Pago Pago - AMERIKA SAMOA

MOLIA SE ALII I LE FAAFOEINA O SE TAAVALE E AUNOA MA SE LAISENE AVETAAVALE

O le aso 19 o Tesema, 2024, na faatu ai e ni leoleo sa tiute i luma o se faleoloa i Nu’uuli, ia se taavale sa agai atu i le itu i Sisifo, ae o lo’o tautau mai i fafo le moli pito i tua o lana taavale. 

Sa tapa e leoleo le laisene avetaavale a le alii avetaavale, le susuga ia Tualega Time, ae peitai, sa le gata ina leai sona laisene avetaavale, ae sa leai foi se ID na ia te ia.  Ma na fa’amaonia mai e le ofisa autu a leoleo, le leai o se faamaumauga o se laisene avetaavale a le susuga ia Time.

Na faapea foi ona fa’ailoa mai e le ofisa autu a leoleo, o le laisene o le taavale lea na alu atu ai Time, o se laisene a seisi taavale.  Ma ina ua fesiligia Time e tusa ai ma le laisene o lana taavale, sa ia ta’ua le atoa o le tolu vaiaso talu ona ia fa’aaogaina se laisene mai seisi taavale.

Sa faapea loa ona lokaina e leoleo ia Time ma molia o ia i lona fa’aaogaina o se laisene sese, o le fa’afoeina o se taavale e aunoa ma se laisene avetaavale faapea ai ma le tlaga faaletonu o moli o lana taavale.

O nei moliaga uma, o ni vaega ‘B’ o solitulafono mama, e mafai ona nofosala ai i le falepuipui, i le ta’i on omasina i le moliaga e tasi, po o se sala tupe e $500; po o faasalaga uma e lua.

E $1,000 se vaegatupe na faatulagaina e mafai ona tatalaina ai le ua molia mai i le falepuipui, e faatalitali ai lona faamasinoga.

FA’AMAONIA E LE SENATE IA LE FAATONUSILI O LE OFISA O TUPE FAASOASOA A LE MALO

O le vaiaso ua mavae, na ‘autasi ai finagalo a afioga i Senatoa, e pasiaina le faletua ia Sesulu Fepulea’i McMoore-Tufele, e avea ma Faatonusili o le Ofisa o Tupe Faasoasoa a le Malo, i sa latou palota e 17 ioe, ae aunoa ma se fa’atu’i’ese.

E le’i umi se iloiloga a le Komiti o Tupe Fa’asoasoa ma Paketi ma e le toatele foi  ni Senatoa sa tu’uina atu ni a latou fesili ia McMoore-Tufele.

Sa aloa’ia e le Peresetene o le Senate, le afioga Tuaolo Manaia Fruean ia tulaga ausia e le Faatonusili fou, e le gata i ana a’oa’oga ae faapea foi i galuega.  Ma na ia fesiligia McMoore-Tufele pe fia le aofaiga o tagata faigaluega a le malo o lo’o totogi i tupe feterale.  

Na fa’aalia e McMoore-Tufele, o le a ia fa’ao’oina mai lea fuainumera i se taimi o i luma ona e na o le tasi le vaiaso talu ona ia galue.

Sa faamalamalama mai e Tuaolo, ua mafua ona ia fesiligia lea tulaga, ona o sona popolega i le tulaga o tupu nei i Amerika, i le toatele o tagata faigaluega feterale ua fa’ate’a mai a latou galuega, ma o lo’o ia fia iloa pe fia ni tagata faigaluega lotoifale o le a mafai ona a’afia i lea faafitauli.

Na fesiligia e le Afioga i le Senatoa ia Muagututi’a Tauoa ia McMoore-Tufele, pe sa ia apalai mo le tofi Faatonusili pe na filifilia o ia e le kovana.  Ma sa ia fesiligia foi le Faatonusili fou po o ia te ia le malosi e mafai ai ona fa’afoeina le galuega, ona ua atoa le 71 tausaga o lona soifua.

