PASEFIKA

MOLIA TAITAIFONO A LE ITU O LE ‘FAST’ I SOLITULAFONO

Ua molia nei le taitaifono o le itu a le Faatuatua i le Atua Samoa Tutoatasi (FAST), i moliaga, e aofia ai le gaosia o molimau, taupulepulega ina ia soli tulafono, taufaaleaga ma sauaga.

O le aso Faraile o le vaiso ua mavae, na molia ai le Minisita o Faatoaga ma Faigafaiva, le afioga La’auliolemalietoa Leuatea Schmidt, ma o le aso 4 o Fepuari, ua faatulagaina ai lona faamasinoga.

Na ta’ua e La’auli i sana fa’asalalauga i luga o upega tafailagi, le tu’uaia o ia e le Itu Agai i le maliu o se tamaititi aoga, lea na tula’i mai i le fa tausaga ua mavae.

I se fa’aaliga fa’alauaitele a le Palemia o Samoa, na fa’alauiloa mai ai e le afioga Fiame Mata’afa le lagolago e le vaega a le FAST ia faamasinoga ma a latou fa’ai’uga, ma o le a faapea foi ona molia ni isi, a’o fa’aauau ai pea su’esu’ega a leoleo.

MOLIA SE TAMALOA CNMI I LE FA’AO’OLIMA MA LE AVE FAAMALOSI O SE TAGATA

Ua molia nei se tamaloa Saipan i moliaga i lona sauaina ma le ave faamalosi o se faamasino o Faamasinoga Faaitumalo a le Iunaite Setete i totonu o CNMI.

O lo’o molia foi lenei alii i lona faia o ni faamatalaga, o le a ia sauaina pe fasiotia se faamasino Amerika faapea ma lona lafoina o ni faamatalaga taufa’amata’u, o le a ia ave faamalosia so’o se tagata po o faamatalaga taufa’afefe e a’afia ai se tagata.

E tusa ai ma fa’amaumauga a le faamsinoga, o lo’o taua ai e se sui o le FBI, o Jason Oakley ia le o’o atu o se ripoti ia te ia, e faatatau i ni imeli taufa’atamatau ma taufa’afefe, ua o’o atu i se ofisa o le faamasinoga faaleitumalo i totonu o le CNMI.

Ma o lo’o aofia i totonu o nei imeli ia ni imeli taufa’amata’u e faasaga i nisi o taitai o le malo, o le pomuina o Saipan faapea ma se taumafaiga e fasioti se faamasino o Faamasinoga Faaleitumalo a le Iunaite Setete.

MOLIA SE ALII I FITI I LE FAAMALOSI TEINE MA SAUAGA MATAGA

Ua molia nei se alii i tu’ua’iga o lona faamalosia ma faia ni uiga mataga i se tasi o le aufaigaluega a le vaalele o le Virgin Airlines, i fiafia o le Tausaga Fou, i Fiti.

O lea tulaga sa faamaonia e le sui Komesina o Leoleo a Fiti, o Juki Fong, i le vaega faasalalau a le ABC e tusa ai ma le lokaina o se alii ona o tu’uaiga i lona faamalosia o se tamaitai mai Ausetalia, e 21 tausaga, a’o feagai ai le tamaitai ma nisi o le latou aufaigaluega, i tafaoga i le po o le Tausaga Fou.

Sa faapea foi ona a’afia seisi o lenei lava aufaigaluega i seisi faalavelave, na aofia ai le gaoia o ana meatotino faapea ma le sauaina o ia.

O le aso Gafua (i Fiti) sa tula’i ai le ua molia i luma o le Faamasinoga i Fiti.

MALILU SE TAMALOA I NIU KALETONIA INA UA OSOFA’IA E SE MALIE

O se tafaoga a se aiga, na i’u fa’anoanoa ina ua maliu le tama o le aiga, ina ua osofaia e se malie a’o alu e fagota.

O lenei faalavelave na tupu i le motu autu a Niu Kaletonia, o Grand Terre, i le aso Tofi o le vaiaso ua mavae.

Na ta’ua e nisi o molimau le taumafai o vaega tali faalavelave e fa’asaoina le soifua o le ua maliu, ae o le tuga o ona manu’a sa le’i faamanuiana ai a latou taumafaiga.