Pago Pago - AMERIKA SAMOA

FA’AMAONIA I ‘OAHU SE TAMAITITI UA MAUA I LE MISELA AE LE I FAIA NI ONA TUI PUIPUIA

Ua fa’amaonia mai e le kovana i ‘Oahu, le susuga ia Josh Green, ia le iai o se tamaititi/teineititi sa malaga atu i Honolulu, i lalo o le 5 tausaga, ua a’afia i le gasegase o le misela, ae e le’i faia ni ona tui puipuia.

O lenei tamaititi/teineititi, sa faapea ona malaga i atunu’u i fafo, ma o lo’o tausia lona gasegase i lona aiga.  Ma o lo’o iai foi se tasi o le aiga o lo’o nofo va’ava’aia, ona o lo’o fa’aalia auga o le misela.

Ae ua faapea ona fautuaina e le alii kovana ia le atunu’u ina ia ‘aua le faapopoleina se tasi, ae ua mana’omia ona fa’amautuina le faia o tui puipuia a le fanau.

Ma o le taimi nei, o lo’o faapea ona feagai le Ofisa o le Soifua Maloloina ma le suesueina o le pasese o le faigamalaga lea na malaga mai ai le tamaititi/teineititi ua a’afia.

MALIU SE TAMAITITI AOGA FITI  I LE ‘DENGUE’

Ua fa’amaonia mai e le Minisita o le Soifua Maloloina i Fiti ia le maliu o se tamaititi/teinetiti a’oga i le motu o Viti Levu, mai i le gasegase o le ‘dengue fever’.

O le lona lua ai lea o se fanau aoga ua maliliu, ae o le mataupu i le tamaititi/teinetiti a’oga lea na maliu muamua, ua mafai ona fa’amaonia e le o le ‘dengue’, ma ua tu’uina atu lea mataupu i a’ao o le ofisa a leoleo.

O le aso Lua na se’i mavae atu nei, sa faapea ona fa’amautuina ai le si’isi’i o fuainumera o tagata o le atunu’u, ua faapea ona maua i lenei fa’ama’i ma i se fa’aaliga taua mai i le Minisita o le Soifua Maloloina i le mamalu lautele, ua faapea ona fautuaina ai le faamamaina o nofoaga e ono fananau ai ia namu, i luga o fanua ma autafa o maota ma laoa a aiga.

I se ripoti mai i le motu o Tonga, ua faapea ona fa’amaonia le o’o o le latou fuainumera o gasegase i le 445, i le aso Gafua na se’i mavae atu.

E silia ma le afa, o tagata mai i Vava’u (246), ona soso’o ai lea ma Tongatapu (149) faapea ma Eua (49).  Ae e leai se tasi ua maliu mai i le fa’ama’i.

FA’ASOLOSOLO MANUIA SE ALII NA MANU’A I SE NAIFI I ALEISA

E tusa ai ma se ripoti a le Samoa Observer, ua fa’alauiloa mai ai le fa’asolosolo manuia o se alii e 22 tausaga le matua, mai i le afioaga o Tapatapao, lea na manu’a mai i Aleisa ina ua tagatavaleina o ia e se tasi i se naifi, i fafo o se faleoloa i Aleisa, e masani ona inu pia ai fanau talavou.

Sa faamatalaina e Tali Metuli, o se tasi e aiga ma le alii na manu’a, o le aso Sa na faia ai le taotoga a sona tei ma aveina atu ai o ia i le ICU.

Na ta’ua e seisi tagata o le aiga, le leai o se fa’amatalaga ua maua e le latou aiga, mai i le ofisa a leoleo, e tusa ai ma le faalavelave ma po o ai ua lokaina.  Sa ta’ua e le tamaitai o le aiga, e na o le pau le tulaga ua o latou iloa, na alu lona ‘nephew’ e faatau ae osofa’ia ai o ia e ni alii.

Sa saunoa le tamaitai, o le fa’afitauli lea i le autalavou e tagofia ava malosi i aso nei, ua tele faafitauli ua tutupu mai ona o le le inu fuafua.  Na ta’ua foi e le tamaitai ia lona le malamalama i le mafua’aga na ta’ua ai le afioaga o Solosolo, ae o le latou aiga e mai i Tapatapao.

Na ia fa’aleoina le agaga fa’afetai i le Atua ona ua fa’asolosolo manuia si ona tei, talu ai ata sa o latou va’aia i ona manu’a.