POLOKALAMA FA'ASOLO A LE MATAGALUEGA O TINA MA TUPULAGA:

I le tausaga nei ua fa'atulaga ai polokalama e fa'aauau pea ona ofoina mai e le Matagaluega o Tama'ita'i ma Tupulaga Talavou (DYWA) ina ia fa'aleleia atili le sailiga o tomai eseese e mo'omia ona agava'a ai tamaitai ma tupulaga, e maua ai ni galuega pe fa'atuina ai fo'i ni a latou pisinisi e tausia ai aiga.

O lo'o fa'aauau kosi fa'akomipiuta ina ia o gatasi tina ma latou fanau i tomai e iloa ai ona fa'aaogaina masini komipiuta. "E ao lenei kosi e fa'alautele ai avanoa faigaluega mo tama'ita'i ma tupulaga, ae maise o le iloa lelei e matua ona fa'aaoga nei masini ma fesoasoani fo'i i fanau i totonu o a'oga, lea ua matele ina fa'aaogaina ai nei masini i a latou suesuega,” o se tala lea a le DYWA.

O Ianuari 28 e amatalia ai le kosi muamua ae fa'aiuina ia Fepuari 15.  Soso'o lea ma le kosi lona lua ia Fepuari 15 ia Mati 15. O le isi kosi e amatalia lea ia Mati 21 se'ia o'o ia Aperila 10. O le ali'i faia'oga o Zena Iese.

O le Kosi mo Kuka eseese ina ia fa'aauupegaina ai tamaitai ma talavou i le gaosiga lelei o taumafa mo le aiga, po'o le sailiga o le tusi pasi e fa'aaoga e sailia ai se galuega pe fa'atuina ai fo'i lau lava pisinisi gaosi mea'ai. E amatalia le Kosi muamua ia Ianuari 22 se'ia o'o ia Iuni 28. 

Kosi lona lua o le Kuka lava lea, e amatalia lea ia Ianuari 22 se'ia o'o ia Iuni 28, i Aso Lua ma aso Tofi, amatalia lea i le itula e 9:00 i le taeao seia o'o i le 12:00 i le aoauli; ae o aso Tofi e amatalia i le 1:00 se'ia o'o i le 4:00 i le afiafi. Faiaoga o le tama'ita'i o Britannia Eneliko.

A'oga Elei ma Lomiga o Ie Elei e amatalia le Kosi muamua ia Ianuari 22 se'ia o'o ia Iuni 28. O le a faia vasega i le aso Gafua ma aso Lulu mai le itula e 9:00 i le taeao se'ia o'o i le itula e 12:00 i le aoauli. O aso Lulu e amata ai i le itula e 1:00 i le aoauli ae fa'amae'a i le itula e 4:00 i le afiafi.

Kosi lona lua i le Elei ma le Lolomia o Ie Elei, e amatalia fo'i ia Ianuari 22 se'ia o'o ia Iuni 28 ae faia latou vasega i le aso Lua ma aso Tofi a'o itula uma lava e tasi. Faia'oga mo lea kosi o le Elei ma le Lolomia o Ie ma lavalava e fa'atautaia lea e Tou Collins.

Kosi o le Toe Fa'aleleia o Ietoga e aoaoina lea e le tina o Britannia Eneliko. E amatalia lea kosi ia Ianuari 25 seia o'o ia Aperila 5. E faia vasega i Aso Faraile ta'itasi ma e amatalia i le 9:00 i le taeao seia o'o i le 12:00 i le aoauli. Kosi lona lua e amatalia lea ia Aperila 22 se'ia o'o ia Iuni 28, e faia lava i aso Faraile i lona itula e 9:00 - 12:00 i le aoauli.

Aoaoga o le Tui Teu Fuagala'au e fa'atautaia lea e le tina o Ms Britannia Eneliko e amata le kosi muamua ia Ianuari 22 se'ia o'o ia Iuni 28, e faia lea i aso Gafua ma Aso Lulu o vaiaso ta'itasi mai le itula e 9:00 -12:00 i le aoauli; ma le itula e 1:00 se'ia o'o i le itula e 4:00 i le kosi lona lua i ia lava aso.

O a'oga Suisui ua fa'atautaia nei e le tina o Ana Gaoa, ma e faia vsega o le kosi amata mai ia Ianuari 22 seia o'o ia Iuni 28 i aso Gafua ma aso Lulu o vaiaso ta'itasi i le itula e 9:00 se'ia o'o i le 12:00 i le aoauli  ma le Kosi lona lua i aso Lua ma aso Tofi i le itula e 9:00 se;ia o'o i le itula e 12:00 i le aoauli ma aso Tofi o vasega i le afiafi 1:00 se'ia o'o i le 4:00 i le afiafi.

O aoga a Tama'ita'i i le Fa'afoega ma Inisinia lau ta'avale  ua fa'atautaia lea e le ASCO Motors Management and Mechanics ma e amatalia le kosi muamua ia Fepuari 4 se'ia o'o ia Mati 29 i aso Gafua ma Aso Tofi o vaiaso ta'itasi mai le itula e 4:00 se'ia o'o i le itula re 6:00 i le afiafi.

