Pago Pago - AMERIKA SAMOA

AMATA TUFATUFAINA IA SIAKI O LAFOGA TOE MAUA

O se tala fiafia mai i le Ofisa o Tupe a le malo i le vaiaso ua mavae, e pei ona sa faalauiloa mai e le susuga ia Donald Kruse, le Tausitupe a le Malo.  Lea sa ia fa’alauiloa mai ai le amataina nei, ona tufatufaina siaki a i latou sa failaina a latou lafoga mai ia Ianuari 6, 2025 se’ia o’o mai ia Ianuari 29, 2025.

Ae peitai, e leai se fa’aaliga ua maua mai e tusa ai ma lafoga mai i le tausaga ua mavae, lea e ta’ua e nisi e le atunu’u, e le’i maua lava a latou lafoga.

Sa fa’aalia e le Tausitupe a le Faigamalo a Lemanu i se iloiloga a le Senate, i le tausaga ua mavae, sa tufatufaina lafoga i le tausaga ua mavae, e ala i ni talosaga faapitoa, e pei o faalavelave ma isi tulaga faapena.

Na ta’ua e le Tausitupe i lena taimi, sa mafua ona ia faia lea tulaga, ona o lona alofa i tagata na u’una’ia ai o ia e tatalaina mai lafoga a i latou na o’o atu i lona ofisa.  Ae o le taimi lea o lo’o vava o le atunu’u, ona o le tuai ona tufatufaina o lafoga.

MALIU FASIA SE ALII SAMOA I UASIGITONE

O le aso Lua o le vaiaso ua mavae, sa tupu ai se faalavelave i fafo o se falemeli i le ‘a’ai o Puyallup, i le setete o Uasigitone i Amerika, lea na maliu ai se alii Samoa e 27 tausaga, e suafa ia Edward ‘Eki’ Poloka.

O le susuga ia Poloka sa galue i le falemeli, ma na tagatavaleina o ia e seisi alii na galue foi i le falemeli, i se agaese, i le aoauli o le aso Lua ma maliu ai.

Na faamatalaina e se avetaavale a le falemeli, i se tasi o vaega fa’asalalau i Tukwila, le nofoaga na tupu ai le faalavelave, le fetaui lava o le tu o lana taavale ae ona faalogoina o le pa o se fana, ma ia va’aia le taufetuli mai o tagata mai totonu o le fale teuoloa a le falemeli.

Sa mafai ona fa’amaonia mai e le Ofisa a Leoleo i Tukwila le mauaina e leoleo o le alii e 33 tausaga lea sa fanaina ia Poloka, i totonu o se taavale, i Seattle.  Ae ina ua taumafai leoleo e pu’eina o ia, sa faapea ona liliu e le alii lana fana ma fasioti ai o ia.

Na fa’aalia foi e leoleo, le masani lelei o Poloka ma le alii na fasiotia o ia, ona sa galulue faatasi.

Sa mafai foi ona faatalanoaina e vaega faasalalau a le KIRO 7 ia le aiga a Poloka e tusa ai ma lenei faalavelave ma sa ta’ua e lona tuafafine o Kilbella le faafaigata ona ia taliaina le mea ua tupu i si ona tuagane.

O Kilbella o le ulumatua o se fanau e to’aono, ae o ‘Eki’ o le lona tolu, ma sa na o ia lava le tama o le latou aiga, ma sa ta’ua e seisi ona tuafafine o Peti, o le mea pito sili lea ona faafaigata ia i latou, ona e na o le tasi lava le latou tuagane.

Sa faamatala e Kilbella, o lona tuagane o se tagata alofa tele, i so’o se tasi e sau i lo latou fale.  Na ta’ua foi e le tuafafine laititi a ‘Eki’, o lona tuagane o se tagata e mafai ona sulufa’i iai i so’o se taimi o faigata.

