Pago Pago - AMERIKA SAMOA

FA’ATAUA O LE TAUMAFA TATAU MO LE SOIFUA MALOLOINA LELEI

O le masina o Mati, ua fa’atauaina ai le taumafa tatau aua le soifua maloloina lelei, e pei ona fa’alauiloa mai i se Poloa’iga Faalauaitele a le Afioga i le Kovana Pulaali’i Nikolao Pula.

Ua ta’ua i totonu o lenei poloaiga le avea o le masina o Mati ma masaina e fa’ataua ai taumafa tatau ona o meataumafa o ma’ataua ia latou te fa’aauauina le ola, ma o ituaiga meaai, o lona tulaga lelei, ma le aofa’I, e taua tele i le soifua maloloina ma le malosi tutu’a o le tino.

E le gata i lea, ua ta’ua ai le iai o mea’ai taumafa e ono a’afia ai le tino i gasegase le pipisi, po o gasegase tumau, e mafua mai ona o le le tausia lelei i mea’ai tatau, e fa’atupula’ia ai toatuga i le tino.

Ma le faigofie ona fa’atauina e tagata lautele, aemaise o fanau iti ma fanau talavou, i ia ituaiga mea’ai e afaina ai le tino, i ni tau taugofie faatasi ai ma le tele o pisinisi o lo’o latou fa’atauina atu nei ituaiga meaai i totonu o le atunu’u.

Ua ta’ua foi i lenei poloa’iga faalaua’itele a le kovana, le avea o Amerika Samoa ma se atunu’u ua matua maualuga i to’atuga o gasegase le pipisi, e pei o le Tino Puta, Ma’i Suka, Ma’i o le Fatu, ma le Kanesa, e mafua mai ona o le le lelei o le tausiga o le soifua maloloina.

Ma le le lava o ni tulafono, polokalama ma le le lava o i latou e iai le tomai faapitoa, latou te taitaiina, fautuaina ma tali atu i manaoga o le atunu’u i mataupu tau meaai.

Aemaise ai le mana’omia tele ona faia o ni a’oa’oga i mea’ai ma amata ni polokalama e fa’alautele ai le tomai o tagata i taumafa tatau ma le paleni, aua le fa’atupula’ia o le soifua maloloina lelei ma le soifua tulu’i.

O lea ua aloa’ia ai e le afioga i le kovana ia le masina o Mati e avea ma masina e ‘Faataua ai le taumafa tatau mo le soifua maloloina lelei’, ma ia fautuaina ai tagata uma o le atunu’u, ina ia “u’ulima faatasi ma faatauaina lenei manulauti, faataua le taumafa tatau mo i tatou faapea isi o tatou uso a tagata, ma le naunauta’iga ina ia tatou tau fai maua uma le soifua maloloina lelei mo le aso nei ma taeao.”

TUSI ATA FOU MO FANAU ITI A AMERIKA SAMOA

Ua lomia nei se ulua’i tusi ata mo fanau iti, a se tasi o lupe fa’alele a le atunu’u, o lo’o fa’amautu i atunu’u i fafo ma lona aiga.

O le tamaitai o Genevieve McMoore, po o Gigi McMoore, sa soifua mai i afioaga o Utulei ma Leloaloa ma sa ia ta’ua e fapaea, o lana tusi lea e fa’aulutalaina “Pai & The Ocean’s Gift”, sa afua mai manatunatuga o lenei tusi ata, ona o si ona tua’a lea ua fa’ilagi le folauga, le susuga ia Siona Le McMoore mai Utulei, ona o se tagata e sa fiafia i le sami.

Sa fa’ailoa mai e Gigi i le Samoa News le pele o lenei tusi ia te ia, ona o lona tua’a ma o se auala e aloaia ai o ia, aemaise ai o le masina o Aukuso o lenei tausaga, e atoa iai le 10 tausaga talu ona maliu o ia.

O lenei tusi o lo’o iai ma nisi o aganu’u fa’a Samoa ma aoaoina ai foi fanau iti i le va o le tasi ma le lima tausaga, i le gagana Samoa.

O le tala o lenei tusi, e autu i se tamaititi e igoa ia Pai, sa alu e saili ni ‘oa i le sami ma matafaga o Amerika Samoa ma ia maua ai se sisi.  Sa faapea ona faamatala atu e lona ‘Papa’ ia te ia, e uiga i meaalofa mai i le sami ma le taliaina o nei meaalofa, ma le agaga fa’afetai.

O se tusi o lo’o tumu i ni ata ma upu Samoa faigofie, o le a mafai ona fiafia ai le aiga atoa, faapea fanau iti.

O le aso muamua o Mati sa mafai ona tatalaina ai lenei tusi mo le mamalu lautele.

FA’AAUAU ILOILOGA TU’UFA’ATASI A LE MAOTA O SUI MA LE SENATE I MATAUPU MO FITAFITA TUAI

Na fa’alauiloa mai e le afioga i le sui Faipule a Amerika Samoa i le laumua i Uasigitone, ia Uifa’atali Amata, ia le fa’aauauina o Iloiloga Tu’ufa’atasi a le Konekeresi, lea na amata mai i le lua vaiaso ua tuanai, i mataupu e a’afia ai fitafita tuai.

O nei iloiloga ua fa’apea ona auai atu ai nisi o fitafita tuai, e pe a ma le to’a 500, ma e latou te maua ai foi se avanoa e molimau ai mo le fa’alauteleina o Auaunaga a le Faalapotopotoga a fitafita tuai.

I le iloiloga i le aso Lua, sa faapea ona fa’afoeina ai e le afioga ia Uifa’atali se vaega o le iloiloga, i le avea ai o ia ma sui Taitaifono o le Komiti a le Maota o Sui, i mataupu tau i fitafita tuai, ma sa mafai ona fa’afofoga i molimau na avea ma sui o fitafita tuai, i aso e tolu. 

Na saunoa Uifa’atali, o se Konekeresi fou ma se faigamalo fou lenei, ma o se avanoa lenei e mafai ai ona toe fa’atulaga lelei ia auaunaga mo fitafita tuai.  Sa ia ta’ua le tatau ona mauaina e fitafita tuai ia auaunaga aga’alofa ma le tulaga lelei.  Ma ua iai sona talitonuga, o le a mafai e le Failautusi o le ofisa mo fitafita tuai, ia Doug Collins, ona fa’aleleia ia auaunaga mo fitafita tuai.

Ae o le latou tiute i totonu o le Konekeresi, o le fa’aauau lea ona u’una’ia ni suiga e mafai ai ona fa’alelei olaga o fitafita tuai.  

Na fa’aleoina e Uifa’atali lona agaga fa’afetai i le tele o molimau mo le VSO sa mafai ona fa’asusuluina se malamalama i le tele o mataupu, i luma o le komiti a le Senate ma le maota o Sui ma i lalo o le taitaiga a le latou taitaifono, le susuga ia Mike Bost, o le a fa’aauau ona o latou fa’alogologo i manaoga a fitafita tuai, i le tausaga atoa.