Pago Pago - AMERIKA SAMOA

SOLA I GALUEGA FAAVAITAIMI SE ALII SAMOA NA TU’UA’IA I LE SUSUNUINA O SE FALE

O se tasi e to’aiva ai i latou o lo’o molia i le susunuina o se fale faigaluega i Faleula, ua sola ese atu ma le atunu’u, e galue i galuega faavaitaimi, a’o loma nei lona faamasinoga.

O le susuga ia Tetele Pii Lepa po o PJ e pei ona valaauina ai o ia e tagata, na vala’au fa’atolu lana mataupu i luma o le Faamasinoga Maualuga.

Ma o le vaiaso ua mavae, na faia ai loa se samania mai i le Faamasinoga Maualuga mo PJ ma Vaialia Paneta, ina ua vala’au faafia le la mataupu ae e le auai atu.

O le vaiaso nei sa tatau ona o’o atu ai Lepale i luma o le faamasinoga, faatasi ai ma isi o lo’o molia i lenei mataupu, e aofia ai Henry Fretton, Tuaolo Palagi Pii, Vaialia Paneta, Vaiao Makelusa Levasa, Blessed Fretton, Viliamu Fretton, Teofilo FEtaiai Pii ma Mauaiseaso Teofilo.

Ae peitai, sa fa’aalia e loia a le malo, ma le loia mai i le Ofisa a le Loia Sili, ia Lupematasila Iliganoa Atoa, ua fa’amaonia le tu’ua e Lepale o le atunu’u.

Na fesiligia e le afioga i le alii faamasino ia Fepuleai Ameperosa Rom, ia leisi to’avalu pe ua mae’a ona saili ni a latou loia.

Na tali se tasi na molia, o lo’o latou fa’atalitali i se tali mai i le Ofisa a le Faamasinoga, e tusa ai ma a latou talosaga mo ‘legal aid’ po o fesoasoani faaletulafono.

O le masina o Iuni o le tausaga na tupu ai le fa’alavelave lea o lo’o molia ai i latou nei e to’aiva.

Ua faapea nei ona toe tolopoina le latou mataupu mo leisi lua vaiaso o i luma.  Ae ua talosagaina e loia a le malo ia se tusi saisai mo Lepale, peitai na saunoa le afioga i le faamasino, e le mafai ona faia se tusi saisaitia, pe afai e le’i fa’ao’oina atu se samania i le ua molia.

TUAOI O LE MALO O FITI

Sa fa’aalia e le Minisita o Mataupu Lotoifale a le malo o Fiti e faapea, ua fa’amaonia mai i se faalavelave na tula’i lata mai nei, lea na maua ai ni vaega o fualaau faasaina, o le Aisa, lea sa sau mai i Ausetalia mo Kanata, le mana’omia ona fa’amalosia o tuaoi o le malo.

Na fa’aalia e leoleo feterale i Ausetalia la mauaina o se tamaloa Kanata ma se vaega o fualaau faasaina o lo’o nanaina i totonu o ni pepa i’ila ma solo ua sasaa iai le Vineta ma Kofe. I se ripoti mai i le Fiji Live, na ta’ua ai se saunoaga a Pio Tikoduadua, le fa’aalia mai i lenei fa’alavelave le mana’omia tele ona fa’amalosia tuaoi o le malo.  Ma sa ia ta’ua foi le fa’aalia mai i gaioiga a i latou sa faia lenei tulaga, le fa’amalosia o tulafono ma su’esu’ega atoa ai ma le galulue fa’atasi o leoleo po o tagata faigaluega o lo’o puipuia tuaoi, o aunu’u ma malo taitasi.

SAUNIA TAGATA TETE’E I PAPUA E FAASAOLOTO SE PAILATE NIU SILA UA OVA LE TAUSAGA O AVE FAAPAGOTA

Ua nofo saunia nei ia tagata Papua e fa’asaoloto se pailate Niu Sila e suafa ia Philip Mehrtens, lea ua silia ma le tausaga talu ona o latou ave faapagotaina, e tusa ai ma se fa’aalia mai i le so’oupu.

O le aso 7 o Fepuari 2023, sa ave faapagota ai e se vaega o le Ami o tagata Papua i Sisifo (TPNPB Papua National Liberation Army), lea o lo’o ta’ita’iina e Egianus Kogoya, ia Mehrtens, ina tu lau’ele’ele i se vaega tu’ufua i Nduga.

Sa ta’ua e Sebby Sambom, le so’oupu a le itu tete’e, le malie Kogoya e fa’asaolotoina ia Mehrtens ae sa ta’ua e le so’upu ia Sebby Sambom, atonu e o’o atu lenei fuafuaga i le lima masinoa.