Sa saunoa McMoore-Tufele, sa apalai o ia mo le galuega ona sa tatalaina le avanoa mo so’o se tasi o fia auauna i le malo ma tagata o Amerika Samoa ma na ia fa’ailoaina atu i le afioga i le Senatoa, e ui i lona 71 tausaga, ae ua fa’amanuiaina o ia e le Atua i le malosi ma le atamai, e faataunu’uina ai ona tiute.

Na toe saunoa Muagututi’a i le faigata o le galuega ona a’afia ai le mataituina o tupe a le malo.  Ma e pei ona ta’ua e le afioga i le Senatoa, o le fatu lea o le malo.  A leai se tupe, ua leai se malo.

Sa faapea ona faaluaina e le afioga i le Senatoa ia Utu Sila Poasa, le taitaifono o le komiti a le Senate, ia le manatu na fa’aalia e Muagututi’a, e ala i le taua tele o lenei tofiga i totonu o le malo.  Ma ia fa’amamafaina le tatau i le Faatonusili o le Ofisa o Tupe Faasoasoa a le malo ona faamautuina le tumau o le faigamalo i totonu o le paketi ua mae’a ona pasia.

Ma sa ta’ua e Utu le tupu mai pea i tausaga uma, o le faafitauli i le sili atu o tupe fa’aaogaina, i lo tupe pasia, ae e pa’u lava i luga o le Faatonusili o le Ofisa o Tupe Faasoasoa.  Sa saunoa Utu, e tatau ia McMoore-Tufele ona avea ma pa pupuni, ia taofia lea faafitauli e ala i lona fautuaina o taitai o le malo ina ia tausisi i tulafono o paketi.  Ma sa ta’ua foi e Utu, afai o le a mafai e le Faatonusili fou ona faia lea tulaga, o le a faapea ona leai se fete’ena’i i le va o le Fono ma le Faigamalo.

Sa fa’aleoina e le afioga i le Senatoa ia Togiola T.A. Tulafono, lona agaga fa’afetai i le filifiliga a le kovana, o se alo agava’a a Amerika Samoa, mo lenei tofiga taua a le malo.

Na aloaia e le afioga i le Senatoa ia Magalei Logovi’i, o se tasi na avea ma Faatonusili o le Ofisa o Tupe Faasoasoa i tausaga ua tuanai, ia le lu’itau o lenei tofiga ma ia u’una’ia ai le ta’ita’I fou ina ia faamautuina le vave ona faatinoina o a latou tiute. 

Sa fa’aalia e McMoore-Tufele lona agaga fa’afetai i afioga Senatoa mo fautuaga ma tima’iga taua ma afai ae fa’amaonia lona tofiga, na ia folafola mai, o le a ia mulimulita’i ai.  Na ia fa’aleoina foi lona agaga fa’afetai i le afioga i le kovana, mo le filifilia o ia i lenei tofiga.

TOTOGI TAIMI LE FAIGALUEGA MO TAGATA FAIGALUEGA A LE MALO E AUAI I TA’ALOGA O LE SISIGA FU’A

I se fa’aaliga fa’alauaitele mai i le Ofisa a le Kovana, i le aso Tofi o le vaiaso ua mavae, Mati 6, 2025, ua fa’alauiloa mai ai le mauaina e tagata faigaluega a le malo o le a auai i ta’aloga mo le Sisiga Fu’a, ia alauni mo le ta’i lua itula, pe afai ae faia a latou ta’aloga i taimi faigaluega masani.

Ma e ao i tagata faigaluega uma o le a auai i nei fa’agatama, ona galulue faatasi ma a latou supavaisa ina ia mafai ona fa’amautuina le iai o nisi e mafai ona fa’ataunu’uina galuega a’o auai atu i latou i a latou ta’aloga. 

O le sisiga fu’a mo lenei tausaga, e pa’u i le aso Tofi, Aperila 17, 2025.