O le kosi lona lua e amatalia lea ia Aperila 22, se'ia o'o ia Iuni 21 i aso Gafua e o'o i le aso Tofi mai le itula e 4:00 se'ia o'o i le itula e 6:00 i le afiafi.

Fa'autagia mai ua tatau ona e valaau i le DYWA telefoni numera 644-2835 mo ni fa'afesili ina ia malamalama lelei fo'i le sui i lou fanoga i kosi ua e fia lesitala ai i lenei tausaga. Talanoa i sui nei: Loretta, Saini mo sou avanoa.

TAOFIGA O GALUEGA A LE FETERALE SILI ONA UMI

O lenei le tausaga ua sili ona umi le taofiga o galuega a le Feterale i ana matagaluega ua a'afia e aofia ai le Paka & Laufanua Fa'asaoe, lea fo'i e a'afia ai ma i tatou iinei, le vaega o le Puipuiga Fa'alotoifale o le Malo tele, e a'afia ai fo'i i tatou, ma le Vaega o Polokalama a le USDA lea e fa'atupeina fo'i le Food Stamp ma isi alamanuia uma lea e a'afia ai fo'i ma i tatou iinei. Ua fa'apena fo'i ma le Matagaluega o le Initeria a le malo tele i lea a'afiaga, o iina fo'i lea e fa'asoa mai ai le tatou tupe fa'asoa.

Peita'i ua tu'ufesili nisi o matua matutua o le atunu'u e sili ona malamalama lelei pe afai e tusia ma fa'amatala ia i latou mea e tutupu i le malo tele fa'apea ma le tatou malo iinei pe afai e tusia ma fa'amatala i le tatou gagana, "AISEA?"

Ona o lo'o fete'ena'i lagona o le Konekeresi ma le ali'i Peresetene i se fa'ai'uga i se tinoitupe e fausia ai le pa e puipui mai ai Amerika mai le to'atele o tagata e ulufale atu i totonu o ona eleele e aunoa ma se fa'atagaga.

O le tuaoi lea o Amerika ma Mexico e matele ina sopoia atu fa'aosolitulafono e i latou e manana'o e nonofo ma ola i Amerika, ae le'i mua'i uia ala e mafai ai ona ulufale i le Iunaite Setete o Amerika.

Ua lipotia mai, o matagaluega ua faatupe nisi o polokalama o lo'o maua e le lautele o le tatou nei teritori, USDA, ma le Homeland Security lea o loo afaina tele i lea taofiga o galuega.

E le o nofonofo ai le tama'ita'i Faipule ia Aumua Amata, peita'i ua galulue punoua'i i latou fa'atasi ma le Matagaluega o le Initeria (DOI) ina ia taumafai lava ala e le motusia ai le feso'ota'iga a le DOI ma Amerika Samoa. 

"Ua to'atele le aufaigaluega a le Initeria ua fa'amalolo le tumau mo lenei vaitau, peita'i o lo'o faigaluega le Ofisa o le Sui Failautusi o le Initeria Dough Domenech ma Nikolao Pula, lea e le o a'afia i le fa'amalologa ona o lenei taofiga i le taimi nei. Ua i ai lava galuega ua fa'ailoa mai e Pula o lo'o mafai ona fa'atino e ia i le taimi nei, ma ua tumau pea le mana'omia ona ou faigaluega,” o se tala lea a Aumua.

TAPUNIA OFISA KONESULA SAMOA AUSETALIA - MASALOMIA LE MELI NA AVATU

Ua fa’alailoa le vave ona tapunia o le Ofisa o le Konesula o Samoa i Sini, Ausetalia, ina ua masalomia se meli na fa'ao'o atu, o se tusi ua i ai se pauta e ono lamatia ai le soifua o le aufaigaluega i lea ofisa, i le vaiaso na te'a nei.

Na fa'ailoa mai i se lipoti, na vala'auina nisi o le vaega o leoleo suesue ae maise i tulaga o meli e avatu fa'apitoa ae ua masalomia ni kasa o'ona po'o se pomu o lo ua aofia ai, i le ofisa o le Konesula Samoa i Sini, Ausetalia, ina ua masalosalo le aufaigaluega o lo'o aofia ai ni pauta o'ona.

E to'alua tagata faigaluega sa i ai i lea ofisa i le taimi na kiliva atu ai lenei tusi, ma sa vave ona la'ua fa'afeso'ota'ia le tautua a lea vaega o tagata suesue fa'apitoa a Leoleo NSW ina ia latou suesuea le tusi lenei poo saogalemu mo le tatalaina i totonu o le latou ofisa.

E ui ina ua mae'a fa'ailoa mai ua saogalemu, ae ua fa'ao'o fo'i lea meli mo suesuega ma ua fa'aauau le suesuega e ali'i leoleo a le NSW a Ausetalia, mo a latou fa'amaumauga ma nisi sailiga e ono talia ai ni fa'afesili tau lea tusi ma le sui na auina atu ai.