Pago Pago - AMERIKA SAMOA

AMATA TAPENAPENAGA MO LE SISIGA FU’A

O le aso 17 o Aperila 2025, o le a fa’amanatuina ai le Sisiga Fu’a lona 125 a Amerika Samoa, i le Stadium i Iliili.  Ae o’o mai le taimi nei, e le’i fa’alauiloina mai ia le polokalama mo le aso atoa, se’ia vagana ai se fa’asalalauga mo fale’aiga, aua lea aso.

O le aso e fa’agataina ai le lesitalaina o se fale’aiga mo le Sisiga Fu’a, e tusa ai ma le fa’aaliga mai i le malo, o le aso 7 o Aperila ma ua fautuaina i latou o lo’o fia fa’atuina ni a latou fale’aiga i totonu o le stadium, ina ia taulimaina ia se laisene faipisinisi faapea ma se Pepa Falemai (DOH Health Card).

E tasi le Sa fou lea ua fa’amoemoe e auai i le Fa’agatama i le Tai, o lenei tausaga.  O le sa lea a le afioaga o Pava’ia’i.

FA’AFOEINA OFISA TAGATA FAIGALUEGA A LE MALO IA A’OA’OGA MO KAPENETA

O le aso 25 o Mati, 2025 sa fa’afoeina ai e le Ofisa o Tagata Faigaluega a le Malo (DHR) ia se a’oa’oga faapitoa mo totino o le kapeneta a le Faigamalo, i le DYWA i Tafuna.  O le faamoemoega o lea aoaoga, ina ia fa’alauteleina ai le nofo malamalama o totino o le kapeneta, i fa’agasologa po o tiute a ofisa ma matagaluega ta’itasi a le malo.

Sa auai atu ai foi i lea a’oa’oga ia le afioga i le Kovana ia Pulaali’i Nikolao Pula ma i sana saunoaga i lea fa’atasiga, na ia fa’aleoina ai lona agaga fa’afetai mo lea fuafuaga ma ia toe fa’amautuina ai lona lagolagoina o lea aoaoga.  

Na ia fa’amamafaina le taua o le fa’amautuina o le nofo malamalama o taitai o lo’o gafa ma le tautuaina o tagata lautele faapea le mataituina o tagata faigaluega, i auala tonu ma sa’o e fa’afaigaluega ai tagata.

Sa faapea ona ia u’una’ia o le soalaupuleina o tulaga e patino i tagata faigaluega ma sa ia ofoina atu foi le agaga fa’alototele i le aufaigaluega, ona o le fa’aauauina o iloiloga o fa’atonu fou.

Na faapea foi ona u’una’ia e le afioga i le kovana ia lana kapeneta, ina ia fa’aauau pea ona fa’atinoina a latou tiute  ma le fa’amaoni, e ui i le tele o fa’asea ma tala taufa’aleaga.

O le taimi nei, e toalua ni Faatonu fou sa le’i pasiaina e le Maota Fono, e aofia ai le faatonu mo le DMWR, o le faatonu mo le Ofisa o le Paketi.  Ae o le faatonu mo le ofisa o faatauga a le malo, e le’i pasia e le Maota o le Senate faapea ma le faatonu o le ofisa o Paka ma Malaeta’alo.

ALOA’IA LE MASINA O MATI O LE MASINA MO LE NOFO MATA’ALA I LE GASEGASE O MANA’OGA FAAPITOA

O le masina lenei ua aloaia e le afioga i le Kovana ia Pulaali’i Nikolao Pula, o le masina e ao ona nofo mataala ai tagata o Amerika Samoa e tusa ai ma i latou ua fa’apea ona iai mana’oga faapitoa, e le gata i le tino ae faapea le mafaufau.

I se sauniga faapitoa na fa’ataunu’uina i le Ofisa o le Voc-Rehab, ia Mati 26, 2025, sa faapea ona fa’afeiloa’ia ai e le afioga ia To’omaga Dr. Herman Scanlan ia  malo fa’aaloalogia, na aofia ai le afioga i le Kovana, o le taitaifono o le Komiti o le ASR (American Samoa Rehabilitation) ia Denise Tuito’elau, o faiaoga mo fanau aoga e iai mana’oga fa’apitoa, o alo ma fanau e iai manaoga faapitoa faapea ma o latou aiga.

O le Faatonusili o le OVR ia Adrian Vasai sa na ia fa’aleoina le misiona a lo latou ofisa, mo le fa’aauauina ona fa’aleleia atili auaunaga ma tulaga i totonu o soifuaga o tagata o Amerika Samoa o lo’o a’afia i gasegase i manaoga faaptoa faaletino po o le mafaufau.

I lana saunoaga fa’apitoa, sa fa’aleoina ai e le afioga i le kovana ia lona agaga fa’afetai i le OVR, matua ma aiga aemaise o fanau ona o la latou tu’uto ina ia fa’aleleia atili tulaga o soifuaga.  Sa faamautuina e Pula le taua o le fesoasoani ma le lagolagoina o fanau o iai manaoga faapitoa, a’o latou agai i luma i lenei olaga.

Sa ia ta’ua e faapea, o a tatou fanau, aemaise i latou i totonu o aoga maualuluga, ua saunia mo leisi la’asaga i o latou olaga, e pei o galuega po o le fa’aauauina o aoaoga.  Ma ina ia manuia nei suiga i o latou olaga, e manaomia ia le lagolago malo ma le fa’aaupegaina lelei, ina mafai ai ona o latou ausia a latou sini fa’atuina.  Ma o le autu moni lea a le ofisa o le Voc-Rehab, e le gata o se alagamanuia ae faapea foi lo latou lagolago malosi, e fesoasoani i le lima ta’ita’iina o alo ma fanau, i le agai i luma.

O se tasi o vaega taua o lea sauniga, o le taimi na aloaia ai le alo tamaitai a le afioga i le Lutena Kovana, o Fiafaiva Charlotte Ae Pulu, lea sa sauna atu mo le ulufale atu i totonu o vaega’au, ae peitai, na a’afia o ia i se gasegase sa le taulau ai lona faamoemoe.

Ae e ui i lea, fa’atasi ai ma le lagolago malosi ma le tausiga alofa a lona aiga ma tagata o le atunu’u, ua faapea ona avea ai o ia ma se tasi o aseti taua i totonu o galuega o le ‘Information Technology’.