Pago Pago - AMERIKA SAMOA

PASIA FAIPULE PILI A LE KOVANA MO LE PAKETI FAAOPOOPO

E 16-0 le palota na pasia ai e afioga i Faipule le Pili a le Kovana mo le Paketi Faaopoopo e $7.4 miliona e fesoasoani ai i nisi o manaoga a le malo.

O le faaiuga a le maota o sui na faia lea ina ua mae’a se iloiloga puupuu e faatalanoa ai le agaga o le tulafono tau faaofi a le faigamalo, atoa ai ma le manaoga faanatinati ina ia vave pasia lenei paketi faaopoopo e fesoasoani ai mo isi vaega o le malo.

O le vaiaso na te’a nei na tau aao atu ai e le afioga i le ali’i Kovana ia Lemanu Peleti Sialega Mauga le pili mo le paketi faaopoopo e tali ai manaoga o loo manaomia e nisi vaega o le malo. O lenei tulafono o loo faamoemoe e faatupe mai i tupe totoe e lei faasoasoaina a matagaluega taitasi a le malo mo le tausaga tupe 2021.

E pei ona taua e le malo i le latou pili tau faaofi e faapea, o le $250,000 ua faamoemoe e faatino ai nisi manaoga mo le tuu faatasia o faamaumauga mo le faigamalo; $500,000 e tuuina atu i le Fono Faitulafono e faatupe ai nisi o manaoga e le o aofia i le Tala o le Tupe mo le tausaga tupe fou 2023; $300,000 ua faamoemoe e faaaoga e faamae’a ai galuega faafou mo le Veteran Stadium i Tafuna; $500,000 e faatupe ai tupe faafetaui mo vaega tupe a le feterale o loo faamoemoe e fa’aaoga mo atina’e i le malo.

O le isi fuafuaga e aofia ai le $500,000 ua faamoemoe e tuu atu i le Ofisa o le Loia Sili e totogi ai loia o loo galulue i fafo mo le tauaveina o nisi o mataupu e faatatau i le malo; $500,000 ua faamoemoe e faatupe ai galuega lavea’i aemaise ai tapenaga mo le aveesea mai o tagatanu’u o Manu’a, talu ai le mataupu i le Mauga Mu o loo taua i ripoti le ono pa i se taimi lata mai.

Saunoa le afioga i le Sui Fofoga Fetalai ia Fetu Fetui Jr e faapea, o le agaga faafetai i le malo ina ua mafai ona faamatuu mai lenei vaega tupe tele e fesoasoani ai i le saogalemu o le Itumalo o Manu’a.

Pau lona popolega o loo i ai e pei ona saunoa le Sui Fofoga Fetalai, afai ae le tupu le mauga mu, o le a faapefea lenei vaega tupe ua faaavanoa mai e le malo mo le itumalo. I lona talitonuga, afai e le faaaogaina lenei vaega tupe, e tatau ona toe faafo’i atu i le malo ina ia toe faasoasoa mai ai mo nisi manaoga e tula’i mai i le malo i le lumana’i.

ATUGALU FAIPULE I LE TUAI ONA MAUA O ‘REAL ID’

O le toe tu’u atu ai i le tausaga fou o le taimi e maua ai laisene ave taavale a Amerika Samoa, lea e mafai ona aloaia e le malo feterale (REAL ID), ua fa’aalia ai finagalo le fiafia o nisi o Faipule o le Maota o Sui i le vaiaso nei.

O le iloiloga sa faia i luma o le Maota o Sui i le masina o Iulai na te’a nei, na molimau ai le Sui Komesina o Leoleo ia Jerry Letuli, o le masina o Oketopa e maua ai lea ituaiga laisene ave ta’avale mo Amerika Samoa.

Ae ina ua fesiligia le Faatonusili o le Matagaluega o le Puipuiga o le Saogalemu Lotoifale i le vaiaso nei, na taua ai e le afioga a Samana Semo Veavea e faapea, o le masina o Me o le tausaga fou lea ua toe tu’u atu ai i tua le taimi e maua ai le laisene ave ta’avale mo Amerika Samoa. 

E mafua lea tulaga ona o lea ua toe foi atu i fafo le alii sa malaga faapitoa mai e fesoasoani i le tuu faatasia o le polokalame mo lenei faamoemoe, atoa ai ma le tuu faatasia o faamaumauga uma e manaomia.

O le faafitauli e pei ona faamanino e Samana, o nisi o masini sa faamoemoe e fa’aaoga mo lenei galuega ua tele tausaga talu ona aumai, ma ua moomia foi le sui o totoga o nisi o masini.

O le Ofisa o Taavale Afi a le Matagaluega o le Puipuiga o le Saogalemu Lautele o loo faamoemoe e gafa ma le tuu aloaia maia o le laisene ave taavale fou lenei. 

Saunoa le afioga i le ali’i faipule ia Faimealelei Anthony Fu’e Allen e faapea, o se tulaga faanoanoa tele le tala ua tuuina mai e le faigamalo, ona ua tele tausaga o nonofo faatali le atunu’u mo le laisene ave taavale, ae foliga mai o loo faatamala pea lava le malo. 

