Ads by Google Ads by Google

Tala I Vaifanua

SI’ITIA TOTOGI O TAUTUA A LE OFISA O LESITALA

 

Ua si'itia totogi mo tautua eseese a le Ofisa o Lesitala a le tatou Malo pe a o'o i le aso 11 Fepuari, 2019.

 

O nei tautua a le Ofisa e aofia ai lesitalaina o se fanua, suafa matai ma isi mea uma ua masani ona afea ai lea Ofisa i ana tautua masani mo le mamalu lautele.

 

I se faasilasilaga faalaua'itele a le ali'i Loia sili ua fa'ailoa mai ai, ina ua mae'a illoilo toto'a i aiaiga o tulafono tau le tautuaina o le mamalu lautele mai le Ofisa o le Lesitala ua faamaonia ai le agatonu o lea si'itaga ma le totogi o le tautua o lo'o ofoina mai e le Ofisa o le Lesitala.

 

O lea vaega o le tulafono o lo'o fa'atalatala i le tulafono - Totogi o Tautua a le Ofisa o Lesitala - e fa'atautaia ai le Faigamalo a Amerika Samoa ma ua mae'a nei ona toe fa'aopoopo i ai lea suiga.

 

O le totogi o so'o se tautua mo le fa'amaoniga tau Fanua i le teritori e $50. Fa'amauina o se Suafa Matai e $200 ua suia mai le na'o le $12 sa i ai. Lesitalaina o se fanua o le a totogia le $50 mai le nao le $5 sa i ai.  O le totogi fo'i lava lea mo so'o se faauilavea i lena lesitala, po'o se eleele fo'i e lisia, po'o se fale fo'i e fia lisia i se aiga po'o se faipisinisi.

 

O le totogi mo feagaiga tau maliliega e $25 ua fa'apea fo'i le totogi mo se tasi e fa'atu'iese i ai.

 

O pepa e faila i le lesitala mo mokesi ma isi mea uma e fa'aaoga mo teugatupe i faletupe ua si'itia i le  $25. A'o le totogi mo le su'eina o so'o se faamaumauga mai totonu o le Ofisa o Lesitala ua fa'atulaga i le ta'i $15 i lea siitaga.

 

O isi pili uma mai lea Ofisa ina ia lesitalaina ni malosi'aga tau affidavit ua fa'atualga i le $25 a'o isi meatotino uma ua totogia i le $15.

 

O nei pili totogi uma ua maulalo mamao lava mai le si'itaga sa fa'atulaga muamua mai ma sa fa'apea e amatalia ia Oketopa 22, 2018.

 

Na a'amia fa'apitoa e le Senate le susuga le Loia sili ma latou fautuaina, ia taofia lea siitaga ua maualuluga tele totogi o tautua a le Ofisa o le Lesitala. Petia'i, sa faailoa mai lava i lena taimi e lana susuga le Loia Sili, e le mafai ona taofia lea si'itaga ua fa'atulaga, peitai o le aso Gafua o lenei vaiaso, ua taulima ai lenei fa'alauiloaga o si'itaga a le Ofisa o Lesitala e tatau lava ona fa'amalosia i le aso 11 o Fepuari 2019.

 

TALIA E PERESETENE TRUMP TOE TATALA GALUEGA FETARALE

 

O le aso Fariaile na te'a nei na tatala ai le taofi o le afioga Peresetene Trump ina ia toe faia galuega a le Malo tele mo le tolu vaiaso, ao tatalia pea le fa'amae'a mai o feutagaiga ina ia mautinoa le saogalemu o le tuaoi i saute o le Malo, lea e feso'ota'i ai ma Mexico.

 

O le fa'aiuga lea a Peresetene Trump ua ia tu'ua ai le finauga a le vaega o Temokalasi e le toina mai le faitau piliona o le tinoitupe e fausia ai la Pa Puipui i le tuaoi ma Mexico. O le fete'ena'iga i taofi mo le fausia o le Pa lea, na atoa le masina o tatalia se finagalo autasi ma toe tatala ai le taofiga o galuega mo nisi o matagaluega tetele o le Malo tele.

