Ads by Google Ads by Google

Tala I Vaifanua


[ata: foa'i]

SAILIA TOTO MO ITUAIGA UMA I SAMOA & TOTO 'AB' MO AMERIKA SAMOA

 

Mai Samoa ua fa'aalia mai, ua fa'asalalau fa'ala'ua'itele le mana'omia o nisi e foa'i atu o latou toto mo le falema'i tele Tupua Tamasese Meaole National Hospital. Ua fa'ailoa mai ua manaomia mo ituaiga toto uma lava, ona ua matua leai lava se toto fa'aagaaga mo ni taotoga e manaomia ai se toto e fesoasoani i e o faia taotoga, ae ua leai se toto.

 

Peita'i i le tatou foi atunu'u nei, sa fa'asalalau fa'alaua'itele mai nisi o le ituaiga toto 'AB' ua mana'omia mo se gasegase o lo'o faia le taotoga, ae matua leai lava lea ituaiga toto i le sapalai a le tatou falema'i tele i Faga'alu o lo'o toto.

 

O le susuga le ali'i Faife'au, Rev. Iakopo Seumalo sa ia fa'ailoa mai, "O a'u la lea ua ou fa'alogo mai i le mana'omia lea, atonu e fa'aolaina se tasi pe a foa'i atu sina vaega o lo'u toto e togafitia ai o ia. O lo'u toto fo'i ou te iloa lelei e seasea i ai se tasi e maua ai. Afai o a'u nei, a'o le sui o lo'o taoto, pe afai e soifua pea, o ia taeao i lea foa'i."

 

Ua fa'aalia e le sui o le tatou falema'i mai le Laboratory, "Ua tau leai lava nisi e o mai e tuia o latou toto, e foa'i atu mo le fa'amoemoe e fa'asaoina ai le ola o se isi, ma ua le o toe tele fo'i le vaega o toto o totoe i le sapalai o i ai nei. O se auala fo'i lea e fa'ailoa ai lou agalelei ma lou alofa i se tasi o lo'o fia maua le ola."

 

Ua fa'apena fo'i lipoti ua auina mai Samoa, i le to'atele o tagata ua le toe taua ia i latou ona tuia o latou toto mo nisi o le mamalu lautele, ua fa'ato'a vevesi lava aiga e tui o latou toto pe afai o nisi o latou pelega o lo'o ua tau togafitia i le falema'i ma ua mana'omia se toto.

 

Pe afai e maea ona tuia le toto, ona fa'auia lea i le masini e sailia ai le tulaga lelei mo le fa'ao'o atu e fa'aaogaina i le gasegase o lo'o togafitia e mana'omia, ma fa'aputu fo'i i le sapalai aua taimi e mana'omia ai.

 

SUIGA LAULAUATOFI A LE AMERICAN SAMOA VOLLEYBALL ASSOCIATION [ASVA]

 

Ua i ai suiga tofi o le laulauatofi a le Asosi Volleyball a Amerika Samoa, ina ia lava tapena i ai sui uma po'o totino o le Asosi e ao ina palota mo lenei tausaga ma ona aluga o ta'aloga e fa'atautaia e le tatou Asosi.

 

“O i latou uma ua avea ma totino o le Asosi Volleyball a Amerika Samoa, e mafai ona latou toe filifilia ai sui ua latou manatu ina ia tutula'i mai e avea ma ta'ita'i o le Asosi i lenei fo'i tausaga. O le tausaga fo'i lenei e matua'i tele tauvaga fa'avaomalo e tatau ona auina atu i ai ni tatou 'au fili lelei mo le fa'amoemoe, ia maua mai ni tatou pine, e fa'amau fa'ailoga ai le tatou tausinioga i lenei fa'agatama fa'avaomalo,” o se tala lea a le tama'ita'i failautusi Pona Sitagata.

 

O Fepuari 8, 2019 lea ua faatulagaina mo lea fonotaga e faia lea i le Ofisa o le NOC i le tatou Veterans Memorial Stadium i Tafuna, i lona itula e 4:30 i le afiafi.

 

E mana'omia lava ona vave mai uma totino o le Asosi lenei ina ia mautinoa fo'i ua fa'aalia lona finagalo e ala i lau palota, mo sui ua e finagalo e tutula'i mai i tofiga e fa'atautaia ai le tatou Asosi, ma galulue fa'atasi fo'i ma outou i fa'amoemoe lelei uma e aga'i ai i luma galuega patino tau le ta'aloga Volleyball.

 

O le aotelega o i latou e ao ina palotaina mo totino o le Komiti Fa'afoe atoa ai ma le Au Ofisa o le Laulauatofi i lenei tausaga e to'a 9 lelei. O le ala lea e ao ai ina e pa'au mai ma fa'aalia lona finagalo i lau palota.

 

AUINA SUI TALAVOU KATOLIKO I LA MAFUTAGA YOUTH I PANAMA

 

O se aumalaga e to'atolu mai Amerika Samoa lea ua masi'i atu e avea ma sui o le Autalavou a le Ekalesia Katoliko e molimauina fo'i le tu'ufa'atasiga a le Autalavou atoa i totonu o Panama City, Panama.

 

E to'alua sui talavou, Paul Collins ma le susuga Chales Asalemo ma le latou Patele talavou foi Fr. Pio Afu lea ua fiafia fa'atasi nei ma le anoanoa'i o le talavou i Panama City.

 

O le aso Lulu lea na amatalia ai lea tauaofiaga a le Au talavou i Panama City ma e fa'aauau lava seia maea le vaiaso atoa. Ua fa'ailoa mai e tele polokalama fa'alelotu o le a fa'atinoina i lea tauaofaiga ma e i ai fo'i avanoa lelei o le a feiloa'i ai nei sui uma o autalavou o aofia ma Pope Francis.

 

E i ai fo'i sauniga fa'apitoa a le Ekalesia ma latou ata fa'asolo o le a fa'aalia i lea lava fonotaga e aoga mo le tupulaga talavou e fa'amausali ai le latou fa'atuatuaga.

 

O le isi fo'i Tauaofiaga o Tupulaga Talavou sa fa'atasi i ai sui mai le tatou nei Pule'aga, sa fa'atasia ma fa'atautaia e le Pule'aga Apia Samoa  ma sa faia lea i le tausaga ua te'a. O iina sa matua aofia mai uma i ai le vasega o talavou mai Niu SIla, Ausetalia ma Samoa na lua. Na faia lo latou sao ma sa latou savavali fo'i i le solo fa'aaloalo i lea tausaga ua te'a. O mea lava e tasi sa latou faia i le vaiaso atoa, o sauniga fa'apitoa, semina ma fa'afiafiaga fa'aaganu'u a Samoa.