se faleoloa e fa’atau ai ni apa inu ma pepa chips, ona toe fa’aauau ai lea o le malaga mo le momoliina atu lea o ia i lo latou aiga.

 

Ina ua fo’i mai i fafo ma le faleoloa ma aga’i atu i totonu o le ta’avale, sa tu’u atu e Iosia ia te ia se paipa tioata e ula ai le aisa, faapea ai ma se pepa iila o loo i ai vaega o le pauta pa’epa’e. Na taua e T.T le fa’ailoa atu e Iosia ia te ia, o le paipa tioata ma le pepa iila o loo i ai le pauta pa’epa’e na te tuuina atu mo ia.

 

Ina ua fesiligia e Leoleo ia Iosia e uiga i lenei mataupu, sa ia fa’amaonia ai lona alu e momoli ia T.T i lona aiga i Malaeloa i le vaveao o le aso Sa, aso 7 o Oketopa, i le mae’a ai lea ona latou tafafao i le fale o lana uo.

 

Ina ua taunu’u i le nofoaga na ia tuua ai T.T, sa ia tu’u atu ia te ia se paipa tioata e ula ai le pauta fa’asaina o le aisa, atoa ai ma se pepa iila o loo i ai vaega o le pauta pa’epa’e ma lana fa’aupuga, o lana meaalofa lea mo ia.

 

Na faia e Leoleo se suega i le pauta pa’epa’e sa i totonu o le paipa tioata atoa ai ma le pepa iila ma fa’amaonia ai, o vaega ia o le pauta fa’asaina o le aisa.

 

E ese mai i le moliaga fou ua faila fa’asaga ia Iosia, o loo tu’uaia fo’i o ia i moliaga mamafa e 3 e aofia ai le fai’aiga ma se tama’ita’i e talavou i lalo o le tulafono, faapea ai ma moliaga e 2 o lona tagofia lea o itutinosa o se tama’ita’i e le fa’aipoipo i ai. O loo tu’uaia fo’i o ia i le moliaga mama o lona faia lea o gaioiga e ono lamatia ai le saogalemu o fanau laiti.

 

I le tagi muamua na faila e le malo fa’asaga ia Iosia, e $100,000 le vaega tupe ua fa’atulaga e tatala ai o ia.

 

O le taimi nei, o lo o taofia pea i le toese i Tafuna ia Iosia e fa’atali ai taualumaga o lona fa’amasinoga.

 

SIO GODINET JR

 

Ua talia e le fa’amasinoga maualuga le talosaga na fa’aulu e le ali’i loia fautua ia Michael White, ina ia toe tolopo le mataupu a Sio Godinet Jr i le isi 2 vaiaso, ina ia lava se taimi la te iloilo ai le maliliega lea ua tuuina atu e le malo.

 

Na faamaonia e White i le fa’amasinoga, lona tauaaoina lea o le ripoti mai le malo atoa ai ma mau faamaonia e uiga i le mataupu a Godinet Jr, ae mana’omia se taimi la te talanoa ma iloiloina ai mau faamaonia mai le malo.

 

Na fesili le Fa’amasino Sili ia Michael Kruse ia White, pe aisea e mana’omia ai le tolopo o le mataupu, ae na tali White, e i ai le tulaga e fa’atatau i le tusi saisai na mafua ai ona osofa’i e Leoleo le fale o Godinet Jr e tatau ona la iloiloina muamua, ona o loo i ai nisi o tulaga e tatau ona faamanino muamua.

 

O le aso 9 o Novema lea ua fa’atulaga e toe valaau ai le mataupu a Godinet Jr. O loo taofia pea le ua molia i le toese i Tafuna ina ua le mafai ona ia totogiina le tupe e $30,000 e tatala ai o ia i tua.

 

NOFOVAAVAAIA SUSUGA SOLIAI

 

E 18 masina lea ua faanofovaavaaia ai e le afioga i le ali’i Fa’amasino ia Fiti Sunia le ali’i o Susuga Soliai, ina ua ta’usala o ia i le moliaga o le faaoolima i le tulaga 3. O lea moliaga na afua mai ina ua fa’afefe e le ua molia se tamaititi talavou i se pate golf. O lea gaioiga e pei ona taua e le Fa’amasinoga, sa lamatia ai le saogalemu o lenei tamaititi e talavou i lalo o le tulafono.

 

O ni isi o tuutuuga o le nofovaavaaia a Soliai, e aofia ai lona auai i  ni aoaoga e fesoasoani ai i le faafitauli o le tagofia o le ‘ava malosi, aua nei ona toe solia se tulafono, a ia avea o ia ma tagatanuu e tausi i tulafono a le malo i taimi uma. Ua poloaina fo’i o ia na te totogi le salatupe e $100.