 

O lea la fa'aiuga ua maua ai le taimi e mafai ai ona pasia le tele o pili o tupe e fa'agaoioia ai nei matagaluega uma a le Malo tele i se vave e tusa ma le tolu vaiaso lea ua tu'u mai.

 

O le a sainia ai fo'i e le Peresetene pili e ao ina fa'atautaia ai galuega masani a le Malo a'o le'i o'o atu ia Fepuari 15, 2019. O le aotelega o i latou ua a'afia i lea taofiga o galuega a le malo tele e silia ma le 800.000 tagata faigaluega, ma ua fa'ailoa mai fo'i, ua mae'a pasia e le Konekeresi e ao ina totogia uma le aotelega e o latou aso na faigaluega ai ae le'i totogia.

 

A'AFIAGA MALO PASEFIKA I FESO'ITA'IGA MA SAINA - RIPAPILIKANA

 

I le vaiaso na te'a sa talanoaina ai i le fonotaga tu'ufa'atasi a le Vaega Fa'aupufai a le Ripapilikana le tele o a'afiaga o malo fa'aatumotu ona o latou maliliega feso'ota'i ma Malo o Saina Komenisi.

 

O lea fonotaga sa faia lea i le a'ai o Albuqueque, New Mexico, ma sa auai atu ai fo'i tatou sui e to'atolu, o le tatou Faipule i le Konekeresi, le susuga Taulapapa Willie Sword ma Frank Barron o se tasi o faipisinisi i le atunu'u. O le susuga Taulapapa Willie Sword o le Taitaifono o le Ripapilikana i Amerika Samoa.

 

O le auau o le manatu fa'aalia a le ali'i ta'ita'ifono sa ia fa'ailoa ai le tele na'ua o le naunauta'iga o lo'o i le Malo o Saina Komenisi e fa'aalu a latou tupe i le Malo Tuto'atasi o Samoa, aua o lo'o fausia fo'i e i latou nei le nofoaga mo ta'aloga aua le ta'aloga a le Pasefika lea e talimalo ai Samoa i le tausaga nei.

 

Ona o Samoa na lua e toetoe lava a so'o eleele ae so'o toto, e i ai le popolega e le gata ina matua eseese faigamalo a Saina Komenisi ma Samoa ma i tatou fo'i i le teritori, ae vavalalata lava i mea uma. O le taumafaiga fo'i o loo taumafai i ai le Peresetene ina ia mautu le puipuiga o le tuaoi ma isi malo, ua mautinoa o se mea e ao ina fa'amalosia. E le o le pa u'amea e taua, ae o le fa'ataua o le puipuiga ia mautu lelei mai le sofa'i mai e nisi o malo tetele o le lalolagi e pei ona matua malosi mai ai le malo o Saina i malo fa'aatumotu o le Pasefika.

 

O nogatupe tetele ua mafai ona fa'amatu'u mai mo Samoa, e mau talitonuina e le to'atele, e le gafatia e Samoa ona toe totogia, ae po'o le a la se mea po'o se ala o le a toe totogia ai nei nogatupe faitau piliona? O le fesili lena ua tula'i mai i mafaufauga o le toatele o tagata o Samoa Tuto'atasi.

 

O se tasi vaega o le tautalaga a Taulapapa na ia fa'ailoa atu ai le agaga fa'avauvau ona o le tu'ua ai o le malo e le susuga Utu Abe Malae, o se tasi sa avea ma Taitaifono o le Rippapilikana i Amerika Samoa mo le tele o tausaga, faapea fo'i ma Bishop Vaifanua Mulitauaopele, o se tasi iloga fo'i o le tatou vaega fa'aupufai sa malaga mai fo'i o se sui usufono i tausaga ua mavae.

 

Matagofie lea fonotaga ma sa avea ma avanoa lelei o le tama'ita'i Sui i le Konekeresi o Amerika Samoa e asiasi atu ai i le New Mexico Military Institute lea e i ai le to'a 11 o fanau a Amerika Samoa o lo'o a'o'oga ai i a'oga fa'amiliteri.