Pago Pago - AMERIKA SAMOA

TAPUNIA E LE OFISA O LE SOIFUA MALOLOINA IA NI FA’ATO’AGA SE FA

Tapunia e le Ofisa o le Soifua Maloloina ia ni fa’ato’aga se fa

E fa ni fa’ato’aga ua tapunia e le Ofisa a le Soifua Maloloina ina ua maua i a latou su’esu’ega, o lo’o solia e nei fa’atoaga ia le tulafono e tusa ai ma vala’au o lo’o latou fa’aaogaina faapea ai ma nisi o auala o lo’o fa’atino ai la latou galuega.

O nei fa’ato’aga na aofia ai le FL Farming i Lepuapua, o le Thanh Ho Due Farming i Leone, o le K&B farming i Pava’ia’I faapea le fa’ato’aga a Sitau i Vaitogi.

O nisi o tulaga sa faatino e nei fa’ato’aga ua mafua ai ona tapunia, na aofia ai le susunuina o ni mea susunu namu (mosquito coils) po o vailaau i totonu o pusa aisa ta’atia, lea o lo’o fa’aaogaina e teu ai fua o fa’ato’aga.  Ma na fa’amaonia lea i le va’aia le mu o nisi vaega i totonu o pusa aisa ta’atia.

E le gata i lea, o le tulaga fa’aletonu o alavai, o lo’o fa’aalu mai ai le vai lafoa’i mai totonu o fale le ta’ua, o fa’atanoa fufulu ipu po o masini ta lavalava.  Lea sa va’aia i su’esu’ega a le Ofisa o le Soifua Maloloina, le fa’aalu o le vai i le palapala, ae le o le fa’ata’anoa mo suavai lafoa’i fa’atulafonoina.

Faapea ai ma le fa’aaogaina o lapisi lafoa’i (se’i tulou) a mea tua’olo ma tagata, e fai ma fetalaisa i palapala o lo’o to to ai fua o fa’atoaga.  Atoa ai ma le fa’aaoga sese o vaila’au.  Aemaise o le tele o le lapisi  (na aofia ai ma lapsii lafoa’i mai fale le ta’ua). 

O lenei mataupu sa ripotia e le Ofisa o le Soifua Maloloina i le masina ua mavae, ina ua mae’a ni a latou su’esu’ega. 

O lo’o ua taofi le Ofisa a le Soifua Maloloina, le o gatasi o la latou fa’ai’uga ua faia ma tulafono a le malo (Maga 13.0206), lea o lo’o tu’uina atu ai i lo latou ofisa le maloiaga ma le tiutetauave, e puipuia ma fa’aleleia atili ai tulaga o le soifua maloloina a le atunu’u.

Ma o tulaga na o latou molimauina i nei fa’ato’aga, ua tula’i mai ai se popolega tele i lo latou ofisa, ona e ono tula’i mai ai ni a’afiaga tau i le soifua maloloina a le mamalu lautele.

Aemaise ai, o nei fua o fa’ato’aga, e mo le fofoga taumafa a le mamalu lautele, ae o lo’o iai se talitonuga, ua afaina i vaila’au o lo’o sese ona fa’aaogaina i totonu o le fa’ato’aga. 

FAIA SE FONOTAGA A KOMISI O LE GAGANA SAMOA A SAMOA NA LUA

Sa auai atu ia Elisapeta T. Lesatele Alaimaleata, le Faatonusili o le Komisi o le Gagana Samoa a Amerika Samoa, i le fonotaga fa’alemasina ma le Komesina o le Komisi o le Gagana Samoa mai i le Malo Tuto’atasi, le susuga i le Faafeagaiga Malolo Manumalo, ia Rev. Dr. Vaiao ‘Eteuati, faapea ai ma totino o Komisi e lua.

E tele ni mataupu sa faapea ona soalaupuleina i lea fonotaga, aua le atina’eina o le tulaga o le Gagana Samoa, na aofia ai ma le fa’atumauina i totonu o a’oga.  E aoga i faiaoga, le aoaoina o le Gagana sa’o ma kalama, faapea ai ma le gagana faavae, ina ia mafai ona maua e fanau ia le lototele e fa’aaoga ai le Gagana Samoa.

Na faapea foi ona iloiloina e le Komisi ia nisi o upu o lo’o fa’aauau ona fesiligia ma fa’aopoopoina e nisi o faiaoga, atou o iai ni uiga po o mana’omia ona fa’asa’oina, aua le fa’aaogaina i totonu o soifua o fanau aoga, e pei o le fa’aaogaina o le “O lo’o”.

Na finauina e faapea, o le “Olo’o” i su’esu’ega a polofesa Samoa, o se faasino taimi, ae afai ae tu toatasi le O, e pei ona iai i totonu o le Tusi Paia (O lo’o), ua leai sona uiga.  Peitai, ua fautuaina e Komisi o malo e lua, ia le fa’aaogaina o sipelaga uma e lua, mai i le Tusi Paia ma su’esu’ega a Polofesa o le Gagana.

FAAMUTA ONA TALIAINA TALOSAGA MO LE TOFIGA FAATONUSILI A LE ASTCA

O le aso Tofi o le vaiaso ua mavae, Me 29, 2025 sa faapea ona fa’amutaina ai le toe taliaina o ni tusi apalai mo le tofiga fa’aleta’ita’i a le Ofisa Telefoni a le malo (ASTCA), lea na amata fa’asalalauina i luga o leitio, televise a le malo, tafa’ilagi faapea le Samoa News, talu mai le masina ua tuanai.

E le’i ta’ua i totonu o le fa’aaliga, ia ni agava’ma’oti po o tala’aga o galuega, se’ia vagana ai le fa’atumuina o le pepa talosaga ma se ‘oto’otoga o soifuaga a’oa’o ma galuega.

E tusa ai ma se ripoti ua o’o mai i le Samoa News, ua fa’alauiloa mai ai le fa’amutaina o le konakarate a le susuga ia Chuck Leota lea o lo’o avea ma Faatonusili a le ASTCA i le taimi nei.  Ae o le a fa’aauau pea lona tofiga se’ia maua se Faatonu fou, e sui tulagaina o ia.