PASEFIKA

MOLIA SE FOMAI HAWAII I LE FASIOTI TAGATA

Ua molia nei se alii fomai mai Maui, i le fasioti tagata le fuafuaina, i lona tulaga e lua, ona o se fa’alavelave na fa’atopetope atu ai se tina i le falemai.

E tusa ai ma se ripoti mai i le vaega fa’asalalau a le Hawaii News Now, sa ta’ua e leoleo lo latou agai atu e su’esu’e se ripoti i se tamaloa o lo’o sauaina se tina i le auala i Pali Puka.

Na ta’ua e leoleo le fa’ailoa atu e le tina na a’afia, le taumafai o lona to’alua, e u’una’i ese o ia mai i le auala ma pa’u atu ai ma tau lona ulu i se ma’a.

E taunu’u atu leoleo ua sola ‘ese le to’alua a lenei tina ma na fa’ato’a mauaina o ia e leoleo i lea lava afiafi.

TU’U SA’OLOTO IA SE ALII NA MOLIA I LE GAOI

Ona ua leai le molimau autu o se fa’amasinoga na molia ai nisi i le gaoia o se vaegatupe e $241,000 (tupe Samoa) mai i se kamupani, na faapea ona fa’aleaogaina ai moliaga na fa’asaga ia i latou e to’afa na molia i lea mataupu, ma tatalaina ai loa i latou.

O Navneel Nair, Lagi Autagavaia, Pelepesite Akeli ma Tamaalelupe Silva sa molia i le gaoia o le tupe mai i le kamupani a le Tradepac Samoa, i Vaitele, lea sa o latou galulue ai.  O lenei fa’alavelave na alia’e i le tausaga e 2020.

Sa ta’ua e faapea, o lo’o masalomia le gaoia o le vaegatupe tele ia Iulai 31, 2020 ma Mati 1, 2021, lea na tu’ua’ia ai i latou nei e toafa.

Ae i seisi faalavelave na tula’i mai ia Setema 1, 2020 ma Mati 1, 2021, na tu’ua’ia ai foi i latou lava nei e to’afa i lo latou gaoia o se vaegatupe e $5,681 (tupe Samoa).

Faapea ai ma se vaegatupe e $60,638 (tupe Samoa) sa masalomia ai i latou nei e to’afa, i le va o Iulai 31, 2020 ma Mati 2021.

Sa te’ena uma e i latou ia a latou moliaga ma o le tausaga nei na faamoemoe e fa’ataunu’u ai le iloiloga o lenei mataupu i luma o le faamasinoga.

Ae peitai ane, sa fa’alauiloa e le loia a le malo, le susuga ia Leinafo Taimalelagi Strickland, i luma o le faamasinoga, le le mafai ona auai atu o se tasi o a latou molimau autu, o se alii Fiti, ona e le o mafai ona malaga atu i Samoa i leisi 12 masina o i luma.

O lea molimau, o se tasi na avea ma pule i totonu o le kamupani o lo’o a’afia.

O lea na talosagaina ai e le loia a le malo ia le fa’aleaogaina o moliaga fa’asaga ia i latou e to’afa, lea na talia e le afioga i le faamasino o Faamasino Sili ia Fepuleai Ameperosa Roma.

VANUATU MA LANA PALOTA

Ua fa’aleaogaina e le Faamasinoga Maualuga a le malo o Vanuatu ia ni talosaga faalepalota, talu ai le ausia o aiaiga i tulafono faalepalota a le atunu’u, ina ua mae’a le palota lautele ia Ianuari.

E tusa ai ma ripoti mai i vaega fa’asalalau lotoifale, sa te’ena e le alii loia ia Oliver Saksa kia se talosaga a Uri Warawara, e lu’itauina ai le palotaina o Allan Molvoke Liki i le Itumalo a Malo, ona e le’i totogia lana ‘security deposit’ i le taimi fa’atulagaina.

I le tagi a Warawara, o lo’o ia ta’ua ai le auai o ni tagata palota i le palota ia Ianuari, ae sa le tatau ona o latou palota.

I le fa tausaga ua mavae, ua lima ai lea o palemia a Vanuatu.