Na galulue faatasi ia ‘Eki’ ma se tasi o ona tuafafine matua, o Amata Poloka, i le falemeli i Tukwila ma sa ia ta’ua le faafaigata ona ia talitonu o le a ia  le toe va’ai i si ona tuagane, aua o le masani a lenei tuafafine i aso uma i taimi o galuega, o le siaki po o iai se mea’ai a si ona tuagane.

I tomanatunatuga a le tuafafine laititi a ‘Eki’, o Alice sa ia ta’ua ai le la o faatasi ma si ona tuagane e ave o ia i lana galuega ma piki mai o ia pe a manava galuega.

O se vaega fa’afaigata i le aiga, ona ua maliu le alii sa fa’ao’oina le oti i si o latou tuagane, ae leai se faamaninoga i le mafua’aga sa ia faia ai lea tulaga.

LOKA SE FAFINE SAMOA I HAWAII I LE MALIU O SANA TAMA FAI

Na ripotia mai e le vaega fa’asalalau a le HawaiiNewsNow, ia le lokaina o se fafine Samoa e suafa ia Sina Pili, e 39 tausaga, i le aso Faraile o le vaiaso ua mavae, ma ua molia o ia i le fasioti tagata le mafaufauina faapea ma lona faia o tulaga na afaina ai se teineititi.

O le aso 22 o Tesema, 2023 na agai atu ai leoleo ma le vaega a le EMS i le fale o Pili i Laie, ma maua atu ai le tino maliu o Azaeliyah Pili-Ah You, e 11 tausaga le matua.  Ma na molimauina ni manu’a i ni vaega o lona tino, na aofia ma ona foliga, e pei ona ta’ua e loia a le malo.

Sa fa’atali le ofisa su’esu’e a le falemai i Honolulu, se’ia mae’a uma su’esu’ega, ona fa’amaonia lea o le mafua’aga o le maliu o Azaeliyah.

Ma e pei ona sa faalauiloa e Lt. Deena Thoemmes mai i le Ofisa Leoleo i Honolulu e faapea, i le mae’a ai o su’esu’ega sa faia, sa fa’amaonia ai le fasi e le ua molia, ia Azaeliyah, mo se umi e 30 minute, i le aso na maliu ai.  

Ae ina ua mae’a su’esu’ega ma le toe iloiloina o fa’amaumauga a le falema’i, ia Iuni 5, 2024, ua mafai ona fa’amaonia ai le mafua’aga o le maliu o Azaeliyah, ona o le sauaina o ia.  Ma sa maua e foma’i faapitoa, i a latou su’esu’ega, ia le tele o manu’a i le tino atoa o Azaeliyah, na aofia ai ma ona foliga ma lona ulu.  Ma e foliga mai sa a’afia foi o ia i le gasegase o le ‘pneumonia’.

Na ta’ua e foi e Lt. Thoemmes, ae e le’i maliu ia Azaeliyah, sa ia fa’ailoa atu i ona matua fai, o lo’o ma’i o ia ma sa mafai ona fa’amaonia i su’esu’ega na fa’ataunu’uina, le a’afia o Azaeliyah i le Koviti, Influenza A ma le Pneumonia.

Sa fa’ailoa mai foi e Lt. Thoemmes le iai o nisi fanau fai (vaetamaina) a Pili, e 12, 9, 8 ma le 7 tausaga ma ina ua maliu ia Azaeliyah, sa faapea ona aveina uma i latou i nofoaga e puipuia ai fanau e a’afia i sauaga i totonu o aiga.

E tusa ai ma fa’amaumauga i luga o le initeneti, o Pili e galue i le Iunivesite a Polika Iaga i Hawaii ma e na te umia ia se fa’ailoga o le ‘Masters’ i galuega e fesoasoani i aiga.

O le aso Tofi o le vaiaso nei, Mati 13, 2025, o le a faapea ona tula’i ai Pili i luma o le faamasinoga e tali ona moliaga.  Ae o lo’o iai nei o ia i a’ao a le ofisa a leoleo i Honolulu.