POLOKALAMA ARTS COUNCIL MO LE TU'UAGA O A'OGA

O le polokalama masani a le Arts Council mo le tu'uaga umi o a'oga a le fanau A'oga po'o le Taumafanafana, o  le a faia i le TAOA i Pago Pago, po'o le Nofoaga Autu mo polokalama a Tagata Matutua.

"Ona o lo'o ua pisi lava le matou itu fo'i ona o le fausaga o le Fale Mata'aga fou, ae maise o lo ua fa'aleleia fo'i totonu o le Ofisa Tuai, o lea ua feutaga'i ai i ma'ua ma le matou pa'aga o le TAOA, aua o lo'o matou galulue fa'atasi lava i lenei polokalama mo fanau a'oga, ina ia fa'atautaia mai le Ofisa Autu o le TAOA i Pago Pago lea polokalama mo le fanau,” o se tala lea a le tama'ita'i Fa'atonusili o le Arts Council Lauagaia Mary Taufete'e.

O le polokalama ua fa'atulaga e pei lava o tausaga ta'itasi, e a'oa'oina ai le fanau ina ia mafai ona latou faia galuega alofilima o lo'o ua agava'a tele ai le vasega o tagata matutua o le atunu'u.

O le lalaga fala, pulou, ato fu'e umu, mailo ma isi lava galuega alofilima fa'apena e aoga tele i le siomaga o le soifua o le tagata Samoa, ua fa'apea ona fefa'asoa'i ai fanau iti ma matua matutua o le atunu'u.

O tu fo'i ma aga fa'asamoa i tulaga tau fa'afiafia, i pesega, siva o so'o se ituaiga fa'asamoa, ma tata le ukulele ae maise o le fa'atalatalanoaga i fesili ma tali i ni mea e fia malamalama ai le fanau i tala fa'asamoa ma tala fa'afagogo ua fa'aopoopo nei i lea polokalama matagofie.

"O le autu, ia iloa e fanau talavou a le atunu'u ona fiafia e fa'afiafia, sisiva ma pepese ma tata ukulele o se tasi lea o agaifanua e matua lauiloa ai o tatou tagata i so'o se mea e fa'apotopoto ma alaalata'i ai,” o se tala lea a Taufete’e.

Ua amata ona talia tamaiti mo lenei polokalama i le summer ma ua faao'o ane lava o latou suafa ma le lesitala masani i le Ofisa autu o le Arts Council i Fagatogo lava. E fa'amuta lea lesitala i le fa'aiuga o lenei masina.

FANAU A'OGA MAUALUGA AUAI FOLASAGA O GALUEGA FETERALE

Ua mae'a folasaga sa feagai ai ma vaega o Tautua Eseese o le Feterale i le atunu’u, lea sa fa'ataunu'uina i le lotoa a le Ofisa o Va'ai Tau i Tafuna ia Iuni 12.

O le naunauta'iga, ia mautu filifiliga tatau a le fanau a'oga maualuluga i ni ituaiga o galuega e manatu i latou e tulimata'i, a'o taumafai e aoaoina i mataupu e atina'e ai agava'a e fa'atino ai lea fa'amoemoe i le lumana'i.

Na aofia fa'atasi atu sui mai le US Coast Guard, US Army, National Park Service, Matagaluega o le Initeria, USDA  ma le National Marine Sanctuary, ae maise o le Koluse Mumu a Amerika ae maise o le tatou Ofisa o le Va'ai Tau fa'apea ma le NOAA.

"O le tele o le taimi sa ou fa'alogologo ma fesili fo'i i le vaega a le Coas Guard lea sa faia le latou folasaga ma le mana'oga ina ia toatele alo o Ameirka Samoa e ulufale atu ma galulue i le latou fo'i vaega o le Vaega Au. Ua fiafia lava e iloa lelei e le tau i latou, ae puipuia e i latou gataifale uma o le Iunaite Setete, ma e tele le avanoa e mafai ai ona toe taliu mai i tiute i le tatou atunu'u ma mafuta pea i aiga,” o se tala lea a se tasi o atali'i e a'oga i le Tafuna High sa fesiligia i sona taofi.

$2.1MILIONA LAFOGA TOTOGI MO LE ASO FARAILE NEI

Ua fa'ailoa mai e le Ofisa o Tupe a le malo, o lafoga e aotelega i le $2.1miliona ua mae'a fa'atulaga e taua'aoina atu i e sa faila latou lafoga mai ia Fepuari 5, se'ia o'o ia Fepuari 14.

Ma o le aso Faraile, Iuni 15, ua fa’atulaga e tufatufaina ai siaki o refund o lafoga ua maea ona fa’atulaga.

O le vaega lona fitu o lafoga totogia ua aotelega i le $2.1miliona pe a tu'uaofai, o le Additional Child Tax Credit e sili ma le $1.3 milion ma le $790,623 o lafoga e totogia mai e le ASG.

O le ituaiga tala lea ua leva ona tatalia e le to'atele, aua ua amata ona femalaga'i tagata mo tu'uaga umi a le fanau mai a'oa'oga, ae maise ua amata avea fo'i aso malolo o nisi ina ia auai i fa'au'uga o fanau i fafo ma asiasi aiga i fafo atu o Amerika Samoa nei.

MAEA FAALELEIA PEPA TALA TUPE A LE TBAS

O le fa'aiuga o le vaiaso totogi ua te'a e to'atele i latou na fa'ailoa mai, ua fiu fo'i e ave latou Cards mai le TBAS (Territorial Bank of American Samoa) e fa'aaoga i a latou fa'atauga ma le ATM, ae le mafai ona fa'aaogaina, e toe fiki mai i le card e le mafai ona tala mai ai tupe.

Peita'i, lea ua toe fa'alauiloa aloa'ia mai e le CEO, Phil Ware, "Ua mae'a nei ona faia feutagaiga uma lava a le tatou faletupe ma le vasega o masini tala tupe, ua sologa lelei mea uma, ma ua mafai fo'i ona fa'aaogaina a tatou Cards e tala ai tupe ma fa'aaoga i fa'atauga i so'o se faleoloa o lo'o i ai na masini."

"Ua matua matamuli fo'i i nei mea, ua tele le fa'atauga aua o lo'o mautinoa lava o lo'o i ai le tupe i le teugatupe, ae o'o atu i le kesia ua uma fo'i ona taina le fa'atauga, ae avatu le Card ae toe oso mai i tua, e le mafai ona tala se tupe." O le tala lea a se tasi o tama na faia lana fa'atauga tele i le Ace Hardware.

TALIA TALOSAGA FAIFA'ATO'AGA

O faifa'ato'aga uma lava sa tele afaina o latou fa'ato'aga i le taimi na lavea ai i tatou i le ‘afa o Gita, ua mafai ona fa'aulu atu a latou talosaga mo se fesoasoani mai i le USDA Farm Service Agency.

O lea fo'i fesoasoani ua fa'ailoa mai, ua mae'a pasia mai e le poloaiga fa'alaua'itele a Peresetene Trump ina ua mae'a Gita.

Ua fa'ailoa mai e Josephine Lealasola o le Farm Service Agency, e tatau lava ona i ai au fa'amaumauga ma lisiti o fa'atauga uma o fua o au fa'ato'aga sa fa'atau atu.

Afai la o lo'o mautu au fa'amaumauga uma nei, atoa ai ma ni ata sa tapu'eina o lau fa'ato'aga i ona afaina sa i ai ina ua mae'a Gita, e mafai loa ona e faia lau talosaga ma fa'aulu atu i lea Ofisa.