O LE LUPE FIA INU

Sa lele lele mai le alii o Lupe i se tasi aso, ua galala i le fia inu.  O le mamao o le nofoaga sa lele mai ai le alii o Lupe.  Ma na amata mai lana faimalaga i le taeao po ae e le’i taitai alu a’e i luga o le mata o le la.

Na fika lelei e Lupe, e tatau ona o’o ifo i le taimi ua vevela ai le la, ua toeititi taunu’u lana faigamalaga.

Ae peitai, ona o le faitatala tele o le alii o Lupe, sa fa’atuatuai ai lava ona fa’aauau lana faigamalaga.  A o’o mai i se nofoaga ua fia faitala le alii o Lupe i galuega a tagata, po o se talanoaga a nisi manulele po o le ta’a’alo a tamaiti, e tu lelei le alii o Lupe i luga o se lala la’au ma usi lana faitatala, ae galo ai ia te ia le alu o le taimi.

E tu lelei le mata o le la i luga tonu lava o le lagi, i le aoauli, ae fa’ato’a afa le maila i le faigamalaga a le alii o Lupe.  Ma ua lagona lava lona galala i le fia inu.

Ua lele  lele nei le alii o Lupe ma fetilofa’i solo pe na te iloa atu se nofoaga e mafai ona inu ai.  Ua su’e i luga o la’au tetele, ua su’e i lalo o pu pu vao, o autafa o ma’a tetele ma totonu o ana.  Ae paga lea, ua fiu si alii o Lupe e autilo ae na te le iloa atu lava se mea o iai se vai, e inu ai.

Sa fa’aaua pea ona lele le alii o Lupe, ae ona iloa mamao atu loa se ata o se fagu vai, o lo’o tu mai i luga o se fa’ailo e tu i autafa o se auala.  

Ona o le galala o le alii o Lupe i le fia inu, sa na ia le iloa atu ai, ua na’o se ata le mea o lo’o ia va’ai atu iai, ae le o se vai.

Ua tu’u uma nei le malosi o le alii o Lupe i le ta ta o ona apa’au ma fa’atu sa’o atu lava lana vaalele i le ata o le fagu vai.

Talofa e ia Lupe, na ona taia lava i le laupapa o lo’o tu mai ai i luga le ata o le fagu vai, toe fiti mai i tua, ua gaui uma ona apa’au, ma pa’u mai ai loa i lalo i luga o le palapala.

[IA MANUIA TOE FUAFUAGA O LENEI VAIASO]