O le faafitauli e pei ona saunoa Faimealelei, o le laisene ave ta’avale a Amerika Samoa o lo o fa’aaoga i le taimi nei, e le mafai ona fa’aaoga i Amerika, ona e le o ausia aiaiga ma tuutuuga uma e tatau ai ona fa’aaoga ma aloaia e le feterale. 

O le toatele o tagatanu’u a Amerika Samoa e aofia ai ma fanau aoga o loo malaga atu i setete o le malo tele, e leai se isi e mafai ona fealua’i i se taavale mautotogi, e mafua mai, e le aloaia la tatou laisene ave ta’avale i soo se vaega o le malo tele. 

Na talosaga Faimealelei i le afioga i le Fofoga Fetalai mo se iloiloga e aami ai le afioga a Samana ma le Sui Komesina ia Letuli, se’i toe faamanino le mafua’aga ua ala ai ona tula’i mai lenei faaletonu. 

TOFIGA FOU A LE KOVANA

Ua taunu’u i le Fono Faitulafono a le afioga i le ali’i Kovana ia Lemanu Peleti Palepoi Sialega Mauga nisi o ana tofiga i le Fono Faitulafono mo nisi o le atunu’u e galulue i nisi o Komiti Faafoe a le malo.

O le Tofa a Ale Tifimalae Ale lea sa tautua i le Matagaluega o Tagata Matutua mo le tele o tausaga, ua filifilia nei o ia e le Kovana e fai ma sui o le itumalo o Manu’a i totonu o le Komisi o Fuafuaga a le Teritori.

Na taua e Lemanu i lana tusi i le Fofoga Fetalai o le Maota o Sui, afioga Savali Talavou Ale e faapea, o le tofa Ale, ua tele tausaga o lana tautua mo le malo, ma ua lava fo’i lona silafia i auala e faafoe ai tautua eseese.

O isi tofiga e aofia ai i latou e to’a 5 e avea ma totino o le Komiti Faafoe o le Ofisa o Turisi a Amerika Samoa. O i latou nei e aofia ai le Tofa a Tauese Vaa Sunia e fai ma sui o le Ofisa o le Samoan Affairs; o Agnes Polu e fai ma sui o le au Faipisinisi; Petti T. Matila e fai ma sui o le Matagaluega o Fefaatauaiga ma Alamanuia; Poe Mageo e fai ma sui o Pisinisi Faletalimalo, ma le susuga Tuli Fruean e fai ma sui o Pisinisi Vaalele ma Fefaatauaiga.

O i latou nei o le a tautua i le Komiti Faafoe a le Ofisa o Turisi mo le tai 3 tausaga, lea ua faamoemoe e mae’a i le aso 15 o Setema 2023.

ATUGALUGA TITIALII I LE TAUGATA O LE TAU O LE SOIFUAGA

Ua faaalia e le afioga i le alii Faipule mai Saole, afioga Titialii Kitara Vaiau lona popolega i le faafitauli lea o loo maitauina pea i le taimi nei, o le agai lea i luga o le tau o le soifuaga e aofia ai le sii maualuga o le tau o soo se oloa i le atunu’u. 

O le faafitauli e pei ona saunoa Titiali’i, e le o faatinoina le galuega a le malo e mataitu ai pisinisi ma ia mautinoa e le o faia e le aufai pisinisi lenei faiga faa solitulafono o le soona sii o le tau o oloa i la latou lava pule faitalia.

Saunoa Titiali’i e faapea, toeitiiti lava vaiaso uma e molimauina ai e tagata o lona itumalo le fesuisuia’i o le tau o oloa i faleoloa i le itu i Sasa’e. O faleoloa uma nei o loo pulea ma faatautaia e tagata fai pisinisi mai Asia. 

O nisi o tagata faatau sa latou maitauina lenei faaletonu, sa latou faafesootaiina le Ofisa o le Loia Sili peita’i o le tali na aumai, seiloga lava e maua ni faamaoniga poo faamaumauga e iloa ai o loo sii pea le tau o oloa i vaiaso taitasi.

Saunoa Titiali’i, e le o se tiute lena o le tagata faatau o le tau sue o ni faamaumauga e faamaonia ai tu’uaiga i le maualuga o le tau o oloa ma le sii sii pea i luga o le tau o oloa. O le tiute lena o le malo ma lana aufaigaluega, o le agai atu i tua e faatino la latou galuega ma suesue faleoloa nei pe moni tuuaiga mai tagata lautele.

Ua i ai le faamoemoe o le mae’a ai o le pisi o le Fono i iloiloga o le paketi, ona faatulaga ai loa lea o se iloiloga a le Maota o Sui e faatatau i lenei mataupu i se taimi o i luma.

Na taua e nisi o tagata faigaluega sa mafai ona fesiligia e le Samoa News, o le faafitauli o loo maitauina i le taimi nei, ua maualuga le tau o le soifuaga, ae o loo maualalo pea totogi o tagata faigaluega.