Pago Pago - AMERIKA SAMOA

FA’AMAUTU PA’AGA A MEDICAID A AMERIKA SAMOA MA LE FALEMA’I A STRAUB

 I se fa’aaliga mai i le ofisa a le Medicaid a Amerika Samoa i le vaiaso ua tuanai, ua fa’alauiloa mai ai le fa’amautuina o se faiga pa’aga i le va o Amerika Samoa ma le falema’i a Straub i Hawaii.

O lea maliliega ua fa’ailoga ai se la’asaga tele agai i luma, aua le fa’amautuina o auaunaga o le tausia lelei o soifua maloloina o tagata o le teritori.

Ma a mae’a le ulua’i tausaga o lenei maliliega, o le a faapea ona toe iloiloina pe fa’aauauina lea faiga pa’aga.

Sa ta’ua e le Faatonusili o le ofisa a le Medicaid a Amerika Samoa, ia Luisa Kuaea e faapea, o se manumalo lenei mo tagata o le atunu’u.  Aua ua tatalaina ai le avanoa e maua ai seisi fesoasoani tau i le soifua maloloina, mo tagata o le atunu’u, e agai atu ai i fafo mo a latou talavai.

FILIFILIA LITIA GODINET I TA’ALOGA MO LE IPU O LE PASEFIKA

O se mitamitaga tele i le Asosi Tenisi a Amerika Samoa, le filifilia o le tamaitai o Litia Godinet, e tauva i le ‘2025 Billie Jean King Cup’, i le atunu’u o Meleisia, lea e amataina ia Iuni 2025,

O le a faatasi atu Litia ma lana ‘au (Pacific Oceania) lea e aofia ai Violet Apisah, Patricia Apisah, ma Carolann Delaunay, i lalo o le taitaiga a le latou Kapeteni o Cyril Jacobe ma le tamaitai Faiaoga ia Abigail Tere-Apisah.

O Litia o se alo tamaitai e fa’asino i le alii faiaoga o lenei fa’agatama, le susuga a Dave Godinet ma le faletua a Evi Godinet,  O se tamaitai ua lauiloa foi i lenei fa’agatama,

Sa fa’aalia e le susuga ia Dave ma le faletua ia le mitamitaga o si o latou aiga, ona ua filifilia Litia, o se tasi o totini o le ‘au a le Pasefika lea o le a tausinio i le Ipu a le BJK (Billie Jean King).  O se ipu sa tausinio ai foi ia le uso matua a Litia, o Tia, a’o ta’ua lenei Ipu o le ‘Federation Cup’.

O lenei ta’amilosaga, o se ta’amilosaga pito sili ona ta’uta’ua i totonu o leei fa’agatama i le itu a tamaitai.

Na fa’alauiloa mai foi e le Asosi Tenisi a Amerika Samoa lo latou agaga fa’afetai ma le mitamita i le filifiliga o Litia, e avea ma sui o Amerika Samoa i lenei ta’amilosaga.

FILIFILIA NISI O ALO O AMERIKA SAMOA I LE LISI O LE PERESETENE O LE SNHU 2025

O se tala fa’afiafia loto, ua faapea ona taunu’u mai, i le filifiliga o nisi o lupe fa’alele a le atunu’u, i le lisi o le Peresetene o le Iunivesite a New Hampshire i Saute (SNHU) i le tautotogo o lenei tausaga 2025.

O le kuata lenei e amata mai ia Ianuari se’ia o’o mai ia Me, ua fa’apea ona filifilia ai nei alo o Amerika Samoa, ua mafai ona ausia ni togi (grade point averae) e 3.700 ma agai i luga.

O i latou nei, e aofia ai Deidra Tautunuafatasi, Vaioulu Leoso, Flora Atonio, Adrianna Snow-Tafao, ma Francine Toilolo.